26-Aug-2023

ନୟାଗଡ(ପ୍ରଦୀପ କୁମାର ପଣ୍ଡା): ଖଣ୍ଡପଡ଼ା ସହରର ବାଇପାସ୍ ରାସ୍ତା ପାର୍ଶ୍ବରେ ଥିବା ବିଏସଏନଏଲ୍ କାର୍ଯ୍ୟାଳୟ ଟି ଜରାଜୀର୍ଣ୍ଣ ଅବସ୍ଥାରେ ଦଣ୍ଡାୟମାନ। ସମୟାନୁକ୍ରମେ ଉକ୍ତ କାର୍ଯ୍ୟାଳୟ ଟି ଅଞ୍ଚଳବାସୀଙ୍କୁ ସେବା ଯୋଗାଇବା ରେ ବିଫଳ ହୋଇଥିବା ବେଳେ ଜଣେ ମାତ୍ର ଜଗୁଆଳି ଙ୍କ ଦ୍ଵାରା ଉକ୍ତ କାର୍ଯ୍ୟାଳୟ ଟି ଯଥାକଥା ରୀତି ରେ ପରିଚାଳିତ ହେଉଥିବା ବିଶେଷ ସୂତ୍ରରୁ ଜଣାପଡ଼ିଛି। ମାସମାସ ଧରି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଉକ୍ତ କାର୍ଯ୍ୟାଳୟ ପରିଦର୍ଶନ ରେ ଆସୁ ନଥିବାରୁ କାର୍ଯ୍ୟାଳୟ ଅବସ୍ଥାରେ ସୁଧାର ଆସୁନାହିଁ କିମ୍ବା ସମସ୍ୟା ଗୁଡ଼ିକର ସମାଧାନହୋଇ ପାରୁନାହିଁ। ବିଏସଏନଏଲ କାର୍ଯ୍ୟାଳୟ ଟିର ରକ୍ଷଣାବେକ୍ଷଣ ଅଭାବରୁ ଏହାର ଅବସ୍ଥା ଶୋଚନୀୟ ହୋଇ ପଡ଼ିଥିବାରୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏହାର ମରାମତି ପାଇଁ ତତ୍ପରତା ପ୍ରକାଶ କରିବାକୁ ଅଭିଯୋଗ ହେଉଛି। ଖଣ୍ଡପଡା ଅଞ୍ଚଳର ସମସ୍ତ ସରକାରୀ କାର୍ଯ୍ୟାଳୟ, ମହା ବିଦ୍ୟାଳୟ ଏବଂ ଜାତୀୟ କରଣ ବ୍ୟାଙ୍କ ଶାଖା ଗୁଡ଼ିକ ବିଏସଏନଏଲର ବ୍ରଡବ୍ୟାଣ୍ଡ ସେବା ଉପରେ ସମ୍ପୂର୍ଣ୍ଣ ନିର୍ଭର କରୁଥିବା ବେଳେ ଅଧିକାଂଶ ସମୟରେ ନେଟୱାର୍କ ଫେଲ୍ ଯୋଗୁଁ ସରକାରୀ କାର୍ଯ୍ୟାଳୟ ଏବଂ ବ୍ୟାଙ୍କ୍ ଶାଖା ଗୁଡ଼ିକ ର କାର୍ଯ୍ୟ ରେ ବାଧା ସୃଷ୍ଟି ହେବାସହିତ କାର୍ଯ୍ୟାଳୟ ଗୁଡ଼ିକ ରେ ଅଚଳାବସ୍ଥା ଦେଖା ଯାଉଛି। ଏପରିକି ବିଭିନ୍ନ ସମୟରେ ଜରୁରୀକାଳୀନ ପରିସ୍ଥିତି ରେ ଇଣ୍ଟରନେଟ ସେବା ବ୍ୟାହତ ଯୋଗୁଁ ଅଞ୍ଚଳ ବାସୀ କ୍ଷୋଭ ପ୍ରକାଶ କରୁଛନ୍ତି। ଅନ୍ୟ ପକ୍ଷରେ ବିଦ୍ୟୁତ୍ କାଟ ସମୟରେ ଖଣ୍ଡପଡ଼ା ଅଞ୍ଚଳରେ ବିଏସଏନଏଲ ସେବା ସମ୍ପୂର୍ଣ୍ଣ ଭାବେ ଠପ୍ ହୋଇଯାଉଛି। ଏଭଳି ଅବସ୍ଥା ଯୋଗୁଁ ବେଳ କୁ ବେଳ ଉପଭୋକ୍ତା ଙ୍କ ସଂଖ୍ୟା କମିବାରେ ଲାଗିଛି। ପ୍ରକାଶଥାଉକୀ ଉକ୍ତ କାର୍ଯ୍ୟାଳୟ ରେ ମାତ୍ର ୨୦୦୦ଟଙ୍କା ବେତନ ରେ ଜଗୁଆଳି ନିତ୍ୟାନନ୍ଦ ପଣ୍ଡା ଦିନରାତି କାର୍ଯ୍ୟ କରୁଥିବାରୁ ଅସନ୍ତୋଷ ପ୍ରକାଶ କରିଛନ୍ତି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଉକ୍ତ ବିଏସଏନଏଲ କାର୍ଯ୍ୟାଳୟ ର ଉପରୋକ୍ତ ସମସ୍ତ ସମସ୍ୟା ଗୁଡ଼ିକର ସମାଧାନ ଯୁଦ୍ଧକାଳୀନ ଭିତ୍ତିରେ କରିବା ପାଇଁ ଅଞ୍ଚଳ ବାସୀ, ବିଭିନ୍ନ ସରକାରୀ କାର୍ଯ୍ୟାଳୟ ଏବଂ ବ୍ୟାଙ୍କ୍ ଶାଖା ଅଧିକାରୀ ମାନେ ଦାବୀ କରୁଛନ୍ତି।