11-Mar-2023

ବଲାଙ୍ଗୀର( ମଳୟ ମିଶ୍ରଙ୍କ ରିପୋର୍ଟ )ବଲାଙ୍ଗୀର ଜିଲ୍ଲାରେ ଚାଲିଥିବା ଜିଲ୍ଲା ପ୍ରାଥମିକ ଶିକ୍ଷା ପ୍ରକଳ୍ପ ପୂର୍ବର ଡିପିଇପି କାର୍ଯ୍ୟକ୍ରମ ବେଳରୁ ସାଂପ୍ରତିକ ସର୍ବଶିକ୍ଷା ଅଭିଯାନ ପର୍ଯ୍ୟନ୍ତ ବ୍ୟାପକ ଦୁର୍ନୀତି ଓ ଅନିୟମିତତାରେ ବୁଡି ରହିଛି । ଏପରିକି କିଛିବର୍ଷ ତଳେ ଏହି ପ୍ରକଳ୍ପର ୨ ଜଣ ଅସ୍ଥାୟୀ କର୍ମଚାରୀ ଆକାଉଣ୍ଟାଣ୍ଟ୍ ଓ କ୍ୟାସିଅର୍ ଡାକ୍ତର ସାହୁ , ଜେଠୁ ସାହୁ ପ୍ରାୟ ୧୦ କୋଟି ଟଙ୍କା ବ୍ୟାଙ୍କ ଜାଲିଆତି କରି ହଡପ କରିବା ଅଭିଯୋଗରେ ଫେରାର୍ ହୋଇ ମାସେପରେ ଗିରଫ ହୋଇ ଜେଲ୍ ଯିବା ଘଟଣା ଚାଞ୍ଚଲ୍ଯସୃଷ୍ଟି କରିଥିଲା । ଭିଜିଲାନସେ ବା କ୍ରାଇମବ୍ରାଞ୍ଚ ତଦନ୍ତ କରୁଥିବା ମାମଲା ଏବେ ଚପି ଗଲାଣି  ! ତେବେ କେବଳ ସେଇ ୨ ଜଣ ନୁହଁନ୍ତି , ସେ ସମୟରୁ ଅଦ୍ୟାବଧି ଅସ୍ଥାୟୀ କର୍ମଚାରୀ ରହି ଆସିଥିବା ବା ବିଭିନ୍ନ ଆଳରେ ପ୍ରକଳ୍ପରେ କାର୍ଯ୍ୟରତ କେତେକ କର୍ମଚାରୀ ମଧ୍ୟ କୋଟି କୋଟି ଟଙ୍କା ବାଟମାରଣା କରିଆସୁଥିଲେ ହେଁ , ମଝିରେ ଭିଜିଲାନ୍ସର ତଦନ୍ତ ପରିସରଭୁକ୍ତ ହୋଇଥିଲେ ହେଁ , ଚପାଇ ଦିଆଗଲା । 

ଏହି ଅଭିଯାନ ବା ପ୍ରକଳ୍ପର ନିର୍ମାଣ , ସାମଗ୍ରୀ କ୍ରୟ , ବିଭିନ୍ନ ଖର୍ଚ୍ଚ ଓ କେଜିବିଭି ବା କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟର ହଷ୍ଟେଲର ଦୁର୍ନୀତି ଅଭିଯୋଗ ପ୍ରକାଶ ପାଇ ଆସୁଛି । ତଥାପି ଏହାର ତଦନ୍ତ ସୁଦ୍ଧା କରାଯାଉନାହିଁ  ବା ଏ ଦିଗରେ ଜିଲ୍ଲାର ନିର୍ବାଚିତ ଲୋକପ୍ରତିନିଧିମାନେ ମଧ୍ୟ ମୁହଁରେ ତୁଣ୍ଡି ବାନ୍ଧିଦେଇ ବସିଛନ୍ତି ।

ଏଥିମଧ୍ୟରେ ଗତ ୨୦୧୯ରୁ ଛଟେଇ ହୋଇଥିବା କେଜିବିଭି ହଷ୍ଟେଲର ପୁରୁଷ କର୍ମଚାରୀଙ୍କ ଏମ୍ପୟର୍ ସେଆର୍ ଇପିଏଫ୍ ବାବଦରେ ବାରମ୍ବାର ବିଭାଗ ପକ୍ଷରୁ ଚିଠି ଆସୁଥିବା ଓ ଏହି କର୍ମଚାରୀଙ୍କ ଦାବି ସତ୍ତ୍ୱେ , ଏ ବାବଦକୁ ମିଳିବାକୁ ଥିବା ୨୫ ଲକ୍ଷରୁ ଅଧିକ ଟଙ୍କାର ଫାଇଲ୍ ଚପାଇ ଦିଆଯାଇଛି ।  ଏସମ୍ପର୍କରେ ପଚାରିବାରୁ କେଜିବିଭି କୋ- ଅର୍ଡିନେଟର  ଯୋଷୀ ଓ ଡିପିସି ଦାୟିତ୍ୱରେ ଥିବା ଜିଲ୍ଲା ଶିକ୍ଷାଧୀଶ ଧ୍ରୁବ ବେହେରା ଏଡାଇ ଆସୁଛନ୍ତି । ବଲାଙ୍ଗୀର ଜିଲ୍ଲା ସମେତ ରାଜ୍ୟର ମୋଟ ୨୩ଟି କେଜିବିଭି ଜିଲ୍ଲାରୁ ବରଗଡ , ଅନଗୁଳ ପରି ୨ / ୪ ଟି ଜିଲ୍ଲାକୁ ଏହି ଟଙ୍କା ଦିଆଯାଇ ବଲାଙ୍ଗୀର ସମେତ ଅନ୍ୟାନ୍ୟ ଜିଲ୍ଲାର ଏ ବାବଦ ଅର୍ଥ ହଡପ କରାଯାଇଥିବା ସନ୍ଦେହ କରାଯାଉଛି  ! ଏହି ଅର୍ଥ ତୁରନ୍ତ ଦିଆଯିବାକୁ ଗତ ୨୦ ୲ ୩ । ୨୦୨୪ ତାରିଖରେ ବିଭାଗରୁ ପୁଣି ଚିଠି ଆସିଥିଲେ ହେଁ , ଫାଇଲ୍ ଲଗାଯାଉନାହିଁ , ଡିପିସି ଫାଇଲ୍ ଲଗାଗଲେ , ଦିଆଯିବ ଇତ୍ୟାଦି କହି ଟାଳି ଆସୁଥିବା ଓ ଦୁଇବର୍ଷତଳେ ସଂଯୋଜିକା ଏପରି କୌଣସି ଚିଠି ଆସି ନଥିବା ବେଲପଡାର ଜଣେ ସୂଚନା ଆଇନ ବଳରେ ମାଗିଥିବାବ୍ୟକ୍ତିଙ୍କୁ ସଫେଇଦେଇଥିଲେ । ଏଣୁ ଉପରୁ ତଳ ଅର୍ଥାତ୍ ପ୍ରକଳ୍ପରୁ ଓପେପା ପର୍ଯ୍ୟନ୍ତ ଏହି ଦୁର୍ନୀତିର ଚେର ଲମ୍ବିଛି ବୋଲି ଅଭିଯୋଗ ହେଉଛି । ଏଥିରେ ବଲାଙ୍ଗୀର ପ୍ରକଳ୍ପରେ ଆରମ୍ଭରୁ କାର୍ଯ୍ୟରତ ଜଣେ ପୁରୁଣା ଧୂର୍ତ୍ତ ଅସ୍ଥାୟୀ କିରାଣୀ ସବୁପ୍ରକାର ଦୁର୍ନୀତିର ଅଧିକାରୀଙ୍କ ହାତବାରିସୀ ସାଜିଥିବା ଚର୍ଚ୍ଚା ହେଉଛି । ଆଗାମୀ ଦିନରେ ଏହାର ପର୍ଦ୍ଦାଫାଶ୍ କରାଯିବ ।