14-Jan-2023

ବଲାଙ୍ଗୀର, -ବଲାଙ୍ଗୀର ଜିଲ୍ଲାରେ ମୋଟ ଜନସଂଖ୍ୟାରେ ୭୩% ଲୋକ କୃଷିଉପରେ ନିର୍ଭରଶୀଳ । ରାଜ୍ୟସରକାର ସବୁବେଳେ କୃଷି ଓ କୃଷକଙ୍କ ଉନ୍ନତିକଥା ଚିନ୍ତା କରୁଥିବା ଡିଣ୍ଡିମ ପିଟୁଛନ୍ତି । କିନ୍ତୁ ବଲାଙ୍ଗୀର ଜିଲ୍ଲାର ଚାଷୀ ସରକାରୀ ଅବହେଳାର ଶୀକାର ହୋଇ କେବଳ ମୁଣ୍ଡଟୁଙ୍ଗାରି ବସିଛନ୍ତି । ସବୁଠୁ ଚର୍ଚ୍ଚାର ବିଷୟ ହୋଇଛି ଜିଲ୍ଲାର କ୍ୟାବିନେଟ ମନ୍ତ୍ରୀ ଥିବା ଟୁକୁନୀ ସାହୁଙ୍କ ଅପାରଗତାକୁ ନେଇ । ଟୁକୁନୀ ସାହୁ ଟିଟିଲାଗଡ ନିର୍ବାଚନମଣ୍ଡଳିରୁ ଗତ ୨୦୧୪ ମସିହାରୁ ବିଧାୟିକା ଭାବରେ ନିର୍ବାଚିତ ହୋଇ ଦୁଇଥର ହେଲା କ୍ୟାବିନେଟ ମନ୍ତ୍ରୀ ହୋଇଛନ୍ତି । କିନ୍ତୁ ଦୁଖର ବିଷୟ ଯେ,ସେ ଟିଟିଲାଗଡରେ ଥିବା ଏକମାତ୍ର ସରକାରୀ ଶୀତଳଭଣ୍ଡାରକୁ ଚଳାଇବାରେ ବିଫଳ ହୋଇଛନ୍ତି । ୮କୋଟି ଟଙ୍କାରେ ନିର୍ମିର୍ତ ଏହି ଶୀତଳଭଣ୍ଡାର ଏବେ ଭୂତକୋଠି ପାଲଟିଛି । ଗତକାଲି ଜିଲ୍ଲାପରିଷଦ ବୈଠକରେ ବଲାଙ୍ଗୀର ଜିଲ୍ଲାର କୃଷିବିଭାଗର ଆଲୋଚନା କାଳରେ ଏହି କଥା ଉଠିଥିଲା । ବିଜେପିର ଜିଲ୍ଲାପରିଷଦ ସଦସ୍ୟ ଶିବଦତ୍ତ ମିଶ୍ର ଜିଲ୍ଲାରେ କେତେ ଶୀତଳଭଣ୍ଡାର ରହିଛି ଓ ସରକାରଙ୍କ କଣ ପ୍ରସ୍ତାବ ରହିଛି ବୋଲି ପ୍ରଶ୍ନ କରିଥିଲେ । ଜିଲ୍ଲା ଉଦ୍ୟାନ ବିଭାଗର ଉପ ନିର୍ଦ୍ଦେଶକ ତାଙ୍କ ଉତ୍ତରରେ ବଲାଙ୍ଗୀର ସହରରେ କେବଳ ଦୁଇଟି ଘରୋଇ ଶୀତଳଭଣ୍ଡାର ରହିଥିବା କହିଥିଲେ । ସରକାରୀ ଭାବରେ ଥିବା ବଲାଙ୍ଗୀରର ଶିତଳଭଣ୍ଡାର ଗତ ୨୦୦୦ମସିହାରୁ ବନ୍ଦ ଥିବା ଓ ଟିଟିଲାଗଡର ଶିତଳଭଣ୍ଡାର ମଧ୍ୟ ଦୀର୍ଘବର୍ଷ ହେଲା ବନ୍ଦ ଥିବା

ଉତ୍ତର ଆସିଥିଲା । ବୈଠକରେ ଟିଟିଲାଗଡ ବିଧାୟିକା ତଥା ମନ୍ତ୍ରୀ ଟୁକୁନୀ ସାହୁ ମଧ୍ୟ ଉପସ୍ଥିତ ଥିଲେ । ମନ୍ତ୍ରୀ କହିଥିଲେ ଯେ, ଟିଟିଲାଗଡ ଶୀତଳଭଣ୍ଡାରକୁ ଚଳାଇବବାକୁ କୌଣସି ପ୍ରାଇଭେଟ ପାର୍ଟି ମଙ୍ଗୁୁ ନାହାଁନ୍ତି । କିଛି ସଭ୍ୟ ଏଥିରେ ଅସନ୍ତୋଷ ବ୍ୟକ୍ତ କରି ସରକାର କାହିଁଁକି ଶୀତଳଭଣ୍ଡାରକୁ ଚଳାଉ ନାହାଁନ୍ତି ବୋଲି ପ୍ରଶ୍ନ କରିଥିଲେ ।  ଜିଲ୍ଲାପାଳ ଚଞ୍ଚଳ ରାଣା ଜିଲ୍ଲାରେ ଆଉ ୧୬ଟି ଛୋଟ ଛୋଟ ନୂଆ ଶୀତଳଭଣ୍ଡାର କରାଯାଉଥିବା ସୂଚନା ଦେଇଥିଲେ । କିନ୍ତୁ ଟିଟିଲାଗଡ ଶୀତଳଭଣ୍ଡାରକୁ ଚଳାଇବା କଥାକୁ ମନ୍ତ୍ରୀ କିମ୍ବା ଜିଲ୍ଲାପାଳ ସ୍ପଷ୍ଟ କରି ପାରିନଥିଲେ ।ଏହି ଶୀତଳଭଣ୍ଡାକୁ ଚଳାଇବାରେ ସରକାର ବିଫଳ ହୋଇଥିବା ସ୍ପଷ୍ଟ ହୋଇଯାଇଥିଲା । ଫଳରେ ଗତକାଲିର ଘଟଣାକୁ ନେଇ ଅନେକନେତା ଓ ଚାଷୀ ଅସନ୍ତୋଷ ବ୍ୟକ୍ତ କରୁଥିବା ଜଣାଯାଇଛି । 
      ପ୍ରକଶ୍ୟ ଯେ, ଟିଟିଲାଗଡ ଅଞ୍ଚଳର ବାଳକୃଷ୍ଣ ବେହେରା ଏପିକଲ ଅଧ୍ୟକ୍ଷ ଥିବା ବେଳେ ଜିଲ୍ଲାର ପିଆଜ ଓ ଅନ୍ୟାନ୍ୟ ପନିପରିବା ଚାଷୀଙ୍କ ସୁବିଧା ପାଇଁ ୮କୋଟି ଟଙ୍କାର ବ୍ୟୟଅଟକଳରେ ଟିଟିଲାଗଡ ଚାହାଁରଭଟାରେ ଏକ ମେଗା ଶିତଳଭଣ୍ଡାର ନିର୍ମାଣ କରାଇଥିଲେ । ତାଙ୍କ ମୃତ୍ୟୁ ପରେ ଏଥିରେ ଅବ୍ୟବସ୍ଥା ଦେଖାଗଲା । ନିର୍ମାଣର ଅନେକଦିନ ପର୍ଯ୍ୟନ୍ତ ଏହା ଚାଲିପାରିଲା ନାହିଁ ।  ସ୍ଥନୀୟ ଲୋକଙ୍କ ଦାବି ପରେ ଏହାକୁ କିଛିବର୍ଷ ଚଳାଗଲା । କିନ୍ତୁ ଏହାକୁ ଚଳାଉଥିବା ଏଜେନ୍ସୀ ଓ ସରକାରଙ୍କ ମଧ୍ୟରେ ତାଲମେଳ ନରହିବାରୁ ପୁଣି ଏହା ବନ୍ଦ ପଡିରହିଲା । ଏବେ ଏହାର ବହୁମୂଲ୍ୟର ମେସିନ ସବୁ ଅଚଲ ରହି ନଷ୍ଟ ହୋଇଗଲାଣି । ଟୁକୁନୀ ସାହୁ ବିଧାୟିକା ହେଲା ପରେ ଅନେକଥର ଲୋକମାନେ ଏହି ଶୀତଳଭଣ୍ଡାରକୁ ଚଳାଇବାକୁ ଦାବି କଲେଣି । ଗତ ବର୍ଷ ଏକ ବୈଷୟୀକ ଟିମ ମଧ୍ୟ ଏଠିକି ପରିଦର୍ଶନରେ ଆସିଥିଲେ । ସରକାର ଏହାକୁ ଘରୋଇ ପରିଚାଳନାରେ ଛାଡିଦେବାକୁ ଚେଷ୍ଟା ଚଳାଇଛି । କିନ୍ତୁ କୌଣସି ଘରୋଇ ପାର୍ଟି ଆସୁନାହାଁନ୍ତି ବୋଲି କୁହାଯାଉଛି । ବ୍ୟୟବହୁଳ ନିର୍ମାଣ କରି ଶେଷରେ ଘରୋଇ କମ୍ପାନୀ ଖୋଜିବାକୁ ସରକାର ଲାଗିଥିବାରୁ କୃଷକମହଲରେ ଅସନ୍ତୋଷ ଦେଖାଦେଉଛି । ସୂଚନାଯୋଗ୍ୟ ଯେ, ଟିଟିଲାଗଡ ଉପଖଣ୍ଡରେ ପ୍ରତିବର୍ଷ ହଜାର ହଜାର ଟନ ପିଆଜ ଓ ଅନ୍ୟାନ୍ୟ ପନିପରିବା  ଅମଳ ହୋଇଥାଏ । ଏହି ଅଞ୍ଚଳରେ ତାପମାତ୍ରା ଅଧିକ ରହୁଥିବାରୁ ପନିପରିବା ସଂରକ୍ଷନ ନକଲେ ପଚିଯିବାର ଆଶଂକା ରହିଥାଏ । ଟିଟିଲାଗଡ ଅଞ୍ଚଳରେ ବହୁଳ ପରିମାଣରେ ପିଆଜ ଅମଳ ହୁଏ ।  କିନ୍ତୁ ପିଆଜକୁ ସଂରକ୍ଷଣ ରଖାଯାଇପାରୁନଥିବାରୁ ପିଆଜ ଅମଳ ବେଳେ ଚାଷୀ କିଲୋ ପ୍ରତି ମାତ୍ର ୨ରୁ ୫ଟଙ୍କା ପର୍ଯ୍ୟନ୍ତ ଟଙ୍କାରେ ବିକ୍ରି କରିଦେଇଥାନ୍ତି । କେତେକ ବ୍ୟବସାୟୀ ଏହି ଅଞ୍ଚଳର ଚାଷୀ ଙ୍କଠାରୁ କମଦରରେ ପିଆଜ କିଣି ଛତିଶଗଡ ରାଜ୍ୟରେ ଥିବା ଶୀତଳଭଣ୍ଡାରରେ ସଂରକ୍ଷିତ ରଖି ପୁଣି ଚଢାଦରରେ ଏହି ଅଞ୍ଚଳକୁ ଆଣି ବିକ୍ରି କରୁଛନ୍ତି । ଚାଷୀ ମାନେ କ୍ଷତିଗ୍ରସ୍ତ ହେଉଥିବା ବେଳେ ବ୍ୟବସାୟିମାନେ ଲାଭବାନ ହେଉଛନ୍ତି । ସେହିପରି ଟମାଟୋ ଓ ଅନ୍ୟାନ୍ୟ ପନିପରିବା ମଧ୍ୟ ସଂରକ୍ଷିତ ରଖିବାର ସୁବିଧା ନଥିବାରୁ ଚାଷୀ ମାନେ ହଇରାଣ ହେଉଛନ୍ତି । ଠିକାଦାରଙ୍କ ପ୍ରୀତିରେ ରହିଥିବା ମନ୍ତ୍ରୀ ଶ୍ରୀମତୀ ସାହୁ କୃଷକଙ୍କ ସମସ୍ୟାକୁ ଅଣଦେଖା କରୁଥିବା ଅଭିଯୋଗ ହେଉଛି । ତେଣୁ ରାଜ୍ୟସରକାର ତୁରନ୍ତ ଏଦିଗରେ ଧ୍ୟାନ ଦେବାକୁ ଚାଷିମାନେ ଦାବି କରୁଛନ୍ତି ।