26-Aug-2023

ନୟାଗଡ଼,(ପ୍ରଦୀପ କୁମାର ପଣ୍ଡା): ଗ୍ରାମାଞ୍ଚଳରେ ରାସ୍ତା ଘାଟର ଉନ୍ନତିକରଣ, ନୂତନ ପୋଖରୀ ଖନନ, ପୋଖରୀରୁ ପଙ୍କ ଉଦ୍ଧାର ସହ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ନିମନ୍ତେ କେନ୍ଦ୍ର ସରକାର ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ଜରିଆରେ ଖଣ୍ଡପଡ଼ା ବ୍ଲକ ପ୍ରଶାସନକୁ କୋଟି କୋଟି ଟଙ୍କାର ଅନୁଦାନ ଅର୍ଥ ଯୋଗାଇ ଦେଉଛନ୍ତି। ମାତ୍ର ଵ୍ଲକ ପ୍ରଶାସନ ଉଦାସୀନତାର ସୁଯୋଗ ନେଇ କେତେକ ସ୍ଥାନରେ ଆବଶ୍ୟକତା ନଥାଈ ମଧ୍ୟ ଲକ୍ଷଲକ୍ଷ ଟଙ୍କା ବ୍ୟୟରେ ରାସ୍ତା ନିର୍ମାଣ କରାଯାଉଥିବା ଅଭିଯୋଗ ହେଉଛି। ଫଳରେ ଅନୁଦାନ ଅର୍ଥ ପାଣିରେ ପଡ଼ିବା ସାର ହେବାସହ ମନରେଗା ଯୋଜନା କିଭଳି ବାଟ ହୁଡୁଛି ତାହା ଖଣ୍ଡପଡ଼ା ବ୍ଲକର ଶାଳଝରିଆ ପଞ୍ଚାୟତ ଅଧୀନ କୁଞ୍ଜବିହାରୀପୁର ଗ୍ରାମର ଗ୍ରାମ୍ୟ ଉନ୍ନୟନ ବିଭାଗ ରାସ୍ତା ଠାରୁ ଧାନ ଚାଷଜମି ଦେଇ ଜାମୁଡିଆକୁ ସଂଯୋଗ କରୁଥିବା ରାସ୍ତା କାର୍ଯ୍ୟରେ ଦେଖିବାକୁ ମିଳେ। ଉକ୍ତ ରାସ୍ତାର ସମ୍ମୁଖ ଭାଗ ଓ ପାର୍ଶ୍ଵରେ କେନାଲ ଥିବା ବେଳେ ନିକଟସ୍ଥ ଚାଷ ଜମିରୁ ଜେସିଵି ଓ ଟ୍ରାକ୍ଟର ଯୋଗେ କିଛି ପରିମାଣର ମାଟି ଉଠାଯାଇ ରାସ୍ତାରେ‌ ପକାଯାଇଥିବା ଜଣାପଡିଛି। ରାସ୍ତାର ସମ୍ମୁଖ ଭାଗରେ ଲଗାଯାଇଥିବା ସୂଚନା ଫଳକରେ  କାର୍ଯ୍ୟ ଆରମ୍ଭ ଓ ଶେଷ ତାରିଖ ସଂପର୍କରେ କୋୖଣସି ସୂଚନା ଦିଆଯାଇନଥିବା ବେଳେ ରାସ୍ତା ନିର୍ମାଣ ବାବଦରେ ୧୦ ଲକ୍ଷ ୨୪ ହଜାର ୩୭୦ ଟଙ୍କା ଖର୍ଚ୍ଚ ହେବ ବୋଲି ଦର୍ଶାଯାଇଛି। ଆବଶ୍ୟକତା ନଥାଇ ମଧ୍ୟ କାହା ସ୍ୱାର୍ଥରେ ଓ କାହା ନିର୍ଦ୍ଦେଶରେ ଉକ୍ତ ରାସ୍ତା ନିର୍ମାଣ ନିମନ୍ତେ ଅନୁଦାନ ଅର୍ଥ ମଞ୍ଜୁର କରାଗଲା ବୋଲି ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି ହୋଇଛି। ଗ୍ରାମବାସୀଙ୍କୁ ଅନ୍ଧାରରେ ରଖି ସ୍ଥାନୀୟ ଅଞ୍ଚଳର ଜବକାର୍ଡଧାରୀଙ୍କୁ କାର୍ଯ୍ୟରେ ନିୟୋଜିତ ନକରି ରାସ୍ତା ନିର୍ମାଣ ହୋଇଥିବା ଅଭିଯୋଗ ହେଉଛି। ମନରେଗା ଯୋଜନାରେ ରାସ୍ତା ନିର୍ମାଣରେ ହୋଇଥିବା ଦୁର୍ନୀତିର ଉଚ୍ଚସ୍ତରୀୟ ତଦନ୍ତ ସହ କାର୍ଯ୍ୟାନୁଷ୍ଠାନ ନିମନ୍ତେ ଜିଲ୍ଲା ପ୍ରଶାସନ ଓ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହେଉଛି।