05-May-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲା ପୋଲିସ ନିଜରେ ଭାବମୂର୍ତ୍ତି ସଜାଡିବାକୁ ଗତ କିଛିମାସ ଆଗରୁ ଉଦ୍ୟମ କରିଥିଲା । କିଛି ଅପରାଧିଙ୍କୁ ଗିରଫ୍ କରିମ କୋର୍ଟଚାଲାଣ ସହିତ ତାଙ୍କର ବେଆଇନ ଘର ଓ ଆଡ୍ଡାକୁ ଭାଙ୍ଗିଦେଇଥିଲା । କିନ୍ତୁ ଏବେ ଟିଟିଲାଗଡ ପୋଲିସର କଳାକାରନାମାକୁ ନେଇ ପୋଲିସ ଉପରକୁ ଆଙ୍ଗୁଳି ଉଠିଛି । ନକଲି ନୋଟ ଜବତ ମାମଲାରେ କଣ୍ଟାବାଞ୍ଜିର ଜଣେ ଯୁବକକୁ ଛାଡିଦେଇ ବାକି ୪ଜଣଙ୍କୁ କୋର୍ଟ ଚାଲାଣ କରାଯିବାରେ ଏକ ବଡଡିଲ ହୋଇଥିବା ସନ୍ଦେହ ପ୍ରକାଶ ପାଇଛି । କଣ୍ଟାବାଞ୍ଜିର ବଣ୍ଟି ଗୁପ୍ତା ନାମକ ଜଣେ ନାମକରା ଯୁବକକୁ ଛାଡିବାରେ ପୋଲିସର କାର୍ଯ୍ୟକଳାପ ଉପରେ ଜନସାଧାରଣ ପ୍ରଶ୍ନ ଉଠାଉଛନ୍ତି । ଯେଉଁ ଯୁବକ ନକଲି ନୋଟ ସପ୍ଲାଇ କରିଥିବା ଅଭିଯୋଗ ହୋଇଥିଲା ତାକୁ କିପରି ପୋଲିସ ଛାଡିଦେଲା ତାହା ଏବେ ସବୁଠି ଚର୍ଚ୍ଚା । ପ୍ରକାଶ୍ୟ ଯେ,ଗତ କିଛିମାସ ତଳେ କଣ୍ଟାବାଞ୍ଜିର ଏକ ଲଜ୍‌ରୁ କେତେକ ଦାଦନ ସର୍ଦ୍ଦାରଙ୍କୁ ପୋଲିସ ଗିରଫ କରି ଜୁଆଡି ସଜାଇ କୋର୍ଟ ଚାଲାଣ କରିଥିଲା । କିନ୍ତୁ ପରେ ସେମାନଙ୍କ ପାଖରୁ ଜବତ ହୋଇଥିବା ପ୍ରାୟ ୬୦ଲକ୍ଷ ଟଙ୍କା ତତକାଳିନ ଏସଡିପିଓ ହଡପକରିଥିବା ଅଭିଯୋଗ ହୋଇଥିଲା । ସେ ସମୟରେ ଏସପି ନୀତିନ କୁସଲକର ଘଟଣାର ତଦନ୍ତ କରି ଏସଡିପିଓଙ୍କୁ ନିଳମ୍ବନ କରିଥିଲେ । ଏବେ ନକଲି ନୋଟ ଜବତ ଘଟଣାରେ ଟିଟିଲାଗଡର ଏସଡିପିଓ ଅଙ୍କିତା କୁମ୍ଭାର ଓ ଆଇଆଇସି ରଂଜନ ବରିହା ସନ୍ଦେହ ଘେରକୁ ଆସିଛନ୍ତି । ନକଲି ନୋଟ ସପ୍ଲାଇ କରିଥିବା ବ୍ୟବସାୟୀକୁ ଛାଡିଦେଇ ଅନ୍ୟମାନଙ୍କୁ ଗିରଫ କରିବା ପଛର ରହସ୍ୟକୁ ଉନ୍ମୋଚନ କରିବାକୁ ଦାବି ହେଉଛି । ବର୍ତ୍ତମାନ ବଲାଙ୍ଗୀର ଏସପି ନୀତିନ କୁସଲକର ଛୁଟିରେ ଅଛନ୍ତି । ତେଣୁ ବାଘ ଘରେ ମିରିଗ ନାଟ କଲାଭଳି ଏସଡିପିଓ ମହାଶୟା ତାଙ୍କର କଳାକାରନାମା ଦେଖାଉଛନ୍ତି ବୋଲି ଅଭିଯୋଗ ଉଠିଛି । ଘଟଣାରୁ ଜଣାପଡିଛି ଯେ,ଗତ ଦୁଇଦିନ ତଳେ ଟିଟିଲାଗଡ ନାରେନ ଗାଁରେ ଏକ ସ୍ଥାନରେ ଚଢାଉ କରି ୧୦ଲକ୍ଷ୫୦ ହଜାର ଟଙ୍କା ଜବତ କରିଥିଲା । ଏହି ଘଟଣାରେ ସମ୍ପୃକ୍ତଥିବା ମୁରିବାହାଲ ଥାନାର ସିଲେଟପଡାର କ୍ଷୀରୋଦ୍ର ରଣା ସମେତ କଳାହାଣ୍ଡି ଜିଲ୍ଲାର କେଶବ ଭୋଇ,ଛବିଲାଲ ବାଗ,ତୁରାଙ୍ଗ ବାଗଙ୍କୁ ଗିରଫ କରିଥିଲା । ତେବେ ତଦନ୍ତ ବେଳେ ନୋଟଗୁଡିକ କ୍ଷୀରୋଦ୍ର ରଣା କଣ୍ଟାବାଞ୍ଜିର ଗୁପ୍ତା ବୁକ ଷ୍ଟୋରରମାଲିକ ବଣ୍ଟି ଗୁପ୍ତାଠାରୁ ଆଣିଥିବା ପୋଲିସକୁ କହିଥିଲା । ଫଳରେ ପୋଲିସ ବ୍ୟବସାୟୀ ବଣ୍ଟି ଗୁପ୍ତାକୁ ଉଠାଇ ଆଣି ପଚରାଉଚୁରା କରିଥିଲା ଣ୍ୱଣ୍ଟି କିନ୍ତୁ ଏହି ଅଭିଯୋଗକୁ ଖଣ୍ଡନକରି ଚିଲଡ୍ରେନବ୍ୟାଙ୍କର ନକଲି ନୋଟ ବିକ୍ରି କରିଥିବା ସ୍ୱୀକାର କରିଥିବା ବେଳେ ଅନ୍ୟ ନକଲି ନୋଟ ଦେଇନଥିବା କହିଥିବା । ଏହି କଥାକୁ ବିଶ୍ୱାସ କରି ପୋଲିସ ବଣ୍ଟିକୁ ଛାଡିଦେଇଥିଲା । କିନ୍ତୁ ପୋଲିସ ଗତକାଲି ଟିଟିଲାଗଡ ଥାନାରେ କରିଥିବା ସାମ୍ବାଦିକ ସମ୍ବଳନୀ ବେଳେ କେବଳ ନକଲି ନୋଟ ପ୍ରଦର୍ଶୀତ କରାଇ ଚିଲ ଡ୍ରେନବ୍ୟାଙ୍କର ଖେଳନା ନୋଟକୁ ଦେଖାଇନଥିଲା କି ବଣ୍ଟି ବିଷୟରେ କିଛି କହିନଥିଲା । କୋର୍ଟ ଚାଲାଣ କରାଯାଇଥିବା ବ୍ୟକ୍ତିଙ୍କ ବିଷୟରେ କେବଳ କହିଥିଲା । ଫଳରେ ସାମ୍ବାଦିକଙ୍କ ମଧ୍ୟରେ ସନ୍ଦେହ ପ୍ରକାଶ ପାଇଥିଲା । ସ୍ଥାନୀୟ ଲୋକଙ୍କ ଅଭିଯୋଗ ହେଉଛି ଯେ,ବଣ୍ଟିକୁ ଛାଡିବାରେ ପୋଲିସ ଏକ ବଡରକମର ଡିଲ କରିଛି । କେତେକ ମଧ୍ୟସ୍ଥି ପୋଲିସ ସାଙ୍ଗରେ ଏହି ଡିଲ କରିଥିବା ଚର୍ଚ୍ଚା ହେଉଛି । ସେପଟେ କଣ୍ଟାବାଞ୍ଜିରେ ଅନେକ ସମୟରେ ନକଲି ନୋଟ କାରବାର ହେଉଥିବା ଅଭିଯୋଗ ହେଉଛି । ପୂର୍ବରୁ ମଧ୍ୟ ଏହି ଅଞ୍ଚଳରେ ନକଲି ନୋଟ କାରବାର ଧରାପଡିଥିଲା । କିନ୍ତୁ ସେହି ନକଲି ନୋଟସବୁ କେଉଁଠି ଓ କିଏ ଛାପିଥିଲା ତଥା ଏହି ଅଞ୍ଚଳକୁ ଏହା ଆସିଲା କିପରି ତାହା ପୋଲିସ ଷ୍ପଷ୍ଟ କରିନଥିଲା । ବାରମ୍ବାର ନକଲି ନୋଟ ଧରାପଡୁଥିବା ଅଞ୍ଚଳରେ ପୋଲିସ ଏଭଳି ତଦନ୍ତ ଓ ଫିକ୍ସିଂକୁ ନେଇ ଜନସାଧାରଣରେ ଅସନ୍ତୋଷ ବୃଦ୍ଧି ପାଉଛି । ଅଭିଯୁକ୍ତ କ୍ଷୀରୋଦ୍ର ରଣାଙ୍କ ସ୍ତ୍ରୀ ତାଙ୍କ ସ୍ୱାମୀ ନିର୍ଦ୍ଦୋଶ ଓ ତାଙ୍କୁ କଣ୍‌ଟାବାଞ୍ଜିର ବଣ୍ଟି ଗୁପ୍ତା ହିଁ ନକଲି ନୋଟଦେଇ ଫସାଇଛି ବୋଲି ଅଭିଯୋଗ କରିଛନ୍ତି । ତେବେ ବଲାଙ୍ଗୀର ଅତିରିକ୍ତ ଏସପି ସୁରେଶଚନ୍ଦ୍ର ନାଏକ ଏହି ନକଲି ନୋଟ ମାମଲାର ତଦନ୍ତ ଚାଲୁରହିଛି ଓ ବଣ୍ଟି ଏବେର ମଧ୍ୟ ପୋଲିସ ସ୍କାନରରେ ରହିଥିବା କହିଛନ୍ତି । ରାଜ୍ୟ ଗୃହବିଭାଗ ଏହି ଘଟଣାରେ ଏକ ସ୍ୱତନ୍ତ୍ର ତଦନ୍ତ କରାଇ ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଜନସାଧାରଣରେ ଦାବି ହେଉଛି ।