18-Jul-2023

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ): ଗତ କୋଭିଡ୍ କାଳରେ ଶିକ୍ଷାବିଭାଗ ସମେତ ଆଦିବାସୀକଲ୍ୟାଣ ଓ ସର୍ବଶିକ୍ଷା ଅଭିଯାନର ହଷ୍ଟେଲରେ ରହୁଥିବା ଅନ୍ତେବାସୀ ଛାତ୍ରଛାତ୍ରୀଙ୍କ ପାଇଁ ସରକାର ଛୁଟି ସତ୍ତ୍ବେ ମଧ୍ୟାହ୍ନଭୋଜନ ବାବଦକୁ ସେମାନଙ୍କ ଆକାଉଣ୍ଟ୍ ରେ ପାସ୍ ବୁକ୍ ରେ ଟଙ୍କା ଜମା କରିବାକୁ ନିର୍ଦ୍ଦେଶ ଦେଇଥିଲେ । କିନ୍ତୁ ଏହି ଟଙ୍କାକୁ ସେମାନଙ୍କ ଆକାଉଣ୍ଟ୍ ରେ ଦିଆ ନଯାଇ ନଗଦ ପ୍ରଦାନ ଆଳରେ ଅଧାଅଧି ବିଭାଗୀୟ ଅଧିକାରୀଙ୍କ ଦ୍ୱାରା ବାଟମାରଣା କରାଯାଇଥିବା ଅଭିଯୋଗ ପ୍ରକାଶ ପାଇଛି । 

ଏ ସମ୍ପର୍କରେ  ସୂଚନା ଆଇନବଳରେ ତଥ୍ୟ ମଗାଗଲେ , ସବୁ ସତ ଜଣାପଡିବ ବୋଲି କୁହାଯାଉଛି । ଏଥିରେ ତଳୁ ଉପରସ୍ତର ପର୍ଯ୍ୟନ୍ତ ସମସ୍ତେ ସମ୍ପୃକ୍ତ ରହିଥିବା ସନ୍ଦେହ କରାଯାଏ ।

ଉଲ୍ଲେଖନୀୟ ଯେ , ଗତ ୨୦୨୦ ମାର୍ଚ୍ଚ ୨୦ ତାରିଖରୁ କୋଭିଡ୍ ପାଇଁ ଉକ୍ତ ସ୍କୁଲ୍ ହଷ୍ଟେଲ ଗୁଡିକୁ ଛୁଟି କରିଦିଆଯାଇଥିଲା ।  କିନ୍ତୁ ସେହି ମାର୍ଚ୍ଚ ୨୫ ତାରିଖରୁ ସରକାର ଛୁଟି ଘୋଷଣା କଲେ । ସେ ଯା' ହେଉ , ସ୍କୁଲ୍ ଖୋଲିଲା ୨୦୨୨ ଅପ୍ରେଲ୍ ରେ । ଉକ୍ତ ସମୟରେ ହଷ୍ଟେଲର ୬ଷ୍ଠ , ୭ମ ଓ ୮ମ ଶ୍ରେଣୀର ଛାତ୍ରଛାତ୍ରୀମାନଙ୍କର ମଧ୍ୟାହ୍ନଭୋଜନ ବାବଦକୁ ସରକାର ଅର୍ଥ ପ୍ରଦାନ କରିଥିଲେ । ଯାହା ସେମାନଙ୍କ ଆକାଉଣ୍ଟ୍ ରେ ପକାଯାଇ ପାସ୍ ବୁକ୍ ଜରିଆରେ ପେମେଣ୍ଟ୍ କରାଯିବାକୁ ସରକାରୀ ଗାଇଡ୍ ଲାଇନ୍ ଥିବା କୁହାଯାଇଛି ।

କିନ୍ତୁ କେତେକ ବିଭାଗର ସ୍କୁଲ୍ ରେ ଏହାର ଅଧାଟଙ୍କା ବିଭିନ୍ନ ଆଳ ଦେଖାଇ ନଗଦ ଦିଆଯାଇଥିବା କହି ହଡପ କରାଯାଇଥିବା ଅଭିଯୋଗ ଏବେ ପ୍ରକାଶ ପାଇଛି । ଏଣୁ ଏହାର ସତ୍ୟାସତ୍ୟ ଜାଣିବା ନିମନ୍ତେ ପିଲାଙ୍କ ଆକୁଟାନ୍ ସରେ ନିଆଯାଇଥିବା ଦସ୍ତଖତର ଯାଞ୍ଚ କରାଯିବାକୁ ସରକାରଙ୍କର ଦୃଷ୍ଟିଆକର୍ଷଣ କରାଯାଉଛି ।

ଉଦାହରଣ ସ୍ୱରୂପ , ବଲାଙ୍ଗୀର ଜିଲ୍ଲା ଆଦିବାସୀ କଲ୍ୟାଣ ବିଭାଗ ଅଧୀନସ୍ଥ ଚୂଡାପାଲି ହାଇସ୍କୁଲର ମୋଟ ୬୦୦ ରୁ ପ୍ରାୟ ୫୦୦ ଛାତ୍ରଛାତ୍ରୀଙ୍କ ନିମନ୍ତେ ଆସିଥିବା ୫ ଲକ୍ଷ ୫୧ ହଜାର ଏମଡିଏମ ଟଙ୍କାରୁ ବାଁ ଡାହାଣ କରି ଦସ୍ତଖତ ଜାଲିଆତି କରାଯାଇ ପ୍ରାୟ ଅଢେଇ ଲକ୍ଷ ଟଙ୍କା ହଡପ କରାଯାଇଥିବା ଅଭିଯୋଗ ଚର୍ଚ୍ଚା ହେଉଛି । ଯଦିଓ ପ୍ରଧାନସେବକ କୁଶଳେଶ୍ବର ମିଶ୍ର ଓ ଡି ଡବ୍ଲୁ ଓ ଅଲେଖ ବିଶ୍ବାଳ ଏଭଳି ଅଭିଯୋଗକୁ ଅସ୍ବୀକାର କରନ୍ତି ।  ଆହୁରି ମଧ୍ୟ , ଏହି ବିଭାଗର ଜିଲ୍ଲାରେ ଥିବା ମୋଟ ୭ଟି ହାଇସ୍କୁଲ ଓ ୨୭ଟି ସେବାଶ୍ରମ / ଆଶ୍ରମ ଏବଂ ଜିଲ୍ଲାର ଉପରୋକ୍ତ ବିଭାଗର ଅନ୍ୟାନ୍ୟ ଆବାସିକ ଅନ୍ତେବାସୀଙ୍କର ଏଭଳି କୋଭିଡ୍ ମଧ୍ୟାହ୍ନଭୋଜନ ବାବଦ ଅର୍ଥର ଯାଞ୍ଚ୍ ଆବଶ୍ୟକ ବୋଲି ଜନମତ ପ୍ରକାଶ ପାଇଛି । ତଥାପି ଲୋକମାନେ ଏହାର ଏକ ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି ।

ଏହାପୂର୍ବରୁ ତୁରେକେଲା ବ୍ଲକ୍ ର କୁଇବାହାଲ ସର୍ବଶିକ୍ଷା ଅଭିଯାନ ଅଧୀନସ୍ଥ କେଜିବିଭି ଓ ଉଚ୍ଚ ପ୍ରାଥମିକ ସ୍କୁଲ୍ ରେ କେତେକ କମିଟି କର୍ମକର୍ତ୍ତାଙ୍କ ସହ ମିଶି ପ୍ରଧାନଶିକ୍ଷକ ମଧ୍ୟ ଛାତ୍ରଛାତ୍ରୀଙ୍କୁ ଘର ଘର ବୁଲି ଏହି ମଧ୍ୟାହ୍ନଭୋଜନ ବାବଦ ଅର୍ଥ ବଣ୍ଟନ କଲାବେଳେ ବ୍ୟାପକ ହେରଫେର କରାଯାଇଥିବା ଅଭିଯୋଗ ପ୍ରକାଶ ପାଇଥିଲା । ତାହାକୁ ମଧ୍ୟ ସ୍କୁଲ୍ କର୍ତ୍ତୃପକ୍ଷ ଅସ୍ବୀକାର କରିବା ସହିତ ବିଭାଗୀୟ ଅଧିକାରୀମାନେ ଦଫାରଫା କରିଦେଇଥିବା କୁହାଯାଉଛି ।

କେବଳ ବଲାଙ୍ଗୀର ଜିଲ୍ଲାରେ ଏହା କୋଟି କୋଟି ହେଇଥାଇପାରେ । ଏଣୁ ପଡୋଶୀ ସୁବର୍ଣ୍ଣପୁର , ନୂଆପଡା , କଳାହାଣ୍ଡି , ବରଗଡ , ବୌଦ୍ଧ ଓ ଅନ୍ୟାନ୍ୟ ଜିଲ୍ଲାର ଏହି ବାବଦ ଅର୍ଥର ଉପଯୋଗର ଯାଞ୍ଚ ମଧ୍ୟ ଆବଶ୍ୟକ ।