11-Jan-2023

ବଲାଙ୍ଗୀର(ପ୍ରେରଣା ଖବର) ନାଟକ ମାନେ ସମାଜରେ ସଚେତନତାର ବାର୍ତ୍ତା ଦେଇଥାନ୍ତି ଓ ଏକତାରେ ବାନ୍ଧି ରଖିବାରେ ସହାୟକ ହୋଇଥାନ୍ତି। ମଠଖାଇ ମହୋତ୍ସବରେ ସେଭଳି ବିଭିନ୍ନ ଭାଷାର ନାଟକ ପରିବେଷିତ ହୋଇ ଆମକୁ ସଚେତନ କରାଉଛି । ବଲାଙ୍ଗୀରର ବିକାଶ ପାଇଁ ଆମେ ସମସ୍ତେ ଏକ ହେବାର ସମୟ ଆସିଛି ବୋଲି ବଲାଙ୍ଗୀର କୋସଲ କଳାମଣ୍ଡଳ ପଡିଆରେ ଚାଲିଥିବା ସର୍ବଭାରତୀୟ ବହୁଭାଷୀ ନାଟ୍ୟମହୋତ୍ସବ ମଠଖାଇ ମହୋତ୍ସବରେ ମୁଖ୍ୟଅତିଥି ଭାବରେ ଯୋଗଦେଇ ରାଜ୍ୟ ଜଳସଂପଦ, ବାଣିଜ୍ୟ ଓ ପରିବହନ ମନ୍ତ୍ରୀ ଟୁକୁନୀ ସାହୁ କହିଛନ୍ତି । ଭୂମିକାର ବୀରେନ୍ଦ୍ର ବନଛୋରଙ୍କ ସଭାପତିତ୍ୱରେ ଅନୁଷ୍ଠିତ  ସାଂସ୍କୃତିକ ସଭାରେ ମୁଖ୍ୟଅତିଥି ଭାବରେ ମନ୍ତ୍ରୀ ଟୁକୁନୀ ସାହୁ, ସମ୍ମାନୀତ ଅତିଥି ଭାବରେ ବଲାଙ୍ଗୀର ବିଧାୟକ ତଥା ମହୋତ୍ସବ କମିଟିର ଅଧ୍ୟକ୍ଷ ନରସିଂହ ମିଶ୍ର, ଜିଲ୍ଲାପାଳ ଚଞ୍ଚଳ ରାଣା, ଏସପି ନୀତିନ କୁସଲକର ଯୋଗ ଦେଇଥିଲେ । ସଂପାଦକ ନୟନ ମହାନ୍ତି ମଞ୍ଚାସୀନ ଥିଲେ । ସଂଧ୍ୟାରେ ସଭା ପୂର୍ବରୁ ପ୍ରଥମେ ପଞ୍ଚମ ଅନୁଷ୍ଠାନର କଳାକାରମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ ।  

ଏହି ଅବସରରେ ଅଭିନୟ କ୍ଷେତ୍ରରେ ଉତ୍କର୍ଷତା ପାଇଁ ବିଶିଷ୍ଟ ମଞ୍ଚ ଅଭିନେତ୍ରୀ କନକ ଦଣ୍ଡସେନାଙ୍କୁ ମାନପତ୍ର, ଉପଢୌକନ ଓ ମୁମେଣ୍ଟୋ ଦେଇ ମଠଖାଇ ସମ୍ମାନରେ ସମ୍ମାନୀତ କରାଯାଇଥିଲା । 
          ସଭାପରେ ଭୁବନେଶ୍ୱରର ପଞ୍ଚମବେଦ ଅନୁଷ୍ଠାନ ପକ୍ଷରୁ ଆନନ୍ଦଚନ୍ଦ୍ର ପାହିଙ୍କ ଲିଖିତ ତଥା ହରେନ ସାହୁଙ୍କ ନିର୍ଦ୍ଦେଶିତ ଫୁଲ ଟେନସନ ନାଟକକୁ ମଞ୍ଚସ୍ଥ କରିଥିଲେ । ନିଜର ବଡପଣିଆ ଜାହିର କରିବାକୁ ଯାଇ ସାଂପ୍ରତିକ ମଣିଷ ଦୁଃଖ-ଆକାଂକ୍ଷା ଓ ନୈରାଶ୍ୟ ମଧ୍ୟରେ ବ୍ୟଥିତ ତଥା ଜର୍ଜରିତ । ଇର୍ଷା-ପରଶ୍ରୀକାତରତାର ବିଷଜ୍ୱାଳାରେ ନିରୀହ ମଣିଷ ଏଠି ଛଟପଟ ହୁଏ । ବଡଲୋକି ଦେଖାଇହେବାର ଅଂଧ ପ୍ରତିଯୋଗିତାରେ ମସଗୁଲ ନର୍ମଦା  ଭଳି ପତ୍ନୀମାନଙ୍କ ଚାହିଦା ପୂରଣ କରିବାକୁ ଯାଇ ଯାହା ପାଇଁ ସେ ପାଠପଢିଲା, ମଣିଷ ହେଲା ସେମାନଙ୍କୁ ଭୁଲିଯାଏ । ଅସମୟରେ ସେମାନଙ୍କ ପାଖରେ 

 ଠିଆ ହେବାକୁ କୁଣ୍ଠାପ୍ରକାଶ କରେ । ପତ୍ନୀଙ୍କ ମନ୍ତ୍ରଣାରେ ଅଫିସ କାମର ବାହାନା କରେ । ବଡଲୋକି ଦେଖାଇ ମିଛ ବଡିମା କାଢି ଏଇ ସ୍ତ୍ରୀଲୋକମାନେ ଯେ କଣ ସାବ୍ୟସ୍ତ କରିବାକୁ ଚାହାଁନ୍ତି ତାହା ଭିନ୍ନ କଥା, କିନ୍ତୁ ନିହାର ଭଳି ସ୍ୱାମୀମାନେ ପାରିବାରିକ ଜୀବନରେ ଝଡ ସୃଷ୍ଟି ହୁଏ । ଅଶାନ୍ତ ମନରେ ଜୁଆର ଆସେ । ଆସେ ଅଯଥା ଟେନସନ । ଫୁଲ ଟେନସନ । ଏଭଳି କିଛି ବିଷୟକୁ ନେଇ ନାଟକର ଅଭିନେତା ଓ ଅଭିନେତ୍ରୀଗଣ ଖୁବ ଉଚ୍ଚକୋଟିର ଅଭିନୟ କରିଥିଲେ l