27-Jan-2023

ବଲାଙ୍ଗୀର, ଗଣତନ୍ତ୍ର ଦିବସର ଅବ୍ୟବହିତ ପୂର୍ବରୁ ନୂଆଦିଲ୍ଲୀର ଜବାହାରଲାଲ ଷ୍ଟାଡିଅମ ଠାରେ ଜାନୁଆରୀ ୨୩ ଓ ୨୪ ଦୁଇ ଦିନ ଧରି ଆଦି ଶୌର୍ଯ୍ୟ ଔର ପର୍ବ ପରାକ୍ରମ କି ନାମକ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ଦେଶର ୨୦ ଟି ରାଜ୍ୟରୁ ୨୦ ଟି ସାଂସ୍କୃତିକ ଦଳ ଅଂଶ ଗ୍ରହଣ କରିଥିଲେ । ତେବେ ଓଡିଶା ସାଂସ୍କୃତିକ ଦଳର ନେତୃତ୍ୱ କୁନା ବାଗ ନେଇଥିଲେ ।

ସୂଚନାଯୋଗ୍ୟ ଯେ , ପ୍ରଥମ ଥର ପାଇଁ ଭାରତ ସରକାରଙ୍କ ଦ୍ୱାରା ଏଭଳି ଏକ କାର୍ଯ୍ୟକ୍ରମ ର ଆୟୋଜନ କରାଯାଇଥିଲା । ଭାରତ ସରାକରଙ୍କ ପ୍ରତିରକ୍ଷା ବିଭାଗ , ଜନଜାତି ବିଭାଗ ଓ ସଂସ୍କୃତି ବିଭାଗ ମିଳିତ ଭାବରେ ଏହି କାର୍ଯ୍ୟକ୍ରମର ଆୟୋଜନ କରିଥିଲେ ।  କାର୍ଯ୍ୟକ୍ରମ ଦୁଇଦିନ ଧରି ଅନୁଷ୍ଠିତ ହୋଇଥିଲା । ତେବେ କଳାକାରମାନେ ୧୨ ତାରିଖରୁ ଦିଲ୍ଲୀରେ ଉପସ୍ଥିତ ହୋଇ ୨୨ ତାରିଖ ପର୍ଯ୍ୟନ୍ତ ଅଭ୍ୟାସ କରିଥିଲେ । ୨୦ ଟି ରାଜ୍ୟରୁ ୨୦ ଟି ଦଳ ଯୋଗ ଦେଇଥିବା ବେଳେ ପ୍ରତି ଦଳରେ ୪୦ ଜଣ ଲେଖାଏଁ କଳାକାର ରହିଥିଲେ ।  ନେତାଜୀ ସୁବାଷ ବୋଷଙ୍କ ଶୌର୍ଯ୍ୟ ଓ ପରାକ୍ରମକୁ ମନେ ପକାଇବା ତଥା ସ୍ୱାଧିନତା ଆନ୍ଦୋଳନରେ ବିଟ୍ରିଶ ଶାସକଙ୍କ ବିରୁଦ୍ଧରେ ଲଢେଇ କରି ସହିତ ହୋଇଥିବା ଆଦିବାସୀ ବୀରମାନଙ୍କୁ ଶ୍ରଦ୍ଧାଞ୍ଚଳି ଜଣାଇବା ଉଦ୍ଧେଶ୍ୟରେ ଭାରତ ସରକାରଙ୍କ ତରଫରୁ ଏହି କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଓଡିଶାର ମୟୁରଭଂଜ ଜିଲ୍ଲାର ୪୦ ଜଣିଆ କଳାକର ଦଳ ଏହି କାର୍ଯ୍ୟକ୍ରମରେ ଯୋଗ ଦେଇ ବୁଢୀଗାଳି ନୃତ୍ୟ ପରିବେଷଣ କରିଥିଲେ । ଯାହାର ନେତୃତ୍ୱ ନେଇଥିଲେ କୁନା ବାଗ । ଓଡିଶା ଦ୍ୱାରା ପରିବେଷିତ ହୋଇଥିବା ନୃତ୍ୟ ବେଶ ପ୍ରଶଂସିତ ହୋଇଥିଲା । କାର୍ଯ୍ୟକ୍ରମରେ ଭାରତୀୟ ସେନାର ଜବାନମାନେ ବିଭିନ୍ନ ପ୍ରକାର କଳା କୌଶଳ ପ୍ରଦର୍ଶନ କରିଥିଲେ । କାର୍ଯ୍ୟକ୍ରମକୁ ଦେଶର ବିଶିଷ୍ଟ କଳାକାର ଅନୁ କପୁର ଓ ମନ୍ଦିରା ବେଦୀ ସଂଯୋଜନା କରିଥିବା ବେଳେ ବଲିଉଡର ବିଶିଷ୍ଠ କଣ୍ଠଶିଳ୍ପୀ କୈଳାଶ ଖେର ସଂଗୀତ ପରିବେଷଣ କରିଥିଲେ । ଓଡିଶା ଦଳର ନେତୃତ୍ୱ ନେଇ ବଲାଙ୍ଗୀର ପାଇଁ ଗର୍ବ ଓ ଗୌରବ ଆଣିଥିବା ଯୋଗୁଁ କୁନା ବାଗଙ୍କୁ ଦୁଲଦୁଲି କଳା ପରିଷଦର ସଭାପତି ପ୍ରଭାଷ କୁମାର ପାଣିଗ୍ରାହୀ , ସଂପାଦକ ବାସୁଦେବ ସା , ଉପଦେଷ୍ଟା ନବୀନ କୁଅଁର , ଉପ ସଭାପତି ଦୀନେଶ ଶର୍ମା , ଡ.ଲଳିତ ସାହୁ , ରୀମା ବାଗ , ସତ୍ୟବାନ ନାଗ ଓ ସମସ୍ତ ସଦସ୍ୟ ଅଭିନନ୍ଦନ ଜଣାଇଛନ୍ତି ।