05-Aug-2023

ବରଗଡ଼:-ପୂର୍ବତନ ମନ୍ତ୍ରୀ ତଥା ବ୍ରାହ୍ମଣ ସମାଜ ସୋହେଲାର ସଭାପତି ଶ୍ରୀମାନ ପ୍ରକାଶ ଚନ୍ଦ୍ର ଦେବତାଙ୍କ ନିର୍ଦ୍ଦେଶକ୍ରମେ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀ ସୋହେଲାର ଜରିଆରେ ଓଡ଼ିଶାର ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟରେ ଶ୍ରୀମାନ ପ୍ରମୋଦ ଦେବତାଙ୍କ ନେତୃତ୍ୱରେ ଏକ ଦାବୀ ପତ୍ର ପ୍ରଦାନ କରାଯାଇଛି। ବଲାଙ୍ଗିର ଜିଲ୍ଲା ପାଟଣାଗଡ ସଦର ସ୍ଥିତ ଏକ ଛକ ଠାରେ ଭଗବାନ ପର୍ଶୁରାମଙ୍କ ଏକ ଫଟୋ ଚିତ୍ର ବହୁଦିନରୁ ସ୍ଥାପନ ହେବା ସାଙ୍ଗକୁ ନିତି ପୂଜା ପାଇ ଆସୁଥିଲେ।ଏପରିକି ଏହି ଛକ ପର୍ଶୁରାମ ଛକ ବୋଲି ପ୍ରାୟ ସମସ୍ତେ ଜାଣନ୍ତି।ହେଲେ ଅତ୍ୟନ୍ତ କ୍ଷୋଭର ବିଷୟ ଏହି ଯେ,ଗତ ତା ୧୭.୦୭.୨୦୨୩ରିଖ ଦିନ ଉପରୋକ୍ତ ସ୍ଥାନରେ ଅଜାଣତରେ ପ୍ରବାଦ ପୁରୁଷ ସ୍ୱର୍ଗତ ବିଜୁ ପଟ୍ଟନାୟକଙ୍କ ଏକ ପ୍ରତିମୂର୍ତ୍ତୀ ସ୍ଥାପନ କରାଯାଇ ଭଗବାନ ବୀର ପର୍ଶୁରାମଙ୍କ ଆସ୍ଥାନ,ଫଟୋଚିତ୍ର ଏପରିକି ଧ୍ୱଜା ଇତ୍ୟାଦି କୁ ଅତି ନିଷ୍ଠୁର ତାର ସହ ଫୋପାଡି ଦିଆଯାଇଥିଲା।ଏଭଳି ଅମାନବୀୟ କାର୍ଯ୍ୟ ଅତ୍ୟନ୍ତ ନିନ୍ଦନୀୟ ଓ ଦୁଃଖଦାୟକ ମଧ୍ୟ।ଏହା ହିନ୍ଦୁ ମାନଙ୍କ ଆସ୍ଥା ଓ ବିଶ୍ୱାସ ପ୍ରତି ଏକ ପ୍ରକାର ଚ୍ୟାଲେଞ୍ଜ ସଦୃଶ।ଓଡ଼ିଶାର ବରପୁତ୍ର ପ୍ରବାଦ ପୁରୁଷ ସ୍ୱର୍ଗତ ବିଜୁ ପଟ୍ଟନାୟକ ସାରା ଓଡ଼ିଶା କଣ ଭାରତ ବର୍ଷର ନମସ୍ୟ କହିଲେ ଅତ୍ୟୁକ୍ତି ହେବନାହିଁ।ସେଭଳି ମହାନ ବ୍ୟକ୍ତିତ୍ୱଙ୍କ ପ୍ରତିମୂର୍ତ୍ତୀକୁ ଏକ ବିବାଦୀୟ ସ୍ଥାନରେ ସ୍ଥାପିତ କରିବା କେବଳ ବୀର ପର୍ଶୁରାମଙ୍କୁ ନୁହେଁ,ବରଂ ବିଜୁ ବାବୁଙ୍କ ପ୍ରତି ମଧ୍ୟ ଘୋର ଅସମ୍ମାନ ସହ ଅପମାନ ଅଟେ।ଏହାକୁ ବ୍ରାହ୍ମଣ ସମାଜ ସୋହେଲା ତୀବ୍ର ନିନ୍ଦା କରିବା ସଙ୍ଗେସଙ୍ଗେ ଏହି ଘଟଣାକୁ ସୁଚାର କୁ ନେଇ ବିଜୁ ବାବୁଙ୍କ ପ୍ରତିମୂର୍ତ୍ତୀକୁ ଅନ୍ୟତ୍ର ଏକ ଉପଯୁକ୍ତ ସ୍ଥାନ ନିର୍ଣ୍ଣୟ କରି ସ୍ଥାନାନ୍ତରିତ କରିବା ସହ ଉକ୍ତ ସ୍ଥାନରେ ପ୍ରଭୁ ପର୍ଶୁରାମଙ୍କ ଏକ ପ୍ରତିମୂର୍ତ୍ତୀ ସ୍ଥାପନ କରାଯାଉ ବୋଲି ବ୍ରାହ୍ମଣ ସମାଜ ଦାବୀ କରୁଛି।ଦାବୀପତ୍ର ଦେବା ସମୟରେ ବ୍ରାହ୍ମଣ ସମାଜ ସୋହେଲା ର ସଦସ୍ଯ ଗିରିଜା ଶଙ୍କର ଆଚାର୍ଯ୍ୟ,ଗ୍ରିଜେଶ ଖାଡାଙ୍ଗା,ପଣ୍ଡିତ ମନବୋଧ ମିଶ୍ର,ଓକିଲ ସୁରେନ୍ଦ୍ର ନାଥ ପଣ୍ଡା,ବିରେନ୍ଦ୍ର ପଣ୍ଡା,ନିତିଶ ଚନ୍ଦ୍ର ଆଚାର୍ଯ୍ୟ,ବିନାୟକ ମିଶ୍ର,ଜୟନ୍ତ ଆଚାର୍ଯ୍ୟ,ସୁଶାନ୍ତ ପାଣିଗ୍ରାହୀ ଏବଂ ଓକିଲ ପ୍ରଫୁଲ୍ଲ ମିଶ୍ର ଙ୍କ ସମେତ ଆକାଶ ପଣ୍ଡା,ରାଜେନ୍ଦ୍ର ଦେବତା,ଅମିଲାଲ ଷଡ଼ଙ୍ଗୀ ,ବୁଲୁ ଆଚାର୍ଯ୍ୟ ପ୍ରମୁଖ ଉପସ୍ଥିତ ଥିଲେ।