04-Aug-2023

ବଲାଙ୍ଗୀର(ପ୍ରେରଣା ଖବର)- ଲୋୟର ସୁକତେଲ ପ୍ରକଳ୍ପ ହେଲାପରେ ଜିଲ୍ଲାରେ ଖୁସିର ମାହୋଲ ସୃଷ୍ଟିହେବ ବୋଲି ଆଶା କରାଯାଉଥିଲା । କିନ୍ତୁ ଏବେ ପ୍ରକଲ୍ପରେ ପାଣି ରହିଲାପରେ ଅସୁବିଧା ଆରମ୍ଭ ହୋଇଛି । ମୁଖ୍ୟତଃ ପ୍ରଶାସନର ଅଦୂରଦର୍ଶିତାର ପରିଣାମ ସ୍ୱରୂପ ଲୋଇସିଂହା ବ୍ଲକର ରତାଖଣ୍ଡି ଓ ରେଙ୍ଗାଲି ପଞ୍ଚାୟତର ୧୨ଖଣ୍ଡ ଗ୍ରାମ ଗତ ୭ଦିନ ହେଲା ଅନ୍ଧାରରେ ରହିଛି । ସୁକତେଲ ପ୍ରକଲ୍ପ ଦେଇ ଚୁଡାପାଲିରୁ ଏହି ଅଞ୍ଚଳକୁ ୧୧କେଭି ବିଦ୍ୟୁତତାର ଯାଇଥିଲା । ସୁକତେଲ ପ୍ରକଲ୍ପରେ ପାଣ ଭର୍ତ୍ତି ହୋଇଯିବା ପରେ ସେହି ଅଞ୍ଚଳରେ ଥିବା ବିଦ୍ୟୁତଖୁଣ୍ଟଗୁଡିକ ମଧ୍ୟ ପାଣିରେ ବୁଡିଯାଇଛି । ତେଣୁ ପ୍ରକଲ୍ପର ଉପରମୁଣ୍ଡରେ ଥିବା ୧୨ଖଣ୍ଡ ଗ୍ରାମର ଲୋକ ଅସୁବିଧାରେ ପଡିଛନ୍ତି । ଗତ ୭ଦିନ ହେଲା ଏହି ଅଞ୍ଚଳକୁ ବିଦ୍ୟୁତସଂଯୋଗ ନଥିବାରୁ ଜନଅସନ୍ତୋଷ ବଢିଛି । ଏହି ଅଞ୍ଚଳର ଲୋକ ଅନେକଥର ବିଦ୍ୟୁତ ବିଭାଗକୁ ଯୋଗାଯୋଗ କରିଥିଲେ ହେଁ ତାହା ସମ୍ଭବ ହୋଇପାରିନଥିଲା । ଫଳରେ ଆଜି ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ ସେହି ଅଞ୍ଚଳର ହଜାର ସଂଖ୍ୟାରେ ଲୋକଙ୍କ ସହିତ ଆଜି ଜିଲ୍ଲାପାଳ କାର୍ଯ୍ୟାଳୟ ଘେରାଉ କରିବା ସହିତ  ଜିଲ୍ଲାପ୍ରଶାସନକୁ ଏକ ଦାବିପତ୍ର  ପ୍ରଦାନ କରିଛନ୍ତି । ଆସନ୍ତା ୨୪ଘଣ୍ଟା ମଧ୍ୟରେ ରେଙ୍ଗାଲି ଓ ରତାଖଣ୍ଡି ଗ୍ରାମପଞ୍ଚାୟତ ଅଞ୍ଚଳରେ ବିତ୍ୟୁତ ସଂଯୋଗ ନହେଲେ ଆଗାମୀ ଦିନରେ ଆନ୍ଦୋଳନକୁ ତୀବ୍ର କରାଯିବ ବୋଲି ବିଧାୟକ ଡ.ମହାଲିଙ୍ଗ ପ୍ରଶାସନକୁ ଚେତାବନୀ ଦେଇଛନ୍ତି । ପ୍ରକାଶ୍ୟ ଯେ, ବହୁବର୍ଷ ପୂର୍ବରୁ ଲୋଇସିଂହା ବ୍ଲକର ରତାଖଣ୍ଡି ଓ ରେଙ୍ଗାଲି ପଞ୍ଚାୟତ ଅଞ୍ଚଳକୁ ବଲାଙ୍ଗୀର ସଦରବ୍ଲକ ଅନ୍ତର୍ଗତ ଚୁଡାପାଲି ସେକ୍ସନର ବାରପୁଡୁଗିଆ ଗ୍ରୀଡରୁ ୧୧କେଭି ତାରରେ ବିଦ୍ୟୁତ ସଂଯୋଗ ଦିଆଯାଇଥିଲା । ସେହି ୧୧କେଭି ବିଦ୍ୟୁତତାର ସୁକତେଲ ନଦୀ ଡେଇଁ ଯାଇଥିଲା । ଏବେ ସୁକତେଲ ପ୍ରକଲ୍ପରେ ପ୍ରାୟ ୧୮ମିଟର ପାଣି ରହିବା ପରେ ସେହିସବୁ ବିଦ୍ୟୁତଖୁଣ୍ଟ ବୁଡିଯାଇଛି । ସବୁଦିନ ପାଇଁ ଏହି ବିଦ୍ୟୁତ ସଂଯୋଗ ବିଚ୍ଛିନ୍ନ ହୋଇପଡିଛି । ଗତ ୭ଦିନ ହେଲା ଏହି ଅଞ୍ଚଳକୁ ବିଦ୍ୟୁତବିଭାଗ ବିଦ୍ୟୁତ ବିଚ୍ଛିନ୍ନ କରିଛି । ଫଳରେ ଏହି ଅଞ୍ଚଳର ରେଙ୍ଗାଲି, ତାଲଜୁରି, ବାଘ ଡଙ୍ଗୁରି,କ ପିଲବାହାଲ, ରତାଖଣ୍ଡି ଇତ୍ୟାଦି ୧୨ଖଣ୍ଡ ଗ୍ରାମ ଅନ୍ଧାରରେ ରହିଛି । ଏଥିପାଇଁ ଆଜି ବିଧାୟକ ଡ.ମୁକେଶ ମହାଲିଙ୍ଗ ନିଜେ ଆନ୍ଦୋଳନକୁ ଓହ୍ଲାଇଥିଲେ । ବିଧାୟକ ଡ.ମହାଲିଙ୍ଗ ଏହି ଘଟଣା ପାଇଁ ବଲାଙ୍ଗୀର ଜିଲ୍ଲାପ୍ରଶାସନକୁ ଦାୟୀ କରିଛନ୍ତି । ଏବେ ପାଟଣାଗଡ କିମ୍ବା ଲୋଇସିଂହା ପଟୁ ବିଦ୍ୟୁତତାର ଟଣାଯାଇ ବିଦ୍ୟୁତ ସଂଯୋଗ ଦେବାକୁ ଦାବି କରାଯାଇଛି । ଯେତେବେଳେ ଡେମରେ ପାଣି ରଖାଯିବାର ପ୍ରସ୍ତାବ ହେଲା ସେତେବେଳେ ପ୍ରଶାସନ ଏହାକୁ ନଜରରେ ରଖି ଏହାର ବିକଲ୍ପ ବ୍ୟବସ୍ଥା କରାଇବାର ଆବଶ୍ୟକତା ଥିଲା । କିନ୍ତୁ ପ୍ରଶାସନ ଜନସାଧାରଣଙ୍କ ସମସ୍ୟାକୁ ଅଣଦେଖା କରି ମନମୁଖି କାରବାର କରୁଥିବା ବିଧାୟକ ଅଭିଯୋଗ କରିଛନ୍ତି । ଆଜି ବିଧାୟକ ଡ.ମହାଲିଙ୍କଙ୍କ ସହ ରତାଖଣ୍ଡି ସରପଞ୍ଚ ହିମାଞ୍ଚଳ ମେହେର, କପିଲବାହାଲର ରଶ୍ମିରଂଜନ ରାଉତ, ରେଙ୍ଗାଲିର ଦୀନମିତ୍ର ନାଗ, ଆତ୍ତତ୍ରାଣ ଦାସ, ଭକ୍ତ ବରିହା, ବାଘଡୁଙ୍ଗୁରିର ରତନ ବିଶି, କୁମାର ପଟ୍ଟନାୟକ, ସୁରଥ ଭୋଇ, ଲକ୍ଷ୍ମଣ ପଟେଲ, ତାଲଜୁରିର ପ୍ରଶାନ୍ତ ସାହୁ, ସୁବଲ ବିଶ୍ୱାଲ ପ୍ରମୁଖ ଅତିରିକ୍ତ ଜିଲ୍ଲାପାଳ ଲମ୍ବୋଦର ଧରୁଆଙ୍କୁ ଭେଟି ଆଲୋଚନା କରିବା ସହିତ ଦାବିପତ୍ର ପ୍ରଦାନ କରିଥିଲେ । ସେପଟେ ଏହି ଘଟଣାକୁ ନେଇ ଖୋଲତାଡ କରିବାରୁ ଜଣାଯାଇଛି ଯେ, ସୁକତେଲ ଡେମରେ ପାଣି ରହିଲାପରେ ବିଦ୍ୟୁତ ବିଭାଗ ପ୍ରଥମେ ବିଦ୍ୟୁତ ସଂଯୋଗ କାଟିଦେଇ ପାଟଣାଗଡ କିମ୍ବା ଲୋଇସିଂହା ପଟୁ ତାର ଟାଣିବାପାଇଁ ଅଟକଳ ତିଆରି କରୁଥିବା ଜଣାଯାଇଛି । ଫଳରେ ପ୍ରଶାସନ ବିବାହ ବେଳେ ବାଇଗଣ ରୋପିବା ଭଳି କାର୍ଯ୍ୟକଳାପ କରୁଥିବା ଅଭିଯୋଗ ଉଠିଛି । ଏହାକୁ ନେଇ ଜନଅସନ୍ତୋଷ ବଢୁଛି । ଏନେଇ ଅତିରିକ୍ତ ଜିଲ୍ଲାପାଳ କହିଛନ୍ତି ଯେ,ଏବେ ପ୍ରଶାସନ ହଠାତ କୌଣସି ପ୍ରତିଶୃତି ଦେଇପାରୁନି । କିନ୍ତୁ ଲୋକଙ୍କ ସୁବିଧା କରାଇବାକୁ ପ୍ରଶାସନ ଉଦ୍ୟମ କରୁଛି ବୋଲି କହିଛନ୍ତି । ଆଜିର ଏହି ଆଲୋଚନା ବେଳେ ଅତିରିକ୍ତ ଜିଲ୍ଲାପାଳଙ୍କ ସହିତ ଉପଜିଲ୍ଲାପାଳ କୁମାର ନାଗଭୂଷଣ, ବଲାଙ୍ଗୀର ତହସିଲଦାର ଡ.ପୁଷ୍ପାଞ୍ଜଳି ପଣ୍ଡା, ସଦର ଏସଡିପି ତୁଫାନ ବାଗ, ରିଜର୍ଭ ସଜେଣ୍ଟ କୁମୁଦ ସେଠ, ସଦର ଆଇଆଇସି ଶ୍ରୀକାନ୍ତ ସାହୁ ପ୍ରମୁଖ ଉପସ୍ଥିତ ରହିଥିଲେ ।