12-Feb-2023

ବଲାଙ୍ଗିର, ବଲାଙ୍ଗୀର ସହରରେ ଜମିକାରବାରରୁ ବଟିଆଦାୟ ଓ ନିଶାକାରବାରରେ ନିଜର ପତିଆରା ଜାହିର କରିବାକୁ ବିଭିନ୍ନ ସମୟରେ ଅପରାଧ ଘଟୁଛି । ଗୋଷ୍ଠୀଗତ ଭାବରେ ଅସ୍ତ୍ରଶସ୍ତ୍ରରେ ଗୋଷ୍ଠୀ ଗୋଷ୍ଠୀ ହୋଇ ଅପରାଧିଗୋଷ୍ଠୀ ପ୍ରତିପକ୍ଷଙ୍କୁ ମରଣାନ୍ତକ ଆକ୍ରମଣ କରୁଛନ୍ତି । ବହୁ ସ୍ଥାନରେ ଗୁଳିଫୁଟୁଛି ଓ ଆଉ କେତେକ ସ୍ଥାନରେ ଖଣ୍ଡାଭୁଜାଲି ବୁଲୁଛି । ବଲାଙ୍ଗୀର ସହରରେ ଆଇନଶୃଙ୍ଖଳା ବିଗିଡିବାରେ ଲାଗିଛି । ଗତ କିଛିଦିନ ତଳେ ବଲାଙ୍ଗୀର ଶାସ୍ତ୍ରୀନଗରପଡାରେ ଜଣେ ଯୁବକଙ୍କ ଘରକୁ ପଶି ସେହି ଯୁବକ ଓ ତାର ସ୍ତ୍ରୀକୁ ୫ଜଣ ଅପରାଧି ଖଣ୍ଡାରେ ହାଣିଦେଇ ଲହୁଲୁହାଣ କରିଦେଇଥିଲେ । ସେହି ଘଟଣାର ଭିଡିଓ ଭାଇରାଲ ହୋଇଥିଲା ଯାହାକି ଲୋକଙ୍କୁ ଭୟଭିତ କରିଦେଇଛି । ଏବେ ପୁଣି ଜଣେ ଯୁବକକୁ ରେଳ ଷ୍ଟେସନଛକରେ ଖଣ୍ଡାରେ ହାଣି ଆକ୍ରମଣ କରାଯାଇଛି । ଯେଉଁ ଗୋଷ୍ଠି ଶାସ୍ତ୍ରୀନଗରରେ ଆତଙ୍କ ଖେଲାଇଥିଲେ ସେହି ଗୋଷ୍ଠିର ଆଉକିଛି ଯୁବକ ଆଜିର ଘଟଣା ଘଟାଇଛନ୍ତି । କଫସିରଫ ବ୍ୟବସାୟକୁ ନେଇ ଉଭୟ ଗୋଷ୍ଠୀ ମଧ୍ୟ ଅନେକ ସମୟରେ ଗଣ୍ଡଗୋଳ ଲାଗିରହୁଥିବା ବେଳେ ଆଜି ପେଲେସଲାଇନପଡାର ପ୍ରେମପ୍ରକାଶ ନାଏକ(୨୪)ବର୍ଷର ଜଣେ ଯୁବକକୁ ଷ୍ଟେସନଛକରେ ଖଣ୍ଡାରେ ଆକ୍ରମଣ କରାଯାଇଛି । ପ୍ରେମପ୍ରକାଶଙ୍କ ଡାହାଣହାତ ଓ ବାମଗୋଡରେ ଖଣ୍ଡାଚୋଟ ମରାଯାଇଛି । ଗୁରୁତର ଅବସ୍ଥାରେ ପୋଲିସ ପିସିଆର ଭେନ ତାଙ୍କୁ ଉଦ୍ଧାର କରି ପ୍ରଥମେ ଭୀମଭୋଇ ମେଡିକାଲକଲେଜ ହସପିଟାଲରେ ଚିକିତ୍ସା କରାଇ ପରେ ବୁର୍ଲାକୁ ସ୍ଥାନାନ୍ତର କରାଯାଇଛି । ଦେହରୁ ଅଧିକ ରକ୍ତ ବହିଯାଇସାରିଥିବା ବେଳେ ଆଘାତ ମଧ୍ୟ ଗଭୀର ରହିଛି । ତେଣୁ ବଲାଙ୍ଗୀରରୁ ତାଙ୍କୁ ବୁର୍ଲାକୁ ସ୍ଥାନାନ୍ତର କରାଯାଇଛି । ଶାସ୍ତ୍ରୀନଗର ଘଟଣାରେ ରାଜୀବନଗରର ଶ୍ରୀକାନ୍ତ ମଟାରୀ ରହିଥିବା ବେଳେ ଆଜିର ଘଟଣାରେ ତାଙ୍କ ଭାଇ ଟିକୁ ମଟାରୀ ମୁଖ୍ୟଅଭିଯୁକ୍ତ ରହିଛି । ତାଙ୍କ ବାପା ବାହାଦୂର ମଟାରୀ ମଧ୍ୟ ଜଣେ ଅଭ୍ୟାସଗତ ଅପରାଧି । ଗତ କିଛିଦିନ ତଳେ ଅନ୍ୟଗୋଷ୍ଠିର ଯୁବକମାନେ ବାହାଦୂରକୁ ମୁଣ୍ଡାରେ ଭୁଜାଲି ଚୋଟ ମାରିଥିଲେ । ଫଳରେ ସେହି ଘଟଣାର ପ୍ରତିଶୋଧ ଆଜି ନେଇଛନ୍ତି ଟିକୁ ମଟାରୀ ଓ ତା ଗୋଷ୍ଠୀର ଯୁବକ । ଉଭୟ ଗୋଷ୍ଠୀ କଫସିରଫ ଓ ମଦ ବ୍ୟବସାୟରେ ରହିଛନ୍ତି । ତେଣୁ ସେହି ବ୍ୟବସାୟରେ ପତିଆରା ଦେଖାଇବାକୁ ନେଇ ଆକ୍ରମଣ ପ୍ରତିଆକ୍ରମଣ ଲାଗିରହିଛି । ଘଟଣାପରେ  ପୋଲିସ ଅଭିଯୁକ୍ତମାନଙ୍କୁ ଗିରଫ କରୁଛି । କିନ୍ତୁ ମାମଲାକୁ ହାଲୁକା କରି ଅପରାଧିଗୋଷ୍ଠୀକୁ ଭିତିରି ଭାବରେ ସହ ଯୋଗ କରୁଥିବାରୁ ସେମାନେ ଖୁବ ଅଲ୍ପଦିନରେ ଜେଲରୁ ବାହାରି ପୁଣି ସେହି ଧନ୍ଦାରେ ରହୁଛନ୍ତି । ତେଣୁ ବଲାଙ୍ଗୀର ସହରରେ ଅପରାଧ ବଢିବଢି ଚାଲିଛି  ଓ ବଲାଙ୍ଗୀର ଏକ କ୍ରାଇମସିଟି ହେବାକୁ ବସିଛି ।  ରାଜ୍ୟର ଗୃହବିଭାଗ ତୁରନ୍ତ ଏଦିଗରେ ପଦକ୍ଷେପ ନେବାକୁ ଦାବି ହେଉଛି ।