11-Mar-2023

ଗଣିଆ (ବିଜୟଲକ୍ଷ୍ମୀ ରାଉତ)
 ଗଣିଆ ହାଟ ପଡ଼ିଆରେ ଚାରିଦୋଳ ମେଳଣ ଉଦଯାପିତ ହୋଇଯାଇଛି । ମେଳଣରେ ସ୍ଥାନାଧିପତି ଗ୍ରାମର ଶ୍ରୀଲିଙ୍ଗରାଜ ଦେବଙ୍କ ନିମନ୍ତ୍ରଣ କ୍ରମେ ସ୍ଥାନୀୟ ଗୋପିନାଥ ଜୀଉ, ରଘୁନାଥ ଜୀଉ, ଜଗନ୍ନାଥ ଜୀଉ ଏବଂ ସ୍ବତନ୍ତ୍ର ଭାବେ ନିମନ୍ତ୍ରିତ ରାଉତପଡାସ୍ଥିତ ଭୋଳେଶ୍ବର ମହାଦେବଙ୍କୁ ସୁସଜ୍ଜିତ ବିମାନରେ ଶୁକ୍ରବାର ସଂଧ୍ୟାରେ ମେଳଣ ପଡିଆକୁ ନିଆଯାଇଥିଲା ‌। ଆତସବାଜି ସାଙ୍ଗକୁ ବିରାଟ ପଟୁଆର, ଗୋପାଳ ସମାଜର ଲଉଡି ଖେଳ ଏବଂ ଡିଜେ ଶବ୍ଦର ତାଳେ ତାଳେ ସହସ୍ରାଧିକ ଝୁମି ଯାଇଥିଲେ । ଗ୍ରାମର ଗୋପିନାଥ ଜୀଉଙ୍କ ମନ୍ଦିର ନିକଟରୁ ଏହି ଶୋଭାଯାତ୍ରା ବାହାରି ହାଟ ପଡ଼ିଆରେ ପହଞ୍ଚିଥିଲା । ପରସ୍ପର ସହିତ ଫଗୁ ଖେଳିବା ସହିତ ଫଗୁର ରଙ୍ଗରେ ସମସ୍ତେ ରଙ୍ଗିନ ହୋଇଯାଇଥିଲେ । ପରେ ପାରମ୍ପରିକ ରୀତିରେ ଦୋଳବେଦୀ ଉପରେ ସମସ୍ତ ଠାକୁରଙ୍କୁ ପୂଜାର୍ଚ୍ଚନା କରାଯାଇଥିଲା । ଏହି ଚାରିଦୋଳ ଯାତ୍ରା ଗଣିଆ ପଞ୍ଚାୟତର ସ୍ବତନ୍ତ୍ର ମେଳଣ ହୋଇଥିବାରୁ ଏହାକୁ ସରପଞ୍ଚ ଗିରିଧାରୀ ସେଠୀ, ସମିତି ସଭ୍ୟ ଫକୀର ମୋହନ ଡାକୁଆ, କାର୍ଯ୍ୟ ନିର୍ବାହୀ ଅଧିକାରୀ କୈଳାସ ମହାପାତ୍ର,ଓ୍ବାର୍ଡସଭ୍ୟ କଲ୍ଲିମୁଦ୍ଦିନ ଖାଁଙ୍କ ସମେତ ଗ୍ରାମ ସଭାପତି,ବହୁ ବୁଦ୍ଧିଜୀବୀ ସହଯୋଗ କରିଥିଲେ । ସଂଧ୍ୟା ସମୟରେ ନାଟକ "ସିନ୍ଦୁର ପିନ୍ଧିଛି କାନ୍ଦିବା ପାଇଁ " ନାଟକ ମଞ୍ଚସ୍ଥ ହୋଇଥିଲା ।