17-Dec-2022

ତରଭା(ପ୍ରେରଣା ଖବର)-ତରଭା ବ୍ଲକ ଅନ୍ତର୍ଗତ ମେଣ୍ଡା ତ୍ରୀବେଣୀଛକରେ ବାରପାହାଡ ମହୋତ୍ସବ ଓ କଂସଦରବାର ଅନୁଷ୍ଠିତ ହେଉଛି । ମେଣ୍ଡା,ଦେଉଳପଦର,ପାଇକବାହାଲ ପଞ୍ଚାୟତର ଉତ୍ସାହୀ ଯୁବକମାନଙ୍କ ଦ୍ୱାରା ଏହା ଆୟୋଜିତ ହେଉଛି । ମହୋତ୍ସବ ଅବସରରେ ମୀନାବଜାର ଲାଗିଛି । ଫଳରେ ହଜାର ହଜାର ଦର୍ଶକ ଏଠାରେ ସମ୍ମିଳିତ ହେଉଛନ୍ତି । ମେଣ୍ଡା ଗଡତୀଅଞ୍ଚଳର ଇଷ୍ଟଦେବୀ ବାରପାହାଡଙ୍କ ନାମରେ ମହୋତ୍ସବ ନାମକରଣ କରାଯାଇଛି । ମହୋତ୍ସବରେ କଂସଦରବାର ସହିତ ସାଂସ୍କୃତିକ କାର୍ଯ୍ୟକ୍ରମ କରାଯାଉଛି । ପ୍ରଥମଦିନରେ ତରଭା ଥାନାଧିକାରୀ ସୁବ୍ରତକୁମାର ପାଣିଗ୍ରାହୀ ମୁଖ୍ୟଅତିଥି ଭାବରେ ଯୋଗଦେଇ ଏହି ମହୋତ୍ସବକୁ ଉଦଘାଟନ କରିଥିଲେ । ଦ୍ୱିତୀୟଦିନରେ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡାଙ୍କ ସଭାପତିତ୍ୱ ଓ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ସୁବର୍ଣ୍ଣପୁର ଅତିରିକ୍ତ ଜିଲ୍ଲାପାଳ ସୂର୍ଯ୍ୟନାରାୟଣ ଦାସ,ସମ୍ମାନୀତ ଅତିଥି ଭାବରେ ଜିଲ୍ଲାପରିଷଦ ଅଧ୍ୟକ୍ଷା ଅଞ୍ଜଳି କମ୍ପ,ମେଣ୍ଡା ଗ୍ରାମପଞ୍ଚାୟତର ସମିତିସଭ୍ୟା ଲକ୍ଷ୍ମୀପ୍ରୀୟା ମିଶ୍ର,ପାଇକବାହାଲ ସମିତିସଭ୍ୟ ରାଜକିଶୋର ଭୋଇ ଯୋଗଦେଇଥିଲେ । ମୁଖ୍ୟଅତିଥି ଶ୍ରୀ ଦାସ ତାଙ୍କ ବକ୍ତବ୍ୟରେ ବାରପାହାଡ ରିଜର୍ଭଜଙ୍ଗଲରେ ଥିବା ଦେବୀ ବାରପାହାଡଙ୍କ ପୀଠର ଉନ୍ନତିକରଣ ଓ ପର୍ଯ୍ୟଟନସ୍ଥଳି ପାଇଁ  ହେଉଥିବା ଦାବିକୁ ପ୍ରଶାସନ ପଦକ୍ଷେପ ନେବ ବୋଲି କହିଥିଲେ । ଏହା ସହିତ ବିଭିନ୍ନ ସ୍ଥାନରେ ହେଉଥିବା କଂସଦରବାର ହେଉଛି ଅସତ୍ୟ ଉପରେ ସତ୍ୟର ବିଜୟକୁ ପ୍ରତିଫଳିତ କରୁଥିବା ଏକ ସଚେତନତା କାର୍ଯ୍ୟକ୍ରମ ବୋଲି କହିଥିଲେ । କଂଦରବାରରେ କଂସ ଭୂମିକାରେ ଥିବା ବଲାଙ୍ଗୀର ଜିଲ୍ଲା ଫଟକରାଗ୍ରାମର ଅନୀଲ ନାଏକ ଓ ତାଙ୍କ ଟିମର ଅଭିନୟ ଖୁବ ଉଚ୍ଚକୋଟିର ହେଉଛି ଯାହାକି ଦର୍ଶକଙ୍କୁ କାର୍ଯ୍ୟକ୍ରମ ପ୍ରତି ଲୋକଙ୍କୁ ଆକର୍ଷିତ କରୁଛି । ଆସନ୍ତା ୧୯ ତାରିଖ ପର୍ଯ୍ୟନ୍ତ ଏହି ମହୋତ୍ସବ ଚାଲିବ ଓ ଏଥିରେ ପ୍ରଶାସନିକ ଅଧିକାରୀଗଣଙ୍କ ସହିତ ସୋନପୁର ବିଧାୟକ ତଥା ଅର୍ଥମନ୍ତ୍ରୀ ନିରଂଜନ ପୂଜାହାରୀ ମଧ୍ୟ ଯୋଗଦେବାର କାର୍ଯ୍ୟକ୍ରମ ରହିଛି । ମହୋତ୍ସବକୁ ଯୁବନେତା ରାଜେନ୍ଦ୍ର ପଣ୍ଡା,ତରଭା ବ୍ଲକଅଧ୍ୟକ୍ଷ ସରୋଜ କମ୍ପ,ପାଇକବାହାଲ ସରପଞ୍ଚଗଣନାଥ ସାହୁ,ସାଗରତଳଗୋଠର ରାମଶଙ୍କର ମହାପାତ୍ର,ଗଜେନ୍ଦ୍ର ମେହେର,ମେଣ୍ଡାର ପୂର୍ବତନ ସରପଞ୍ଚହୃଷିକେଶ ପାତ୍ର,ପାଇକବାହାଲର ଚକ୍ରଧର ସା,ହୃଷିକେଶ ପଣ୍ଡା,ରାଜପାଲିର ମଦନମୋହନ ପଣ୍ଡା,ବ୍ରାହ୍ମଣୀପାଲିର ଭାଗିରଥି ସାହୁ,ରାଜୀବ ପଣ୍ଡା ପ୍ରମୁଖ ପରିଚାଳନା କରୁଛନ୍ତି ।