15-Jul-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ସଦ୍ୟଘଟିତ ଏକ ହତ୍ୟାକାଣ୍ଡର କାରଣ ପାଇଁ  ଗଣମାଧ୍ୟମରେ ଏକ ଚିନ୍ତାଜନକ ପ୍ରଶ୍ନ ଉଠିଛି: ବଲାଙ୍ଗୀରରେ ଅପରାଧ ବଢୁଛି କାହିଁକି  ?  ସେଇ ସମାନ ପ୍ରଶ୍ନ ବି ଉଠାଯାଇଆସୁଛି : ଏତେ ବେଶି ଦୁର୍ନୀତି ବଲାଙ୍ଗୀରରେ ହୁଏ  କାହିଁକି ? ସରକାରୀ ଉଦାସୀନତା ପାଇଁ ତଦନ୍ତ ଦିଗହରା  ନା  ରାଜନୈତିକ ସମ୍ପୃକ୍ତି  ବା  ପଲିଟିକାଲ୍ କନେକ୍ସନ୍  ?  

ସରକାରୀ ଉଦାସୀନତାର ଅର୍ଥ  ଉଚ୍ଚ ଅଧିକାରୀଙ୍କ ଘଣ୍ଟଘୋଡା ନୀତି  ।  ଏଥିପାଇଁ ତଦନ୍ତକୁ ବାଟବଣା କରିଦିଆଯାଉଥିବା ଅଭିଯୋଗ ହେଉଛି ।  ସେହିପରି  ପଲିଟିକାଲ୍ କନେକ୍ ସନ୍ ର ଅର୍ଥ ରାଜନେତା ବନାମ ନିର୍ବାଚିତ ଲୋକ ପ୍ରତିନିଧିଙ୍କ ହସ୍ତକ୍ଷେପ  ?

ଏହାର ସିଧାସଳଖ ବା ପ୍ରତ୍ୟେକ୍ଷ ପ୍ରମାଣ ନଥିଲେ ହେଁ , ଜିଲ୍ଲାବାସୀ ଏହା ଅନୁଭବ କରିଆସୁଛନ୍ତି ।

କିଛିଦିନ ତଳର ରାଜ୍ୟବ୍ୟାପି ଆଲୋଡନ ସୃଷ୍ଟି କରିଥିବା ଗ୍ରାମର ଯୁବତୀ ମମିତା ମେହେର ନୃଶଂସ ହତ୍ୟାକାଣ୍ଡ ସହିତ ଜେଲ୍ ଭିତରେ ବିଚାରାଧୀନ ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁର  ବିବଦମାନ ଆତ୍ମହତ୍ୟା ବା ହତ୍ୟା ଅଭିଯୋଗ ଓ ବହୁଚର୍ଚ୍ଚିତ  ପାଟଣାଗଡ ବ୍ଲକ୍ ଜେଇ ହତ୍ୟା ଅଭିଯୋଗ ଅଥବା ନକଲି ସାର୍ଟିଫିକେଟ୍ ମାମଲାଠାରୁ  କଣ୍ଟାବାଞ୍ଜି ଏସଡିପିଓଙ୍କ ଦାଦନସେଠଙ୍କ ଠାରୁ ଏକକୋଟି ପାଖାପାଖି ଟଙ୍କା ଜବତ କରି ଅଧା ହଡପ ଅଭିଯୋଗରେ ନିଲମ୍ବନ ଓ  ପାଟଣାଗଡ ପୁଲିସ୍ ର ଚାରିମାସ ପରେ ସାଢେ ଛଅଲକ୍ଷରୁ ଅଢେଇଲକ୍ଷ ଟଙ୍କା ଗାଏବ୍ ସନ୍ଦେହ ସହିତ ଏବର  ସାଂସଦଙ୍କ ନୋମିନୀ ରେଳବାଇ ଚାକିରୀ ଦେବାକୁ ଲକ୍ଷେଟଙ୍କା ଠକିନେଇ ଫେରାଇଦେବାର ବେଲପଡାଥାନାର  ସମାଧାନ ଘଟଣା ଇତ୍ୟାଦି ଘଟଣା ।

କେଉଁଠି ଖୋଦ୍ ଗୃହବିଭାଗର ରାଷ୍ଟ୍ରମନ୍ତ୍ରୀଙ୍କ ସମ୍ପୃକ୍ତି ଅଭିଯୋଗ ତ, କେଉଁଠି ଶାସକଦଳର ପୂର୍ବ ବିବାଦୀୟ ବିଧାୟକଙ୍କ ଲୋକଙ୍କ ସମ୍ପୃକ୍ତିର ଚର୍ଚ୍ଚା, କେଉଁଠି ସିଧାସଳଖ ରାଜ୍ୟସଭା ସାଂସଦଙ୍କ ଗାଡିଚପାଇ ମଣିଷମରା ଦୁର୍ଘଟଣାବେଳେ ଉପସ୍ଥିତି ଅଭିଯୋଗ ତ ଆଉ କେଉଁଠି ଲୋକସଭା ସାଂସଦଙ୍କ ନୋମିନୀଙ୍କ ବିରୁଦ୍ଧରେ ଠକେଇ ଏତଲା  !

ଅପରତଃ, ସଂରକ୍ଷିତ ଜଙ୍ଗଲରେ ଚୋରା ରତ୍ନପଥର ଖୋଳାରେ ଆଦିବାସୀ ଶ୍ରମିକଙ୍କ ମର୍ମନ୍ତୁଦ ମୃତ୍ୟୁ, କୋଟି କୋଟି ଟଙ୍କାର ଚୋରି ଖଣିଜସମ୍ପତ୍ତିର ଲୁଟ୍, ଜେସିବିରେ ମାଟିଖୋଳି ମିଥ୍ୟାଶ୍ରମକଙ୍କ ନାଁ'ରେ କୋଟିକୋଟି ଟଙ୍କାର ଖୋଲାଖୋଲି ଦୁର୍ନୀତି, ଦାଦନଶ୍ରମିକ ଚାଲାଣ, ମନରେଗା  ସରକାରୀ ଚାଉଳ ହେରଫେର , ଜିଲ୍ଲା ମୁଖ୍ଯ ଯୋଗାଣ ଅଧିକାରୀଙ୍କ ବିରୋଧରେ କ୍ରମାଗତ ଆପତ୍ତିଜନକ ଅଭିଯୋଗ ସତ୍ତ୍ୱେ ଖୋଦ୍ ଜିଲ୍ଲାପାଳଙ୍କ ତାଙ୍କୁ ଅଦ୍ୟାବଧି ଘଣ୍ଟଘୋଡା ନୀତି, ନରହତ୍ୟା ମାମଲାର ପୋଷ୍ଟମର୍ଟମ୍ ରିପୋର୍ଟ ଚପାଇବା, ବନବିଭାଗର କାମ୍ପା ଇତ୍ୟାଦି ଯୋଜନାରେ ଅନିୟମିତତା , କୋଭିଡ୍ କାଳର ସ୍ବାସ୍ଥ୍ୟସେବା ଓ ଅନ୍ୟାନ୍ୟଖର୍ଚ୍ଚବାର୍ଚ୍ଚରେ ବିପୁଳ ଆତ୍ମସାତ୍ ଇତ୍ୟାଦି ଉଲ୍ଲେଖନୀୟ ।

ଏତଦ୍ ବ୍ୟତୀତ ଆହୁରି ଅନେକ ଛୋଟବଡ ଅପରାଧ ଓ  ଦୁର୍ନୀତିର କଳଙ୍କ ବଲାଙ୍ଗୀରଜିଲ୍ଲାର ପୃଷ୍ଠାରେ ଲମ୍ବିଆସୁଛି ।

ଏଣୁ ଜିଲ୍ଲାରେ ତଥାକଥିତ ଉନ୍ନୟନ ବନାମ ବିକାଶ ନାଁ'ରେ ବ୍ୟାପକ ଲୁଣ୍ଠନ ପଛରେ ଯେ ଆଦୌ ରାଜନେତା ବା ଲୋକପ୍ରତିନିଧିମାନେ ଜଡିତ ନାହାଁନ୍ତି , ଏହାକୁ ଅସ୍ବୀକାର କରିବା ସତ୍ୟର ଅପଳାପ ହେବ ।