25-Jun-2023

ବଲାଙ୍ଗିର(ପ୍ରେରଣା ଖବର ): ସେବାର ମୂର୍ତ୍ତିମନ୍ତ ପ୍ରତୀକ । ଦୈନିକ ‘ସମାଜ’ର ପ୍ରତିଷ୍ଠାତା ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ୯୫ତମ ପୂଣ୍ୟତିଥି ପାଳନ ଅବସରରେ ‘ସମାଜ’ ବଲାଙ୍ଗିର ସଂସ୍କରଣ ପକ୍ଷରୁ ସ୍ଥାନୀୟ ସାମ୍ବାଦିକ ଭବନରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ଜିଲାପରିଷଦ ଅଧ୍ୟକ୍ଷା ଦେବକୀ ସାହୁ ଓ ବଲାଙ୍ଗିର ପୌରାଧ୍ୟକ୍ଷା ଲିକା ସାହୁ ଅତିଥି ଭାବେ ଯୋଗ ଦେଇଥିଲେ । ଗୋପବନ୍ଧୁଙ୍କ ଫଟୋଚିତ୍ରରେ ପ୍ରଦୀପ ପ୍ରଜ୍ବଳନ ଓ ପୁଷ୍ପମାଲ୍ୟ ଅର୍ପଣ ପୂର୍ବକ ରକ୍ତଦାନ ଶିବିରକୁ ଉଦ୍‌ଘାଟନ କରିଥିଲେ । ଉଭୟ ଅତିଥି ଉତ୍କଳମଣିଙ୍କ ସେବାକାର୍ୟ୍ୟର ସ୍ମୃତି ଚାରଣ କରିଥିଲେ । ରକ୍ତର କୌଣସି ବିକଳ୍ପ ଏ ଯାଏଁ ବାହାରି ନାହିଁ । ତେଣୁ ରକ୍ତଦାନ ଶିବିର ଆୟୋଜନ କରି ପଣ୍ଡିତ ଗୋପବନ୍ଧୁଙ୍କ ପୂଣ୍ୟତିଥି ପାଳନ କରୁଥିବାରୁ ‘ସମାଜ’ ବଲାଙ୍ଗିର ସଂସ୍କରଣ କାର୍ୟ୍ୟାଳୟକୁ ଅତିଥି ଦ୍ବୟ ପ୍ରଶଂସା କରିଥିଲେ । ବଲାଙ୍ଗିର ବିଙ୍ଗ୍‌ ହ୍ୟୁମାନ୍‌ ଫାଉଣ୍ଡେସନ ଓ ପିକେ ଆସୋସିଏଟ୍‌ର ସଦସ୍ୟ/ସଦସ୍ୟା ସ୍ବେଚ୍ଛାକୃତ ଭାବେ ଶିବିରରେ ରକ୍ତଦାନ କରିଥିଲେ । ଏହି ଶିବିରରେ ୭୧ ୟୁନିଟ୍‌ ରକ୍ତ ସଂଗୃହୀତ ହୋଇଥିଲା । ଭୀମ ଭୋଇ ଡାକ୍ତରଖାନା ରକ୍ତ ଭଣ୍ଡାରର ଡାକ୍ତର ଓ କର୍ମଚାରୀ ଶିବିରରେ ଯୋଗଦେଇ ରକ୍ତ ସଂଗ୍ରହ କରିଥିଲେ । ବଲାଙ୍ଗିର ସଂସ୍କରଣ ଭାରପ୍ରାପ୍ତ ପରିଚାଳକ ପାର୍ଥବନ୍ଧୁ ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶିବିରରେ ଡେକ୍ସ୍‌ ଇନ୍‌ଚାର୍ୟ୍‌ ତଥା ବରିଷ୍ଠ ସହ ସମ୍ପାଦକ ଯୋଗେଶ କୁମାର ବଢ଼େଇ, ରିପୋର୍ଟର ତଥା ସହ ସମ୍ପାଦକ ବଳରାମ ମିଶ୍ର, ବିଭୁକଲ୍ୟାଣ ଗଡ଼ତ୍ୟା, ବିଜ୍ଞାପନ ଏକଜିକ୍ୟୁଟିଭ୍‌ ରଶ୍ମିରଞ୍ଜନ ପଟ୍ଟନାୟକ, ପ୍ରସାର ବିଭାଗର କରନ୍‌ଜିତ ମହାନ୍ତି ଓ ସରୋଜ ପଧାନ ପ୍ରମୁଖ ସହଯୋଗ କରିଥିଲେ । କାର୍ୟ୍ୟକ୍ରମରେ ଜିଲାପରିଷଦ ଅଧ୍ୟକ୍ଷା ଦେବକୀ ସାହୁ, ବଲାଙ୍ଗିର ପୌରାଧ୍ୟକ୍ଷା ଲିକା ସାହୁ ଓ ବିଙ୍ଗ୍‌ ହ୍ୟୁମାନ୍‌ ଫାଉଣ୍ଡେସନର ପ୍ରତିଷ୍ଠାତା ସୋମନାଥ ମିଶ୍ରଙ୍କୁ ‘ସମାଜ’ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା ।