14-Dec-2020

(ପ୍ରେରଣା ଖବର) ବ୍ରହ୍ମପୁର: ବ୍ରହ୍ମପୁରରେ ଚାଲିଥିବା ଆଇପିଏଲ୍‌ ବେଟିଂ ରାକେଟ୍‌ର ଗୋଟିଏ ପରେ ଗୋଟିଏ ଲିଙ୍କ୍‌ ଠାବ କରି ଚାଲିଛି ପୁଲିସ। ରାକେଟ୍‌ର କିଙ୍ଗ୍‌ପିନ୍‌ କୁହାଯାଉଥିବା ଆର୍‌.ଲାଲି ଆଚାରୀ ଗିରଫ ହେବା ପରେ ପୁଲିସ ପ୍ରାୟ ୨୦ଜଣ ବୁକି ଓ ବଡ଼ ଜୁଆଡ଼ିଙ୍କ ତାଲିକା ପ୍ରସ୍ତୁତ କରିଛି। ଏହି ତାଲିକାରେ ନାଁ ଥିବା ଲାଲିର ସହଯୋଗୀ ଅଜୟ ପଣ୍ଡା ନାମକ ଜଣେ ବୁକିକୁ ଗୋସାଇଁ ନୂଆଗାଁ ଥାନା ପୁଲିସ ଧରିଛି। ଆଇପିଏଲ୍‌ ବେଟିଂ କାରବାରରେ ଲାଲିଙ୍କ ସହିତ ଅଜୟ ଲିଙ୍କ୍‌ ଥିବା ନେଇ ପୁଲିସ ପ୍ରମାଣ ପାଇସାରିଛି। ପୁଲିସ ଅଜୟଙ୍କ ମୋବାଇଲ୍‌ ଜବତ କରିଛି। ତାଙ୍କ ଠାରୁ ବର୍ତ୍ତମାନ‌ ଟଙ୍କା ଜବତ ହୋଇ ନଥିବା ବେଳେ ପୁଲିସ ଅତି ଶୀଘ୍ର ତାଙ୍କର ବ୍ୟାଙ୍କ ବିବରଣୀ ବାହାର କରିବ ବୋଲି ଜଣାପଡ଼ିଛି। ଅଜୟଙ୍କ ଘର କନିଷି ବୋଲି ପୁଲିସ କହିଛି। ଅଜୟ ଧରାପଡ଼ିବା ପରେ ତାଙ୍କର ସହଯୋଗୀମାନେ ଚମ୍ପଟ୍‌ ମାରିଛନ୍ତି। ବ୍ରହ୍ମପୁରରେ ଚାଲିଥିବା ଆଇପିଏଲ୍‌ କ୍ରିକେଟ୍‌ ବେଟିଂ ରାକେଟ୍‌କୁ ମୂଳପୋଛ କରିବାରେ ଲାଗି ପଡ଼ିଛି ପୁଲିସ। ଏଥିପାଇଁ ବ୍ରହ୍ମପୁର ଏସ୍‌.ପି. ପିନାକ ମିଶ୍ରଙ୍କ ତତ୍ତ୍ବାବଧାନରେ ଏକ ଟିମ୍‌ ଗଠନ କରାଯାଇଛି। ପ୍ରତିବର୍ଷ ଆଇପିଏଲ୍‌ ସିଜନ୍‌ରେ ବହୁ ଯୁବବର୍ଗ ଅନ୍‌ଲାଇନ୍‌ ବେଟିଂରେ ସାମିଲ ହୋଇଥାନ୍ତି। କୋଟି କୋଟି ଟଙ୍କାର ବେଟିଂ ହୋଇଥାଏ। ଅନ୍‌ଲାଇନ୍‌ରେ ଏହି କାରବାର ହେଉଥିବାରୁ ପୁଲିସକୁ ଏହି ରାକେଟ୍‌ ଠାବ କରିବାରେ ସମସ୍ୟା ହୋଇଥିିଲା। କିନ୍ତୁ ଗତ ଅକ୍ଟୋବର ୨୯ତାରିଖରେ ଗୋସାଇଁ ନୂଆଗାଁ ଥାନା ପୁଲିସକୁ ମିଳିଥିଲା ବଡ଼ ସଫଳତା। ଆଇପିଏଲ୍‌ ବେଟିଂ ରାକେଟ୍‌ର କିଙ୍ଗ୍‌ପିନ୍‌ କୁହାଯାଉଥିବା ଆର୍‌.ଲାଲି ଆଚାରୀ ଓ ସହଯୋଗୀ ପ୍ରଶାନ୍ତ ସୁବୁଦ୍ଧିଙ୍କୁ ଗିରଫ କରିଥିଲା। ସେମାନଙ୍କ ନିକଟରୁ ୩୩ଲକ୍ଷ ୬୧ହଜାର ଟଙ୍କା ଜବତ ହୋଇଥିଲା। ଏହି ଘଟଣାରେ ଆହୁରି କେତେକ ବୁକି ଫେରାର୍‌ ରହିଥିଲେ। ତେବେ ଗତ ୬ତାରିଖରେ ଅନ୍ୟତମ ବୁକି ବିଶାଲ କୁମାର ଅଗ୍ରୱାଲ ଭୁବନେଶ୍ବରରୁ ଗିରଫ ହୋଇଥିବା ବେଳେ ତାଙ୍କର ସହଯୋଗୀ ଅଜିତ କୁମାର ବରାଡ଼ ଓରଫ୍‌ ବାଦଲ ବ୍ରହ୍ମପୁରରୁ ଗିରଫ ହୋଇଥିଲେ। ଶେଷରେ ଆଜି ଅନ୍ୟତମ ବୁକି ଅଜୟ ପୁଲିସ ହାତରେ ଧରାପଡ଼ିଛନ୍ତି। ଗତ ୯ତାରିଖରେ ଅଜୟଙ୍କ ବାହାଘର ହୋଇଥିଲା। ଏହା ପୂର୍ବରୁ ଗୋପାଳପୁର ସ୍ଥିତ ଏକ ବଡ଼ ହୋଟେଲ୍‌ରେ ତାଙ୍କର ରିଙ୍ଗ ସେରମୋନି ହୋଇଥିଲା। ଆଜି ପୁରୁଣା ବସ୍‌ଷ୍ଟାଣ୍ଡ୍‌ରେ ଥିବା ସହରର ଏକ ଜଣାଶୁଣା ହୋଟେଲ୍‌ରେ ବାହାଘର ଭୋଜି ପାଇଁ ସବୁ ଆୟୋଜନ କରାଯାଇଥିଲା। କିନ୍ତୁ ଏହା ପୂର୍ବରୁ ପୁଲିସ କୌଣସି ସୂତ୍ରରୁ ଖବର ପାଇ କନିଷିରେ ଚଢ଼ଉ କରି ଅଜୟଙ୍କୁ ଉଠାଇ ଆଣିଛି। ଫେରାର୍‌ ଥିବା ସହଯୋଗୀଙ୍କୁ ଧରିବା ପାଇଁ ଉଦ୍ୟମ ଜାରି ରହିଥିବା ପୁଲିସ କହିଛି।