17-Feb-2023

ବଲାଙ୍ଗୀର(ପ୍ରେରଣା ଖବର)- ଆଜି ମାନ୍ୟବର ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କ ଦ୍ୱାରା ତିନୋଟି କ୍ଷୁଦ୍ର ଜଳସେଚନ ପ୍ରକଳ୍ପର ଉନ୍ନତିକରଣ ପାଇଁ ଭିତ୍ତି ପ୍ରସ୍ତର ଦିଆଯାଇଛି । ପ୍ରଥମେ ସିନ୍ଦୁରବାହାଲ ଠାରେ ୧୭.୫୧ ଲକ୍ଷ ଟଙ୍କାର ବ୍ୟୟ ଅଟକଳ, ଲର୍କିପାଲି ଠାରେ ୨୪ ଲକ୍ଷ ଟଙ୍କା ଅଟକଳ ଏବଂ ଝାଙ୍କରପାଲି ଠାରେ ୨୬ ଲକ୍ଷ ଟଙ୍କାର ବ୍ୟୟ ଅଟକଳରେ ତିନୋଟି ପ୍ରକଳ୍ପର ଭିତ୍ତି ପ୍ରସ୍ତର ଦିଆଯାଇଛି । ଅତିରିକ୍ତ ନିର୍ବାହୀ ଯନ୍ତ୍ରୀ ଲଳେନ୍ଦ୍ର ବେହେରାଙ୍କ ଉପସ୍ଥିତିରେ ଭିତ୍ତି ପ୍ରସ୍ତର ଦିଆଯାଇଥିବା ଏହି ପ୍ରକଳ୍ପ ଗୁଡିକରୁ ଏହି ଅଂଚଳରୁ ଅନେକ ଜମି ଜଳସେଚନ ହୋଇପାରିବ । ଭିତ୍ତିପ୍ରସ୍ତର ପରବର୍ତ୍ତି ସଭାରେ ଉପସ୍ଥିତ ଗ୍ରାମବାସୀମାନଙ୍କୁ

ଶ୍ରୀ ମିଶ୍ର କହିଥିଲେ ଯେ ବିଭାଗୀୟ ଯନ୍ତ୍ରୀ ଏବଂ କାର୍ଯ୍ୟନିର୍ବାହୀ ସଂସ୍ଥା ଲୋକେ ଯେପରି ଏ ପ୍ରକଳ୍ପ କାମ ଦ୍ୱାରା ଠିକ୍ ଭାବରେ ଲାଭବାନ ହୋଇପାରିବ, ଚାଷ ଜମିକୁ ଠିକ୍ ହିସାବରେ ପାଣି ଯାଇପାରିବ ସେ ଦିଗରେ ଯତ୍ନବାନ ହେବେ ବୋଲି ଅନୁରୋଧ କରିଥିଲେ । ତା ସହ ଏହି କାମ ଯେପରି ବର୍ଷା ଆସିବା ପୂର୍ବରୁ ସରି ଯାଇଥିବ ତା ଉପରେ ବିଶେଷ ଧ୍ୟାନ ଦେବାକୁ ବିଭାଗୀୟ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଥିଲେ । ଆଜିର ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ତପନ ପାଣିଗ୍ରାହୀ, ରାଧାକାନ୍ତ ଭୋଇ, ସରୋଜ ରଥ, ଶ୍ରୀଧର ବାରିକ, ବୁଲୁ ଦାନି, ଅଙ୍କିତ ସାହୁ, ଜୟନାରାୟଣ ବହିଦାର, ମନିଷ ମିଶ୍ର, ଜୁଲୁ ପଟ୍ଟନାୟକ,ଉମା ପଣ୍ଡା,  ସୌମ୍ୟଦିପ ସରାଫ ପ୍ରମୁଖ ଉପସ୍ଥିତ ଥିଲେ ।