26-Aug-2023

ବୀରମହାରାଜପୁର,(ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ କେନଝରିଆପାଲି ପଞ୍ଚାୟତ ଅନ୍ତର୍ଗତ ତେଲିପାଲି ଗ୍ରାମର କୁଶ ଭଏନା (୨୮) । ସେ ସମ୍ପୁର୍ଣ୍ଣ ଦୃଷ୍ଟି ବାଧିତ । ମାତ୍ର ଚଳିତ ବର୍ଷ ହୋଇଥିବା ବ୍ୟାଚଲର ଅଫ ଏଜୁକେସନ (ବି.ଏଡ) ପ୍ରବେଶିକା ପରୀକ୍ଷାରେ ସଫଳ ହୋଇଥିବା ଜଣାପଡିଛି । ସେ ପ୍ରବେଶିକା ପରୀକ୍ଷାରେ ସମୁଦାୟ ୯୦ ନମ୍ବରରୁ ୫୨.୭୫ ନମ୍ବର ରଖି ନାମ ଲେଖାଇବାକୁ ଯୋଗ୍ୟ ବିବେଚିତ ହୋଇଛନ୍ତି । ମାତ୍ର ପରିବରର ଆର୍ଥିକ ଅବସ୍ଥା ଶୋଚନୀୟ ଥିବାରୁ ତାଙ୍କର ପାଠ ପଢିବା ନେଇ ସନ୍ଦେହ ଦେଖାଦେଇଛି । ଏଣୁ ଦୃଷ୍ଟି ବାଧିତ କୁଶ ସରକାରୀ ଭାବେ ଏବଂ ବଦାନ୍ୟ ବ୍ୟକ୍ତିଙ୍କ ସହଯୋଗ ପାଇଁ ଅନୁରୋଧ କରିଛନ୍ତି ।
ସୁଚନାମତେ ତେଲିପାଲି ଗ୍ରାମର କୁଶ ଭଏନାଙ୍କ ବାପା ଜୁଆନି ଭଏନା ଜଣେ ଦିନ ମଜୁରିଆ । ବହୁ ଦିନରୁ ତାଙ୍କର ମାଆଙ୍କ ମୃତ୍ୟୁ ଘଟିସାରିଛି । ୨୦୧୯ରେ କୁଶଙ୍କ ମୁଣ୍ଡର ଭେନ୍ ସମସ୍ୟା ହେବାରୁ ସେ ଡାକ୍ତରଙ୍କ ପାଖକୁ ଯାଇଥିଲେ । ଡାକ୍ତର ଏହାର ଅପରେସନ କରିବାକୁ କହିଥିଲେ । ମାତ୍ର ପରିବାରର ଆର୍ଥିକ ସମସ୍ୟା ଯୋଗୁଁ ଅପରେସନରେ ବିଳମ୍ବ ହେଲା । ମାତ୍ର ସେତେବେଳକୁ ତାଙ୍କର ଉଭୟ ଆଖି ନଷ୍ଟ ହୋଇଯାଇଥିଲା । ସେତେବେଳେ ସେ ସ୍ନାତକ ପାଠ୍ୟକ୍ରମ ପଢି ସାରିଥିଲେ । ତେବେ ସେହିଦିନ ଠାରୁ ତାଙ୍କର ପାଠପଢାରେ ସମସ୍ୟା ଦେଖାଦେଲା । ତଥାପି ଭାଙ୍ଗି ନ ଯାଇ ଗ୍ରାମର ଅନ୍ୟ ଜଣେ ଯୁବକଙ୍କ ସହାୟତା ନେଇ ପାଠ୍ୟ ପୁସ୍ତକର ପାଠ ଶୁଣି ଶୁଣି ନିଜକୁ ବିଭିନ୍ନ ଶିକ୍ଷକ ହେବା ପଇଁ ଡିପ୍ଲୋମା ଇନ ଏଲିମେଣ୍ଟାରୀ ଏଜୁକେସନ (ଡି.ଏଲ.ଇ.ଡି ) ଓ ବ୍ୟଚଲର ଅଫ ଏଜୁକେସନ (ବି.ଏଡ୍) ପ୍ରବେଶିକା ପରୀକ୍ଷା ପାଇଁ ପ୍ରସ୍ତୁତ ହୋଇଥିଲେ । ସେ ଜଣେ ଲେଖନକାରଙ୍କ ସହଯୋଗ ନେଇ ଡି.ଏଲ.ଇ.ଡି ତଥା ବି.ଏଡ୍ ପ୍ରବେଶିକା ପରୀକ୍ଷା ଦେଇଥିଲେ । ପ୍ରଥମ ଥର ଡି.ଏଲ.ଇ.ଡି ପ୍ରବେଶିକା ପରୀକ୍ଷାରେ ବିଫଳ ହୋଇଥିଲେ ମଧ୍ୟ ସେ ଦ୍ବିତୀୟ ପ୍ରଚେଷ୍ଟାରେ ସଫଳ ହୋଇଥିଲେ । ସେ ସୋନପୁର ଶିକ୍ଷା ଓ ଶିକ୍ଷକ ତାଲିମ ପ୍ରଶିକ୍ଷଣ ପ୍ରତିଷ୍ଠାନରେ ନାମ ଲେଖାଇବାକୁ ଯୋଗ୍ୟ ବିବେଚିତ ହୋଇଥିଲେ । ମାତ୍ର ଆର୍ଥିକ ସମସ୍ୟା ଯୋଗୁଁ ନାମ ଲେଖାଇ ପାରି  ଥିଲେ । ତାଙ୍କୁ ସରକାରୀ ଅବା ବେସରକାରୀ ସ୍ତରରେ ସହାୟତା ହାତ ବଢ଼ାଇବାକୁ ସେ ଅନୁରୋଧ କରିଛନ୍ତି।