04-Aug-2023

ବଲାଙ୍ଗିର(ଦେବାଶିଷ ବହିଦାର) - ରେଳ ଉପଭୋକ୍ତ ସଂଘର କାର୍ଯ୍ୟକାରିଣୀ ବୈଠକ ସଭାପତି ପ୍ରଫେସର ତରୁଣ କୁମାର ମିଶ୍ରଙ୍କ ସଭାପତିତ୍ୱରେ ମାଲପଡା  ଠାରେ ଅନୁଷ୍ଠିତ ହୋଇଯାଇଛି । ସଭା ପ୍ରାରମ୍ଭରୁ ଦିବଂଗତ ସଭ୍ୟ ଅଚ୍ୟୁତାନନ୍ଦ ଉଦ୍‌ଗାତାଙ୍କ ଆତ୍ମାର ସଦ୍‌ଗତି ନିମନ୍ତେ ୨ ମିନିଟ ନିରବ ପ୍ରାର୍ଥନା କରାଯାଇଥିଲା । ସଂପାଦକ ଦିବାକର ହୋତା ଗତ ସଭାର ବିବରଣୀ ପାଠ କରିଥିଲେ । କୋଷାଧ୍ୟକ୍ଷ ଅଶୋକ ଚାନ୍ଦ ଆୟବ୍ୟୟର ବିବରଣୀ ପାଠ କରିଥିଲେ । ନୂତନ ସଭ୍ୟ ଭାବରେ ନବ କୁମାର ମିଶ୍ର ଏବଂ ଲୋକନାଥ କର ଙ୍କୁ ଗ୍ରହଣ କରାଯାଇଥିଲା । ସଭାପତି ହିତେଶ କୁମାର ସାହୁଙ୍କୁ ଯୁଗ୍ମ ସଂପାଦକ ଓ ସୁରେନ୍ଦ୍ର ନେଗୀଙ୍କୁ କାର୍ଯ୍ୟକାରିଣୀ ସଭ୍ୟ ରୂପେ ଗ୍ରହଣ କରାଗଲା ବୋଲି ଘୋଷଣା କରିଥିଲେ ।

ଉକ୍ତ ବୈଠକରେ ବଲାଙ୍ଗିର ଷ୍ଟେସନରେ ରକ୍ଷଣାବେକ୍ଷଣର ଅଭାବ, ପିଆଇଟି ଲାଇନ ନ ଥିବା, ଗାଡି ଧୋଇବା ପାଇଁ ବ୍ୟବସ୍ଥା ନ ଥିଲା, ସୀଧାସଳଖ ଦିଲ୍ଲୀ ବା ପ୍ରୟାଗରାଜ କୁ ଟ୍ରେନ ଚଳାଚଳ ହୋଇ ପାରିବ ନାହିଁ ବୋଲି ଜେନେରାଲ ମ୍ୟାନେଜରଙ୍କ ଠାରୁ ଚିଠି ପାଇଲା ପରେ ଅସନ୍ତୋଷ ବୃଦ୍ଧି ପାଇଛି ।  ଏହା ଏକ ପୁରାତନ ଷ୍ଟେସନ ହୋଇଥିଲେ ମଧ୍ୟ ଉପଭୋକ୍ତାମାନେ ନ୍ୟୁନତମ ସୁବିଧା ପାଇ ପାରୁନାହାନ୍ତି । ବନ୍ଦେ ଭାରତ ଯୋଜନାରେ ଅନ୍ୟ ଷ୍ଟେସନ ଠାରୁ ଜିଲ୍ଲା ମହକୁମା ଷ୍ଟେସନକୁ କମ୍ ଅନୁଦାନ ମିଳିବା, ଲିଷ୍ଟ କାମକୁ ତ୍ୱରାନ୍ୱିତ କରିବା, ର‌୍ୟାମ୍ପ ଓ ଦ୍ୱିତୀୟ ପାଦଚଳା ବ୍ରିଜକୁ ତୁରନ୍ତ କାର୍ଯ୍ୟକାରୀ କରିବା, ମନ୍ଥରଗତିରେ ଚାଲୁଥିବା ବଲାଙ୍ଗିର ଖୋର୍ଦ୍ଧା ରେଳପଥର କାମକୁ ତ୍ୱରାନ୍ୱିତ କରି ଏ ବର୍ଷ ସୋନପୁର କୁ ଟ୍ରେନ ଗଡାଇବା,

ଯେଉଁ ଟ୍ରେନରେ ଅସମ୍ଭବ ଭିଡ ହେଉଛନ୍ତି ସେଥିରେ ସାଧାରଣ ବଗି ଲଗାଇବା, ବରିଷ୍ଠ ନାଗରିକଙ୍କୁ ସୁବିଧା ତୁରନ୍ତ ପ୍ରଦାନ କରିବା, ଶାରରୀକ ଅକ୍ଷମ ବ୍ୟକ୍ତିମାନଙ୍କୁ ଜିଲ୍ଲା ମହକୁମାରେ ପାସ ପ୍ରଦାନ କରିବା, ରେଳ ଉପଭୋକ୍ତ ସଂଘ ତରଫରୁ ଜଣକୁ ଡିଆରୟୁସିସି ର ସଭ୍ୟ କରିବା ଆଦି ଆଲୋଚନାଭୁକ୍ତ ହୋଇଥିଲା । ସମ୍ବଲପୁର - ପୁରୀ ଏକ୍ସପ୍ରେସକୁ ବଲାଙ୍ଗିର ପର୍ଯ୍ୟନ୍ତ ସଂପ୍ରସାରଣ ନ କଲେ ଆଗାମୀ ଦିନରେ ଆନ୍ଦୋଳନ ହେବ ବୋଲି ସଭ୍ୟମାନେ ମତ ଦେଇଥିଲେ । ଉକ୍ତ ସଭାରେ ଉପ-ସଭାପତି ଅଶୋକ ମିଶ୍ର, ମହେଶ୍ୱର ସାହୁ, ବିକ୍ରମାନନ୍ଦ ବହିଦାର, ପ୍ରଭାକର ମିଶ୍ର, ମନୋରଂଜନ ପୁରୋହିତ, ଗୋପବନ୍ଧୁ ପୁରୋହିତ, ଋତୁରାଜ ସିଂହ, ହିତେଶ ସାହୁ, ନିତ୍ୟାନନ୍ଦ ମିଶ୍ର, ପର୍ଶୁରାମ ନାୟକ, ଯୁଧିଷ୍ଟିର ମିଶ୍ର ଓ ଛବିଲାଲ ବେହେରା ପ୍ରମୁଖ ଉପସ୍ଥିତ ରହି ନିଜର ସୁଚିନ୍ତିତ ମତ ରଖିଥିଲେ ।