27-Aug-2023

ବରଗଡ:-ବରଗଡ ଜିଲ୍ଲା ଗାଇସିଲେଟ ବ୍ଲକର ନୂତନ ଅନୁଦାନ ପ୍ରାପ୍ତ ଉଚ୍ଚ ବିଦ୍ୟାଳୟ ସମୂହର ଏକ ବର୍ଷ ମଧ୍ୟରେ ଅବସର ଗ୍ରହଣ କରିଥିବା ତିନି ଜଣ ପ୍ରଧାନ ଶିକ୍ଷକଙ୍କୁ ଅବସରକାଳୀନ ବିଦାୟ ସମ୍ବର୍ଦ୍ଧନା ଦିଆଯାଇଛି। ଗ୍ରାମ ପଞ୍ଚାୟତ ଉଚ୍ଚବିଦ୍ୟାଳୟ କୁଣ୍ଡାଖାଇଠାରେ ସଂଘର ସଭାପତି ବିଶ୍ଵନାଥ ବେହେରାଙ୍କ ସଭାପତିତ୍ବରେ ଅନୁଷ୍ଠିତ ଏହି ସମାବେଶରେ  ବିଦ୍ୟାଳୟର ଛାତ୍ରୀ ମାନଙ୍କ ଦ୍ଵାରା ପ୍ରାରମ୍ଭିକ ସଂଗୀତ ଗାନ କରାଯାଇ ଦିବଙ୍ଗତ ଶିକ୍ଷକ କର୍ମଚାରୀଙ୍କ ଉଦ୍ଦେଶ୍ୟରେ ନିରବ ପ୍ରାର୍ଥନା ପରେ ସମ୍ପାଦକ ପର୍ଶୁରାମ ପ୍ରଧାନ ସ୍ଵାଗତ ଭାଷଣ ଦେଇଥିଲେ ଓ ଆବାହକ ଋକ୍ମଣ ଦିଶ୍ରି ବିବରଣୀ ପଠନ କରିଥିଲେ। ଏହି ସମାରୋହରେ ଡାଙ୍ଗବାହାଲ, କଟାବାହାଲ ଓ କୁଣ୍ଡାଖାଇର ଅବସରପ୍ରାପ୍ତ ପ୍ରଧାନ ଶିକ୍ଷକ ଯଥାକ୍ରମେ ଉପେନ୍ଦ୍ର ଭୋଇ , ଚନ୍ଦ୍ରଭାନୁ ବଢେଇ ଓ ଦୁର୍ଲ୍ଲଭ ସାହୁଙ୍କୁ  ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଛି। ସଭାରେ ସୁଦର୍ଶନ ବାରିକ, ହେମନ୍ତ ସାହୁ, ଅରକ୍ଷିତ ବାରିକ, ପ୍ରଫୁଲ୍ଲ ଡନସନା, ପ୍ରଶାନ୍ତ ହୋତା, ସୈାଭାଗ୍ୟ ପ୍ରଧାନ,ଗୋକୁଳ ପ୍ରଧାନ, ଅକ୍ଷୟ ସାହାଣୀ,ହିମାଂଶୁ ସାହୁ ପ୍ରମୁଖ ଶିକ୍ଷକ ସମ୍ବର୍ଦ୍ଧିତ ବ୍ୟକ୍ତିବିଶେଷଙ୍କ ସ୍ମୃତି ଚାରଣ କରିଥିଲେ। ଆୟୋଜକ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରିୟରଞ୍ଜନ ପ୍ରଧାନ ଓ ସମସ୍ତ ଶିକ୍ଷକ କର୍ମଚାରୀଙ୍କ ସହଯୋଗରେ ହୋଇଥିବା ଏହି ସମାରୋହରେ ବ୍ଳକର ସମସ୍ତ ଏଗାରଟି ବିଦ୍ୟାଳୟରୁ ୧୨୧ ଜଣ ଶିକ୍ଷକ କର୍ମଚାରୀ  ଯୋଗଦାନ କରିଥିଲେ। ସଭାକାର୍ଯ୍ୟକୁ ଶିକ୍ଷକ ନବୀନ ଚନ୍ଦ୍ର ସାହୁ ଓ ମୋହନ ରଣା ସଂଯୋଜନା କରିଥିବା ବେଳେ ପରିଶେଷରେ ମନୋଜ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ।