26-Jun-2023

ମୁରିବାହାଲ(ସୁଦାମ ଚରଣ ): ମୁରିବାହାଲ ଥାନା ଟୁପାଉଡାର ପଂଚାୟତ ଅନ୍ତର୍ଗତ ବଡଉଡାର ଗ୍ରାମରେ ଅବାଧ ମଦ ବିକ୍ରୀ ହେଉଥିବା ଅଭିଯୋଗ ହେଉଛି। ଗ୍ରାମ ର ୱାର୍ଡ ମେମ୍ବର ଓ ସ୍ବୟଂ ସହାୟକ ଗୋଷ୍ଠୀର ମହିଳା ଗ୍ରାମ ରେ ମଦ ବିକ୍ରୀ ବନ୍ଦ ପାଇଁ ମୁରିବାହାଲ ଥାନା ର ଦ୍ବାରସ୍ଥ ହୋଇଛନ୍ତି। ଗାଁରେ କିଛି ମାସ ତଳେ ମଦ ବିକ୍ରୀ ବନ୍ଦ ପାଇଁ ପ୍ରହରୀ ମଣ୍ଡପ ଠାରେ ଏକ ସଭା ହୋଉଥିଲା। ଗ୍ରାମ ବାସୀ ଙ୍କ ବାରଣ ସତ୍ତ୍ବେ କିଛି ମଦ ବେପାରୀ ମଦ କୋଠି ଚଲାଇ ମଦ ବିକ୍ରୀ ବନ୍ଦ କରି ନ ଥିବା ଅଭିଯୋଗ ହୋଇଛି। ଏନେଇ ଗତ ମେ ୨୭ ତାରିଖ ରେ ମୁରିବାହାଲ ଥାନା ରେ ଅଭିଯୋଗ କରାଯାଇ ଥିଲା। ପୁଲିସ ନିକଟରେ ଅଭିଯୋଗ ପରେ ମଧ୍ଯ କୌଣସି ପଦକ୍ଷେପ ନିଆଯାଇ ନ ଥିବା ଗ୍ରାମବାସୀ ପ୍ରକାଶ କରିଛନ୍ତି। ଏଣୁ ଗ୍ରାମ ରେ ଚାଲିଥିବା ଅବାଧ ବେ ଆଇନ ମଦ ବିକ୍ରୀ ବନ୍ଦ କରିବାକୁ ବଡଉଡାର ଗ୍ରାମ ର ୱାର୍ଡ ମେମ୍ବର ଓ ସ୍ବୟଂ ସହାୟକ ଗୋଷ୍ଠୀର ମହିଳା ମୁରିବାହାଲ ଥାନା, ତହସିଲଦାର, ବିଡିଓ, ଉପ ଜିଲ୍ଲାପାଳ ଓ ଜିଲ୍ଲାପାଳ ଙ୍କୁ ଦାବୀ ପତ୍ର ଦେଉଥିବା ଜଣାଯାଏ। ଜୟ ମାଁ ଜଗତ ଜନନୀ ସ୍ବୟଂ ସହାୟକ ଗୋଷ୍ଠୀର ସଭାନେତ୍ରୀ ଖୁସିବତୀ ବାଗ, ସଂପାଦିକା ଯାମିନୀ ପାଣ୍ଡେ, ପୂଜା ଭୋଇ, ଚମ୍ପାବତୀ ଭୋଇ, ୱାର୍ଡ ସଭ୍ଯ ଲୀଳାବତୀ ଲୁହା, ଚନ୍ଦ୍ର କାନ୍ତି ରଣା, ଦ୍ରୋପଦି ଭୋଇ ପ୍ରମୁଖ ଦାବୀ ପତ୍ର ଦେବା ସହ ମଦ ବିକ୍ରୀ ବନ୍ଦ ପାଇଁ ଦାବୀ କରିଛନ୍ତି। ମଦ ବିକ୍ରୀ ବନ୍ଦ ନ ହେଲେ ଆଗାମୀ ଦିନରେ ଆନ୍ଦୋଳନ କରିବାକୁ ଚେତାବନୀ ଦିଆଯାଇଛି।