17-Feb-2023

ବଲାଙ୍ଗୀର,-ଆଜି ବଲାଙ୍ଗୀର ଜିଲ୍ଲା ଯୋଜନା ବୋର୍ଡ ବୈଠକ ବସିଛି । ତେବେ ଏହି ବୈଠକ ବଜେଟ ପୂର୍ବରୁ ନବସି ପରେ ବସିଥିବା ତଥା ଦୀର୍ଘ ୪ବର୍ଷ ବ୍ୟବଧାନରେ ବସିଥିବା କାରଣରୁ ଏହାକୁ ଏକ ମୁଲ୍ୟହୀନ ବୈଠକ କହି ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ ବର୍ଜନ କରିଛନ୍ତି । ବିଧାୟକ ଡ.ମୁକେଶ ମହାଲିଙ୍ଗ ଏହି ବୈଠକରେ ଯୋଗଦେବାକୁ ପ୍ରଶାସନର ଚିଠି ପାଇବା ପରେ ଜିଲ୍ଲାର ଉନ୍ନୟନ ନେଇ କିଛି ସୂଚନା ପାଇଁ ଜିଲ୍ଲାପାଳଙ୍କୁ ଗତ ୧୧.୨.୨୦୨୩(୧)ରେ ବୁକ ସର୍କୁଲାର ୪୭ ଅନୁଯାୟୀ ଚିଠି କରିଥିଲେ । କିନ୍ତୁ ସଂପୂର୍ଣ୍ଣ ତଥ୍ୟ ନଦେଇ ଉତ୍ତରଦେବାକୁ ଉଚିତ ମଧ୍ୟ ମଣିଲେ ନାହିଁ । ପରନ୍ତୁ ସେହି ସୂଚନା ଜିଲ୍ଲା ଉନ୍ନୟନ ଅଧିକାରୀଙ୍କ କାର୍ଯ୍ୟାଳୟରେ ଉପଲବ୍ଧ ଥିବା କହି ବିଧାୟକଙ୍କୁ ଚିଠିର ଉତ୍ତର ଦିଆଯାଇଥିଲା । ତେଣୁ ବିଧାୟକ ଜଣେ ଜନପ୍ରତିନିଧି ହୋଇଥିଲେ ହେଁ ସୂଚନା ନଦେଇ ସରକାରୀ କଳ ମନୁମୁଖି ଭାବରେ କାର୍ଯ୍ୟକରୁଥିବା ଅଭିଯୋଗ ଉଠାଇଛନ୍ତି । ଏହା ସହିତ ଗତ ୨୦୧୯ରେ ଶେଷଥର ଜିଲ୍ଲା ଯୋଜନା ବୋର୍ଡ ବସି ମନମୁଖି ଭାବରେ ପ୍ରକଲ୍ପକାମ କରାଯାଇଥିଲା । ୨୦୨୧-୨୨ ଓ ୨୦୨୨-୨୩ ଆର୍ଥିକ ବର୍ଷର ଖସଡାକୁ ମନମୁଖି ଭାବରେ ପ୍ରସ୍ତୁତ କରି ବେଆଇନ ଭାବରେ ଏହାକୁ ଅନୁମୋଦନ କରାଯିବାକୁ ଏହି ବୈଠକ କରାଯାଇଥିବା ବିଧାୟକ ଡ.ମହାଲିଙ୍ଗ ଅଭିଯୋଗ କରିଛନ୍ତି । ବିଧାୟକଙ୍କୁ ଦିଆଯାଇଥିବା ଚିଠିରେ ଏଜଣ୍ଡୋ ନୋଟର ପଏଣ୍ଟ ନମ୍ବର୩ରେ କେଊଁ ଆର୍ଥକ ବର୍ଷର କମ୍ପ୍ରିହେନ୍ସିଭ ଡିଷ୍ଟ୍ରିକ୍ଟ ପ୍ଲାନକୁ ଜିଲ୍ଲା ଯୋଜନାକମିଟି ବୈଠକରେ ଅନୁମୋଦନ ଦିଆଯିବ ତାହା ଉଲ୍ଲେଖ ନାହିଁ । ରାଜ୍ୟ ବଟେଜ ସରିବା ପରେ ୨୦୨୩-୨୪ ଆର୍ଥିକବର୍ଷର ଯୋଜନା ପ୍ରସ୍ତୁତ କରିବା ପାଇଁ ବୈଠକ ଡାକିବା ଘଟଣା ବଲାଙ୍ଗୀର ଜଲ୍ଲାର ବିକାଶ ପାଇଁ ଇଚ୍ଛାଶକ୍ତିର ଅଭାବ ତଥା ଉପହାସ ବୋଲି ବିଧାୟକ ଡ.ମହାଲିଙ୍ଗ କହିଛନ୍ତି । ତେଣୁ ସେ ଏହି ବୈଠକକୁ ବର୍ଜନ କରିବା ସହିତ ତାଙ୍କର ପ୍ରତିବାଦକୁ ବୈଠକର ଚିଠାରେ ଉଲ୍ଲେଖ କରିବାକୁ ଚିଠି କରିଛନ୍ତି । ଏବିଷୟରେ ସେ ରାଜ୍ୟର ମୁଖ୍ୟଶାସନ ସଚିବ,ରାଜ୍ୟ ଉନ୍ନୟନ ସଚିବ,ଶିକ୍ଷାମନ୍ତ୍ରୀ ତଥା ଜିଲ୍ଲା ଯୋଜନାବୋର୍ଡ ଅଧ୍ୟକ୍ଷ ଓ ବଲାଙ୍ଗୀର ଜିଲ୍ଲାପାଳଙ୍କୁ ଚିଠିକରି ଅବଗତ କରିଛନ୍ତି ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି । ଏନେଇ ଜିଲ୍ଲା ଯୋଜନାବୋର୍ଡ ଅଧ୍ୟକ୍ଷ  କିମ୍ବା ଜିଲ୍ଲାପାଳଙ୍କ ପ୍ରତିକ୍ରୀୟା ମିଳିପାରିନାହିଁ ।