08-Apr-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଜଟେସିଂହା ପଞ୍ଚାୟତ ଅନ୍ତର୍ଗତ ବଡ଼ଖମାର ସ୍ଥିତ ଶ୍ୟାମ ସୁନ୍ଦର ସଂସ୍କୃତ ବିଦ୍ୟାଳୟରେ ଶିକ୍ଷକ ଅଭାବ ଯୋଗୁଁ ଶିକ୍ଷାଦାନ ପାଇଁ ବିଭିନ୍ନ ସମସ୍ୟା ଦେଖାଦେଇଛି। ଉକ୍ତ ବିଦ୍ୟାଳୟରେ ୫ ଗୋଟି ଶିକ୍ଷକ ପଦ ଦଶ ବର୍ଷ ଧରି ଖାଲି ପଡିଥିବା ଅଭିଯୋଗ ହୋଇଛି। ବର୍ତ୍ତମାନ କେବଳ ଦୁଇ ଜଣ ଶିକ୍ଷକରେ ପାଠ ପଢା ଚାଲିଛି। ଯାହା ଦ୍ବାରା ଏଠାରେ ପାଠପଢ଼ା ବହୁଳ ଭାବେ ପ୍ରଭାବିତ ହେଉଛି। ତୁରନ୍ତ ଉକ୍ତ ସ୍କୁଲରେ ମଧ୍ୟମା ଶ୍ରେଣୀ ରେ ଖାଲି ପଡିଥିବା ଟିଜିଟି (କଳା),ଶାସ୍ତ୍ରୀ (ବ୍ୟାକରଣ)ଓ ଦର୍ଶନ ବିଭାଗରେ ଶିକ୍ଷକ ପଦ ପୂରଣ କରାଯିବାକୁ ଦାବି ହୋଇଛି। ୧୯୮୦ ମସିହାରେ ପ୍ରତିଷ୍ଠିତ ଏହି ଶିକ୍ଷାନୁଷ୍ଠାନ ପ୍ରଥମା ଓ ମଧ୍ୟମା ଶ୍ରେଣୀ ପାଇଁ ଶିକ୍ଷାଦାନର ବ୍ୟବସ୍ଥା ରହିଛି। ବିଗତ ଦିନରେ ମଧ୍ୟମା ପରୀକ୍ଷା ରେ ଉକ୍ତ ଅନୁଷ୍ଠାନର ଛାତ୍ରଛାତ୍ରୀ ରାଜ୍ୟରେ ପ୍ରଥମ ସ୍ଥାନ ହାସଲ କରିଥିଲେ। ଶିକ୍ଷକ ପଦବୀ ପୂରଣ ପାଇଁ ସ୍କୁଲ ପରିଚାଳନା କମିଟିଙ୍କ ସହ ଅଭିଭାବକ ସ୍ଥାନୀୟ ବିଧାୟକ ପଦ୍ମନାଭ ବେହେରାଙ୍କୁ ଲିଖିତ ଆକାରରେ ଏକ ଦାବିପତ୍ର ପ୍ରଦାନ କରିଥିଲେ । ଶ୍ରୀ ବିଧାୟକ ଉକ୍ତ ସ୍କୁଲର ଶିକ୍ଷକ ସମସ୍ୟା ନିମନ୍ତେ ଶିକ୍ଷା ମନ୍ତ୍ରୀଙ୍କୁ ଜଣାଇ ଶିକ୍ଷକ ପୂରଣ ପାଇଁ ପ୍ରତିଶ୍ରୁତି ଦେଇଥିଲେ। ଏଥିରେ ସ୍ଥାନୀୟ ସରପଞ୍ଚ ସୁନୀତା ପଧାନ, ବିଦ୍ୟାଳୟର ମୋ ସ୍କୁଲ ଅଭିଯାନର ସଭାପତି ଶଙ୍କର୍ଷଣ ଛନ୍ଦ , ବରାହପଦର ମଠର ମଠାଧୀଶ ନୃତ୍ୟ ଗୋପାଳ ଦାସ, ସୀତା ରାମ ଗୁରୁ, ସହଦେବ ମହାକୁର, ବିନୋଦ ମହାକୁରଙ୍କ ସହ ଅନ୍ୟାନ୍ୟ ମାନେ ଉପସ୍ଥିତ ଥିଲେ।