04-Jan-2023

ବଲାଙ୍ଗୀର(ପ୍ରେରଣା ଖବର) ଆଜି ସ୍ଥାନୀୟ ଛତାମଖନା ସ୍ଥିତ ଯୁଧିଷ୍ଠିର ଜୁନିୟର କଲେଜରେ ଯୁବ ରେଡକ୍ରସ ଓଡିଶା ରାଜ୍ୟ ଶାଖା ପକ୍ଷରୁ ଏକ ଇଣ୍ଡକ୍ସନ ସଭା ଅନୁଷ୍ଠିତ ହୋଇଯାଇଛି । ରେଡକ୍ରସର ପ୍ରତିଷ୍ଠାତା ହେନେରୀ ଡୁନାଣ୍ଡଙ୍କ  ସ୍ଫୁଟଚିତ୍ରରେ ମାଲ୍ୟାର୍ପଣ ପୂର୍ବକ ପୂଜାର୍ଚ୍ଚନାପରେ ମଞ୍ଚାସୀନ ଅତିଥି ମାନଙ୍କ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା । ମହାବିଦ୍ୟାଳୟର ଅଧ୍ୟକ୍ଷ ଶ୍ରୀଯୁକ୍ତ ସୁଦାମ ଚରଣ ଖମାରୀଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ସମ୍ମାନୀତ ଅତିଥି ଭାବରେ ରାଜନୀତି ବିଜ୍ଞାନର ଅଧ୍ୟାପିକା ଶ୍ରୀମତୀ ପଦ୍ମାଳୟ ତ୍ରିପାଠୀ ଯୋଗ ଦେଇ ରେଡକ୍ରସର ସ୍ୱାସ୍ଥ୍ୟ, ସେବା ଓ ବନ୍ଧୁତା ଉପରେ ଗୁରୁତ୍ୱାରୋପ କରିଥିଲେ । ବଲାଙ୍ଗୀର ଜିଲ୍ଲା ଯୁବ ରେଡକ୍ରସର ଜିଲ୍ଲା ସଂଯୋଜକ ଡ. ଦୈତ୍ୟାରୀ ପୂଜାରୀ ମୁଖ୍ୟବକ୍ତା  ଭାବରେ ଯୋଗ ଦେଇ ରେଡକ୍ରସର ଉତ୍ପତ୍ତି, ଇତିହାସ, ଲକ୍ଷ୍ୟ ଓ କାର୍ଯ୍ୟପନ୍ଥା ବିଷୟରେ ଉପସ୍ଥିତ ସ୍ୱେଚ୍ଛାସେବୀମାନଙ୍କୁ ବିଶଦ୍ ଭାବରେ ଅବଗତ କରାଇଥିଲେ । ଅନ୍ୟତମ ଅତିଥି ଭାବରେ ଓଡିଆ ଅଧ୍ୟାପିକା ଶ୍ରୀମତୀ ଚାରୂଲତା ମିଶ୍ର ଯୋଗ ଦେଇ ରେଡକ୍ରସରେ ସ୍ୱେଚ୍ଛାସେବୀ ଭାବରେ ଅଂଶ ଗ୍ରହଣ କଲେ କି କି ଲାଭ ହେବ ସେ ବିଷୟରେ ଆଲୋଚନା କରିଥିଲେ । ଉକ୍ତ ଅନୁଷ୍ଠାନରେ ଏହି ବର୍ଷ ପାଇଁ ଯୁକ୍ତ ଦୁଇ ପ୍ରଥମ ବର୍ଷ ଛାତ୍ର ଛାତ୍ରୀମାନଙ୍କୁ ନେଇ ଦୁଇଟି ଶାଖା ଖୋଲାଯାଇଅଛି । ପ୍ରତ୍ୟେକ ଶାଖାରେ ୩୦ଜଣ ଲେଖାଏଁ ସ୍ୱେଚ୍ଛାସେବୀ ଅଂଶଗ୍ରହଣ କରିଛନ୍ତି । ସଂପୂର୍ଣ୍ଣ କାର୍ଯ୍ୟକ୍ରମକୁ ଖେଳ ଶିକ୍ଷକ ପ୍ରେମାନନ୍ଦ ବିଶି ପରିଚାଳନା କରିଥିଲେ । ଡ. ଧନଞ୍ଜୟ ସେଠ ଡ. ପବିତ୍ର କୁମାର ଦଣ୍ଡସେନା ଦୂର୍ବାଦଳ ମିଶ୍ର, ଦୀଗାମ୍ବର ପାଣ୍ଡେ, ଦୁଃଖୀଶ୍ୟାମ ବାଗ ପ୍ରମୁଖ ସହ ଯୋଗ କରିଥିଲେ । ମଞ୍ଚାସୀନ ଅନ୍ୟତମ ବକ୍ତା ଅର୍ଥନୀତି ବିଭାଗର ଅଧ୍ୟାପକ ଶ୍ରୀଯୁକ୍ତ ରାଧାକାନ୍ତ ସାହୁଙ୍କ ଧନ୍ୟବାଦ ଅର୍ପଣ ପରେ ସଭାକାର୍ଯ୍ୟ ସମାପିତ ହୋଇଥିଲା ।