07-Dec-2020

ଭୁବନେଶ୍ୱର, (ଶୁଭାଶିଷ ନାୟକ) : କରୋନା ଟୀକା ଆସିବା ପୂର୍ବରୁ ରାଜ୍ୟ ସରକାର ଆଜି ଟୀକାକରଣକୁ ସୁଗମ କରିବା ପାଇଁ ଦୁଇଟି କମିଟି ଗଠନ କରିଛନ୍ତି । ପରିବାର କଲ୍ୟାଣ ନିର୍ଦେଶକ ରାଜ୍ୟସ୍ତରୀୟ କମିଟିର ଅଧ୍ୟକ୍ଷ ଥିବା ବେଳେ ସିଡିଏମଓଙ୍କୁ ଜିଲ୍ଲାସ୍ତରୀୟ କମିଟିର ଅଧ୍ୟକ୍ଷ ଭାବେ ଚୟନ କରାଯାଇଛି । ଏହି ଦୁଇ କମିଟିର ରାଜ୍ୟରେ ଟୀକାକରଣର ପାର୍ଶ୍ଵ ପ୍ରତିକ୍ରିୟା ଓ ନିରୀକ୍ଷଣ ସହିତ ୯ଟି ଦିଗ ଉପରେ ନଜର ରଖିବା ଲାଗି କୁହାଯାଇଛି  । ଏ ନେଇ ଆଜି ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି  ।
କରୋନା ପାଇଁ ଟୀକା ପ୍ରସ୍ତୁତ ଜୋରଦାର ହୋଇଛି  । ଏକାଧିକ କମ୍ପାନୀ ଟୀକା ଏବେ ପ୍ରସ୍ତୁତ ଜାରି ରହିଛି । ତେଣୁ ଖୁବଶୀଘ୍ର ଟୀକା ବଣ୍ଟନ କରାଯିବା ନେଇ ଆଶା ସଞ୍ଚାର ହୋଇଛି । ଏଭଳି ପରିସ୍ଥିତିରେ ସରକାରଙ୍କ ପକ୍ଷରୁ ୨୧ ଜାଣିଆ ରାଜ୍ୟସ୍ତରୀୟ ଟିମ୍ ଗଠନ କରାଯାଇଛି  । ପରିବାର କଲ୍ୟାଣ ନିର୍ଦେଶକଙ୍କ ଅଧକ୍ଷତାରେ ଗଠିତ କମିଟିରେ ରାଜ୍ୟ ଟୀକାକରଣ ଅଧିକାରୀ ସଦସ୍ୟ ସଚିବ ଓ ଅନ୍ୟମନେ ସଦସ୍ୟ ରହିଛନ୍ତି  ।
ଏହି ସଦସ୍ୟମାନେ କ୍ଷେତ୍ର ପରିଦର୍ଶନ କରିବା ସହିତ ଟୀକାକରଣ ସ୍ଥାନ ଓ କୋଲ୍ଡ଼ ଚେନ ଷ୍ଟୋର ପରିଦର୍ଶନ କରିବା ଲାଗି କୁହାଯାଇଛି  । ସେହିପରି ସିଡ଼ିଏମଙ୍କ ଅଧକ୍ଷତାରେ ଗଠିତ ଜିଲ୍ଲାସ୍ତରୀୟ କମିଟିରେ ଏପିଏଚଓ ସଦସ୍ୟ ରହିଛନ୍ତି । ଟୀକାକରଣ ବାଦ୍ ଯଦି କୌଣସି ଅଘଟଣ ଘଟେ ତାହାଲେ ସଂପୃକ୍ତ ବ୍ୟକ୍ତି ହସ୍ପିଟାଲ ରେକର୍ଡ, ରିପୋର୍ଟ ଯାଞ୍ଚ କରିବା ଲାଗି କୁହାଯାଇଛି  ।