27-Aug-2023

ନାଟ୍ୟକାର ପ୍ରମୋଦ ତ୍ରିପାଠୀ ସ୍ମୃତି ସଂସଦ ପକ୍ଷରୁ ପ୍ରମୋଦନାମା ଆୟୋଜିତ

ସମ୍ବଲପୁର ତା ୨୭/୦୮,ଆଜି ପ୍ରମୋଦ ତ୍ରିପାଠୀ ସ୍ମୃତି ସଂସଦ ପକ୍ଷରୁ ସ୍ଥାନୀୟ ସମ୍ବଲପୁର କଳାକେନ୍ଦ୍ର ସଭାକକ୍ଷଠାରେ ପ୍ରମୋଦନାମା କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ନାଟ୍ୟବିତ ଡ.ଶ୍ୟାମ ସୁନ୍ଦର ଧରଙ୍କ ଅଧ୍ୟକ୍ଷତାରେ ଆୟୋଜିତ ଏହି ସଭାରେ ମୁଖ୍ୟଅତିଥି ଭାବରେ ଯୋଗଦେଇ ବିଶିଷ୍ଟ ନାଟ୍ୟକର୍ମୀ ନାଟ୍ୟ ଚେତନା,ଭୂବନେଶ୍ୱର ସୁବୋଧ ପଟ୍ଟନାୟକ କହିଥିଲେ ଯେ,  ନାଟକର ଏକ ଭିନ୍ନ ଭାଷା ଥାଏ। ସଂଳାପ ଯେକୌଣସି ଭାଷାରେ ଥାଉନା କାହିଁକି ନାଟକର ଭାଷାରେ ଏକ ହୋଇଯାଏ। ଏହି ଭାଷା ହେଉଛି ଦେଖିବାର ଭାଷା। ନାଟକର ସଂଳାପରେ କିଛିମାତ୍ର ଶବ୍ଦ ମଧ୍ୟରେ ବହୁତ କିଛି ପ୍ରକାଶ କରିବାର କ୍ଷମତା ରହିଥାଏ। କୌଣସି ଅଂଚଳର ନିଜସ୍ବ ସଂସ୍କୃତିକୁ ପ୍ରଦର୍ଶନ କରିବାକୁ ହେଲେ ସେହି ଅଂଚଳର ସଂସ୍କୃତିରେ ରହିଥିବା ଉପାଦାନକୁ ଗୁରୁତ୍ତ୍ବ ଦେବା ଉଚିତ। ମାଟିର ଭାଷା ନେଇ ନାଟକ ଉପସ୍ଥାପିତ ହେଲେ ତାହା ମର୍ଯ୍ୟାଦା ସହ ଲୋକାର୍ଷଣକୁ ବରଣକରେ ଯାହା ତା’ର ସ୍ୱାତନ୍ତ୍ର୍ୟ ପ୍ରକଟ କରିବାରେ ସହାୟକ ହୋଇ ପାରିବ।ଏହି ଧାରା ଜାତୀୟସ୍ତରରେ ହେଉ ବା ଆନ୍ତର୍ଜାତୀୟ ସ୍ତରରେ ସବୁଠି ସମାନ। ସମ୍ମାନିତ ଅତିଥି କେଶରଞନ ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ ଯେ,ନାଟକର କେତେକ ଉପାଦାନ ସମଗ୍ର ବିଶ୍ୱରେ ସମାନ ହୋଇଥାଏ। ସବୁସ୍ଥାନରେ ନାଟକର ପ୍ରଦର୍ଶନକୁ ଗୁରୁତ୍ତ୍ବ ଦିଆଯାଏ। ଦର୍ଶକକୁ ଅନ୍ଧାରରେ ରଖି ମଂଚରେ କଳାକାର ଉପରେ ଆଲୋକ ଦେଇ ନାଟକକୁ ଦର୍ଶକମାନଙ୍କ ମାନସକୁ ପ୍ରବେଶ କରାଇବା ଏକ କଠିନ କାର୍ଯ୍ଯ। ଏସୀୟ ନାଟକର ପ୍ରାଚୀନତାର ନିଦର୍ଶନ ବେଦରେ ରହିଛି।ନାଟ୍ଯ ପରମ୍ପରା ବଳିଷ୍ଠ ନଥିଲେ ଭରତଙ୍କ ନାଟ୍ୟଶାସ୍ତ୍ର ରଚିତ ହୋଇ ପାରିନଥାନ୍ତା। ଓଡିଶାର ପ୍ରାଚୀନ ଶିଳାଲେଖରେ 'ସମାଜ' ଶବ୍ଦ ନାଟକ ଉଦ୍ଦେଶ୍ଯରେ ବ୍ୟବହୃତ ହୋଇଥିବା ଦେଖାଯାଏ। ଚାର୍ଲସ ଫେଡ୍ରିକ ପଶ୍ଚିମ ଓଡିଶାର ଲୋକସଂସ୍କୃତି ସଂରକ୍ଷଣକୁ କେରଳର ଲୋକସଂସ୍କୃତି ସଂରକ୍ଷଣ ପ୍ରକ୍ରିୟା ସହ ତୁଳନା କରିଛନ୍ତି। ଯାହାର ପ୍ରତିଫଳନ ନାଟକ ମାଧ୍ଯମରେ ହୋଇପାରିଛି । ଆଧୁନିକତାକୁ ବରଣକରି ହିଁ ପ୍ରୋସେନିୟମ ରଙ୍ଗମଞ୍ଚ ପାଇଁ ଓଡିଶାରେ ଆରମ୍ଭ ହେଲା ଯାହା ପାଶ୍ଚାତ୍ୟ ଧାରାର ଅନୁସରଣରେ ହୋଇଥିଲା ତେଣୁ ସମସ୍ତ ଆଧୁନିକ ଓଡିଆ ନାଟକକୁ ଆମେ ଆନ୍ତର୍ଜାତିକ ସ୍ତରରେ ବିବେଚନା କରି ପାରିବା। ତେବେ ଆମେ ନିଜ ସଂସ୍କୃତିକୁ ହିଁ ନେଇ ଆଗକୁ ବଢିବା ଓ ଆମକୁ ଆନ୍ତର୍ଜାତିକ ସ୍ତରରେ ପ୍ରତିଷ୍ଠିତ କରିପାରିବା ବୋଲି ସେ କହିଥିଲେ।ସଭାପତିତ୍ୱ ଅଭିଭାଷଣରେ ଡ.ଧର ପ୍ରମୋଦ ତ୍ରିପାଠୀଙ୍କ ସମେତ  ସମ୍ବଲପୁର କେତେ ଜଣ ଦିବଂଗତ ନାଟ୍ୟ ପ୍ରତିଭା ରାଜେନ୍ଦ୍ର ପ୍ରସାଦ ପଣ୍ଡା,କୃଷ୍ଣଚନ୍ଦ୍ର ଆଚାର୍ଯ୍ୟ,ଡ. ପଂଚାନନ ମିଶ୍ର, ରଣଜିତ ପଟ୍ଟନାୟକ ପ୍ରମୁଖଙ୍କ ସ୍ମୃତି ସଂସଦର ଆବାହକ ଡ.ଦ୍ୱାରିକାନାଥ ନାୟକ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ। ଏହି ଅବସରରେ ଅଭିନେତ୍ରୀ ଅଞଳି ମହତ୍ତମ ଓ ଅଭିନେତା ସଞୀବ କୁମାର ମାଝୀଙ୍କୁ ପ୍ରମୋଦ ସ୍ମୃତି ସମ୍ମାନରେ ସମ୍ମାନୀତ କରାଯାଇଥିଲା ଓ ୰ପ୍ରମୋଦ ତ୍ରିପାଠୀଙ୍କ ନାଟକ “ରାଜକୀୟ” ଲୋକାର୍ପିତ ହୋଇଥିଲା।ଡ. ଗୌରିଦାସ ପ୍ରଧାନ ମାନପତ୍ର ପାଠ କରିଥିବା ବେଳେ ଆବାହକ ଧନ୍ୟବାଦ ଅର୍ପଣ କରିଥିଲେ।ଶତୃଘନଲାଲ ସାହା, ବୃନ୍ଦାବନ ମିଶ୍ର,ପ୍ରଶାନ୍ତ ମାଝୀ, ଅତିଶ କୁମାର ଶତପଥୀ,କମଳଲୋଚନ ପଣ୍ଡା,ଡ.ଗୋବିନ୍ଦ ମହାରଣା,ରମେଶ ଚନ୍ଦ୍ର ମିର୍ଦ୍ଧା ପ୍ରମୁଖ ଏହି କାର୍ଯ୍ୟକ୍ରମରେ ସହଯୋଗ କରିଥିଲେ।