26-Feb-2023

ବୀରମହାରାଜପୁର,(ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଖଣ୍ଡ ଜଟେସିଂହା ପଞ୍ଚାୟତ ଅନ୍ତର୍ଗତ ବଡ଼ଖମାର ଗ୍ରାମସ୍ଥିତ ଶ୍ୟାମସୁନ୍ଦର କୁଞ୍ଜ କୁଟିର (ବରାହପଦରମଠ) ପଶ୍ଚିମ ଓଡ଼ିଶାର ଦ୍ବିତୀୟ ବୃନ୍ଦାବନ ଭାବେ ପରିଚିତ।‌ ପ୍ରାକୃତିକ ସୌନ୍ଦର୍ଯ୍ୟର ପରିବେଷ୍ଟନୀ ମଧ୍ୟରେ ୧୯୩୭ ମସିହାରେ ବାବାଜି କୃଷ୍ଣଚନ୍ଦ୍ର ଦାସ ଦ୍ବାରା ଏହି ମଠ ପ୍ରତିଷ୍ଠା ହୋଇଥିବା ବେଳେ ୧୯୫୫ ମସିହାରୁ ଏଠାରେ ଦ୍ବିବାରାତ୍ର ବିଶ୍ଵଶାନ୍ତି ଅଖଣ୍ଡ ହରିରାମ ସଂକୀର୍ତ୍ତନ ହୋଇ ଆସୁଛି। ବାବାଜି କୃଷ୍ଣଚନ୍ଦ୍ର ଦାସଙ୍କ ଦେହାନ୍ତ ପରେ କୁଞ୍ଜ କିଶୋର ଦାସ ମଠ ମହନ୍ତ ହୋଇଥିବା ବେଳେ ୨୦୦୯ରେ ସେ ସ୍ଵର୍ଗାରୋହଣ କରିଛନ୍ତି। ଏହାପରେ ଖେଳାକୃଷ୍ଣ ଦାସ ମହନ୍ତ ଦାୟିତ୍ଵ ନେଇଥିଲେ।  ୨୪ ବର୍ଷ ପର୍ଯ୍ୟନ୍ତ ସୁରୁଖୁରୁରେ ଭାବରେ ମଠ ଦାଇତ୍ୱ ତୁଲାଇ ପରେ ୨୦୨୧ରେ ଖେଳାକୃଷ୍ଣ ଦାସଙ୍କ  ବ୍ରଜପ୍ରାପ୍ତି ହୋଇଥିଲା। ସେହିଦିନ ଠାରୁ ଆଜି ପର୍ଯ୍ୟନ୍ତ ବାବାଜୀ ସଦାନନ୍ଦ ଦାସ ଓ ବାବାଜୀ ନୃତ୍ୟ ଗୋପାଳ ଦାସ ମଠ ଦାୟିତ୍ଵ ଓ ପରିଚାଳନା କରୁଛନ୍ତି। ପ୍ରତିବର୍ଷ ଚୈତ୍ର ଶୁକ୍ଳ ତୃତୀୟା ତିଥିରେ ପ୍ରତିଷ୍ଠାତା କୃଷ୍ଣ ଚନ୍ଦ୍ର ଦାସଙ୍କ ପୂଣ୍ୟ ତିଥି ଏବଂ ଫାଲଗୁନ କୃଷ୍ଣ ଚତୁର୍ଥୀ ତିଥିରେ ମହନ୍ତ କୁଞ୍ଜ କିଶୋର ଦାସଙ୍କ ପୂଣ୍ୟ ତିଥି ଉତ୍ସବ ଅନୁଷ୍ଠିତ ହୋଇଥାଏ। ବହୁ ବର୍ଷରୁ ଏଠାରେ ଗିରି ଗୋବର୍ଦ୍ଧନ ପୂଜା ମହୋତ୍ସବ ଅନୁଷ୍ଠିତ ହେଇଆସୁଅଛି। ଜିଲ୍ଲା ତଥା ଜିଲ୍ଲା ବାହାରୁ ହଜାର ହଜାର ଶ୍ରଦ୍ଧାଳୁ ଏହି ଉତ୍ସବରେ ସମାଗମ ହେଉଥିବା ଦେଖିବାକୁ ମିଳିଥାଏ।  ଦୀର୍ଘ ବର୍ଷ ହେଲା ଆଧ୍ୟାତ୍ମିକ ସାଧାନ ଚଲାଇବା ସହ ବହୁ ସଂଖ୍ୟାରେ ଭକ୍ତଙ୍କୁ ଆକର୍ଷିତ କରୁଥିବା ଏହି ମଠ ବିବିଧ ସମସ୍ୟା ଦେଇ ଗତି କରୁଛି। ମଠକୁ ଭଲ ରାସ୍ତାଟିଏ ନଥିବା ବେଳେ ଅର୍ଥାଭାବରୁ ସ୍ବାଗତ ତୋରଣ  ନିର୍ମାଣ ହୋଇପାରିନାହିଁ। ଯାତ୍ରୀ ନିବାସ, ଜଳଯୋଗାଣ ଓ ବିଦ୍ୟୁତ ବ୍ୟବସ୍ଥା ଟ୍ରାନ୍ସଫର୍ମର ଏବଂ ପାଚେରୀ କାନ୍ଥ ପାଇଁ ଅର୍ଥାଭାବ ରହିଥିବା ବେଳେ  ସମ୍ବଲପୁର ଠାରୁ ବଡଖମାର କୁ ବସ ଚଳାଚଳ ପାଇଁ ମହନ୍ତଙ୍କ ସ୍ଵପ୍ନ ଅଧୁରା ରହିଥିବା ନେଇ ବାବାଜୀ ନୃତ୍ୟ ଗୋପାଳ ଦାସ କହିଛନ୍ତି। ଅବଶ୍ୟ ମଠର ଭିତ୍ତିଭୂମିର ବିକାଶ ନିମନ୍ତେ ବଦାନ୍ୟ ବ୍ୟକ୍ତିଙ୍କ ସହଯୋଗ ସହିତ ଜନପ୍ରତିନିଧି ଠାରୁ ସ୍ୱଳ୍ପ ଅନୁଦାନ ଯୋଗାଇ ଦେଇଥିବା ସେ ପ୍ରକାଶ କରିଛନ୍ତି। ଏହି ଧାର୍ମିକସ୍ଥଳିକୁ ପର୍ଯ୍ୟଟନ ସ୍ଥଳୀ ମାନତ୍ୟ ପାଇଁ ବହୁ ବାର ଅଞ୍ଚଳବାସୀ ଦାବି କରିଆସିଛନ୍ତି। ଜିଲ୍ଲା ପ୍ରଶାସନ ଓ ବିଭାଗ ଏଥିପ୍ରତି ଦୃଷ୍ଟି ଦେବା ପାଇଁ ଦାବି ହେଉଛି।