18-Jul-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ଏବେ କଣ୍ଟାବାଞ୍ଜିର ବହୁଚର୍ଚ୍ଚିତ ନାବାଳକ ସ୍କୁଲ୍ ଛାତ୍ରଙ୍କୁ ହତ୍ୟା ଅଭିଯୋଗ ମାମଲାକୁ ଜିଆରପି ଉଦ୍ଧାର କରି କାହାକୁ ନ ଜଣାଇ ଅଜଣା ଶବ ବୋଲି ସେହିଦିନ ତରବରିଆ ଭାବେ ବିନା ବ୍ୟବଚ୍ଛେଦରେ ପୋତିଦେବା, ଥାନାରେ ନିଖୋଜ ଏତଲା ସତ୍ତ୍ୱେ ପୁଲିସ୍ ଘଟଣାକୁ ଖାମଖିଆଲି ଭାବେ ନେଇ କଣ୍ଟାବାଞ୍ଜି ପରି ଏକ ଛୋଟସହରର ଲୋକଙ୍କ ଚର୍ଚ୍ଚା ପ୍ରତି କାନ ନଦେଇ ବା ସବୁଦିଗକୁ ଆଖିବୁଜି ଦେଇ ଅଥବା ଜାଣିଶୁଣି କୌଣସି କାରଣରୁ ବା କାହାଚାପରେ ଉପଯୁକ୍ତ ତଦନ୍ତ ନକରିବା , ଏବେ ପରିବାର ପକ୍ଷରୁ ଗଣମାଧ୍ୟମରେ ହତ୍ୟାଅଭିଯୋଗ ଏବଂ ଆପ୍ ର ସାମ୍ବାଦିକ ସମ୍ମିଳନୀରେ ଦାବି ସତ୍ତ୍ୱେ ଏହାପଛର କାରଣକୁ ଏତଲା ଦେଲାବେଳେ ଲୁଚାଇଥିବା ପରିବାରର ଲୋକଙ୍କ ସମେତ କଥା ଉଠୁଥିବା ସହପାଠିନୀ ଛାତ୍ରୀ , ମୃତଛାତ୍ର ଓ ତା' ବାପାଙ୍କୁ ଡକାଇନେଇ ମାଡମାରି, ମୋବାଇଲ୍ ଲୁଟିରଖି , ୩ ଲକ୍ଷ ଟଙ୍କା ଦେବାକୁ ଚୁକ୍ତିନାମା ଲେଖାଇ ନେବା ଇତ୍ୟାଦି ଘଟଣାର କାରଣ ଓ ସମ୍ପୃକ୍ତ ବ୍ୟକ୍ତିମାନଙ୍କ ସହ କୁହାଯାଉଥିବା ହୋଟେଲର ମାଲିକ ଓ କର୍ମଚାରୀଙ୍କ ସମେତ ଶବ ବ୍ୟବଚ୍ଛେଦକାରୀ ଡାକ୍ତର ଓ  ଜିଆରପି ଅଧିକାରୀ ପ୍ରମୁଖଙ୍କୁ ଥାନାକୁ ଆଣି ତଦନ୍ତର ପରିସରଭୁକ୍ତ ନ କରିବା, ଓଲଟି ଭିନ୍ନ ଭିନ୍ନ ସଫେଇଦେବା ଇତ୍ୟାଦି ଏହି ମାମଲାଟିକୁ ଆହୁରି ଜଟିଳ ଓ ରହସ୍ୟମୟ କରିପକାଇଛି । 

ଶବଉଦ୍ଧାର ସମୟରେ ଏପରିକି ସ୍ଥାନୀୟ ସାମ୍ବାଦିକଙ୍କ ମଧ୍ୟରେ 'ନେତାମାନେ ମାରିଦେଲେ' ବୋଲି ଯେଉଁ ଚାପାଗୁଞ୍ଜନ ଶୁଣିବାକୁ ମିଳିଥିଲା, ସେ ନେତା କିଏ ବୋଲି ଲୋକଙ୍କ ମଧ୍ୟରେ ସନ୍ଦେହ ସୃଷ୍ଟି ହୋଇଛି ।

 ଆହୁରି ମଧ୍ୟ, ଇନଷ୍ଟାଗ୍ରାମ୍ ଫଲୋଅର୍ ବଢାଇବାକୁ ୧୧ ଲକ୍ଷ ଟଙ୍କା ମୃତ ନାବାଳକଟିକୁ ଦେଇଥିବା ଝିଅର ମେଡିସିନ୍ ଷ୍ଟୋର୍ ଦେଇଥିବା କାକା ଖବର ପ୍ରକାଶ ନ କରିବାକୁ ସାମ୍ବାଦିକଙ୍କୁ ଟଙ୍କା ବାଣ୍ଟିଥିବା ଶୁଣାକଥାର ସତ୍ୟତା କେତେ  ? ହୁଏତ ଏଇ କାରଣରୁ ଆରମ୍ଭରୁ ଅଦ୍ୟାବଧି କେତେକ ସ୍ଥାନୀୟ ସାମ୍ବାଦିକ ପୁଲିସ୍ ସପକ୍ଷରେ ପ୍ରାୟ ପକ୍ଷପାତ ଖବର ପ୍ରକାଶ କରି ସ୍ବର ବଦଳାଉଥିବା ଲକ୍ଷ୍ୟ କରାଯାଇ ଆସୁଛି  ?  ସେ ଜଣେ ମେଡିକାଲ ସମ୍ପର୍କିତ ବ୍ୟକ୍ତି ବା ବେପାରୀ ହୋଇଥିବାରୁ ପୋଷ୍ଟମର୍ଟମ୍ ରେ ହେରଫେର ନିମନ୍ତେ ହସ୍ତକ୍ଷେପ କରିଥିବା ମଧ୍ୟ ସମ୍ଭବ ।

ଏଣୁ ଏହି ସରକାର ଅମଳରେ ରାଜ୍ୟରେ ଘଟିଥିବା କେତେକ ବହୁଚର୍ଚ୍ଚିତ ଅପରାଧମାମଲାରେ କ୍ରାଇମବ୍ରାଞ୍ଚ୍ ତଦନ୍ତରେ ନାନାଦି ହଟଚମଟ ଯୋଗୁଁ ଏଇ ବିଭାଗଟି ଉପରେ ଆଉ ଲୋକଙ୍କର ଆସ୍ଥା ନଥିବାରୁ ଏଇ ସନ୍ଦିଗ୍ଧମାମଲାଟିର ଅନ୍ୟକୌଣସି ବିଚାରବିଭାଗୀୟ ତଦନ୍ତ ବା ସିବିଆଇ ତଦନ୍ତ ନିମନ୍ତେ ଅଦାଲତରେ ଆବେଦନର ଆବଶ୍ୟକତା ରହିଥିବା ଲୋକେ ଆଲୋଚନା କରୁଥିବା ପ୍ରକାଶ । ସେହିପରି ଏ ସମ୍ପର୍କରେ ସ୍ଥାନୀୟ ଜିଆରପି ବା ଡାକ୍ତରଖାନା କର୍ତ୍ତୃପକ୍ଷଙ୍କ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇନାହିଁ ।