11-Mar-2023

ସମ୍ବଲପୁର  (ସଂଜୀବ ପାଣିଗ୍ରାହୀ)  ସମ୍ବଲପୁରସ୍ଥିତ ନେତାଜୀ ସୁଭାଷ ଚନ୍ଦ୍ର ବୋଷ ସରକାରୀ ମହାବିଦ୍ୟାଳୟ ପରିସରରେ ସାହିତ୍ୟ ସଂସଦ ଆନୁକୂଲ୍ୟରେ ଶାସ୍ତ୍ରୀୟ ଓଡ଼ିଆ ଭାଷା ଦିବସ ପାଳିତ ହୋଇଯାଇଛି। ମହାବିଦ୍ୟାଳୟର ଅଧ୍ୟକ୍ଷା ଡ. ସିକତା ପଣ୍ଡାଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ସାହିତ୍ୟ ସଂସଦର ଆବାହକ ତଥା ସ୍ନାତକୋତ୍ତର ଓଡ଼ିଆ ବିଭାଗମୁଖ୍ୟ ଡ. ଶ୍ୟାମ ଭୋଇ ପରିଚାଳନା କରିବା ସହିତ ଅତିଥିମାନଙ୍କ ପରିଚୟ ପ୍ରଦାନ କରିଥିଲେ। ଏହି ଉତ୍ସବରେ ଅବସରପ୍ରାପ୍ତ ଓଡ଼ିଆ ପ୍ରାଧ୍ୟାପକ ତଥା ବିଶିଷ୍ଟ ସାହିତ୍ୟିକ ଡ. ଶ୍ୟାମ ସୁନ୍ଦର ଧର ମୁଖ୍ୟଅତିଥି ଓ ମାଁ ଝାଡେଶ୍ଵରୀ ମହାବିଦ୍ୟାଳୟ, ଧମା, ସମ୍ବଲପୁରର ଓଡ଼ିଆ ବିଭାଗ ଅଧ୍ୟାପକ ତଥା ବିଶିଷ୍ଟ ଲୋକ ସାହିତ୍ୟ ଗବେଷକ ଏବଂ ଏନ୍ ଏସ୍ ସି ବି ମହାବିଦ୍ୟାଳୟର ପୁରାତନ ଛାତ୍ର ଡ. ସିଦ୍ଧାର୍ଥ ପଣ୍ଡା ମୁଖ୍ୟବକ୍ତା ଭାବେ ଯୋଗଦାନ କରିଥିଲେ। ଅତିଥିମାନେ ଓଡ଼ିଆ ଭାଷାର ଇତିହାସ, ସାହିତ୍ୟର ଇତିହାସ ତଥା ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ପ୍ରସଙ୍ଗ ଏବଂ ଆମ ଭାଷା - ସାହିତ୍ୟର ଉନ୍ନତି ବିଷୟରେ ବ୍ୟାପକ ଆଲୋଚନା କରିଥିଲେ। ମୁଖ୍ୟବକ୍ତା ଡ. ପଣ୍ଡା ଭାରତର ଶାସ୍ତ୍ରୀୟ ଭାଷାଗୁଡିକ ସମ୍ପର୍କରେ ଆଲୋଚନାପୂର୍ବକ ଓଡ଼ିଆ ଭାଷାର ଶାସ୍ତ୍ରୀୟ ମାନ୍ୟତା ପ୍ରାପ୍ତି ପାଇଁ ଥିବା ଚାରୋଟି ମାନଦଣ୍ଡ ଉପରେ ବ୍ୟାପକ ଚର୍ଚ୍ଚା କରିଥିଲେ। ସେହିପରି ମୁଖ୍ୟ ଅତିଥି ଡ. ଧର ଭାଷା ଗୋଟିଏ ଜାତିର ଅସ୍ମିତା ତଥା ସ୍ଵାଭିମାନର ପ୍ରତୀକ ବୋଲି କହିବା ସହିତ ଓଡ଼ିଆ ଭାଷାକୁ ସମୃଦ୍ଧ କରିବାରେ ସମ୍ବଲପୁରୀ ଭାଷାର ଯଥେଷ୍ଟ ଅବଦାନ ରହିଛି ବୋଲି ମତବ୍ୟକ୍ତ କରିଥିଲେ। ଆସାମର ବୋଡୋ ଭାଷା ଓ ଓଡ଼ିଶାର ସାନ୍ତାଳୀ ଭାଷାର ଉଦାହରଣ ଦେଇ ଭାଷା ଏବଂ ସାହିତ୍ୟ ଦୃଷ୍ଟିରୁ ବେଶ୍ ସମୃଦ୍ଧ ସମ୍ବଲପୁରୀ ଭାଷାକୁ କେନ୍ଦ୍ର ସରକାର ସମ୍ବିଧାନର ଅଷ୍ଟମ ସୂଚୀରେ ସାମିଲ୍ କରିବା ପ୍ରସଙ୍ଗ ମଧ୍ୟ ଉତ୍ଥାପନ କରିଥିଲେ। ଆଇକ୍ୟୁଏସି ସେଲ୍ ର ସଂଯୋଜକ ତଥା ସ୍ନାତକୋତ୍ତର ଇତିହାସ ବିଭାଗମୁଖ୍ୟ ପ୍ରଫେସର ଦୁଲ୍ଲଭ କୁମାର ସା ଏହି ଅବସରରେ ମଞ୍ଚାସୀନ ଥିଲେ। କାର୍ଯ୍ୟକ୍ରମ ଆୟୋଜନରେ ଡ. ଶ୍ରଦ୍ଧାମୟୀ ପୁରୋହିତ, ଅଧ୍ୟାପିକା ମେଞ୍ଜା ପୂର୍ତ୍ତି, ଅଳକା ଲୁଗୁନ୍, ସୁଜିତ ପଧାନ, ମିଲି ସାହୁ, ଉତ୍ତମ କୁମାର ରାଉଳ ପ୍ରମୁଖ ସହାୟତା କରିଥିବାବେଳେ ଅଧ୍ୟାପକ ସନ୍ତୋଷ ରଞ୍ଜନ ବେହେରା, ଅଧ୍ୟାପକ ସୁରେଶ ଏକ୍କା, ଡ. ପ୍ରଶାନ୍ତ କୁମାର ପଣ୍ଡା, ମିନତୀ ଛତ୍ରିଆ, ବୀରସେନ ଦଳାଇ, ସତ୍ୟପ୍ରକାଶ ନନ୍ଦ, ସତ୍ୟପ୍ରକାଶ ଟୁଡୁ, ଶ୍ରଦ୍ଧାଞ୍ଜଳି ଦାଶଙ୍କ ସହିତ ବିପୁଳ ସଂଖ୍ୟାରେ ଛାତ୍ରଛାତ୍ରୀମାନେ ଉପସ୍ଥିତ ଥିଲେ। କାର୍ଯ୍ୟକ୍ରମ ଶେଷରେ ସାହିତ୍ୟ ସଂସଦର ଅନ୍ୟତମ ସଦସ୍ୟ ତଥା ଇଂରାଜୀ ବିଭାଗର ମୁଖ୍ୟ ଅଧ୍ୟାପକ ହରିହର ମଲ୍ଲିକ ଧନ୍ୟବାଦ ଅର୍ପଣ କରିଥିଲେ।