08-Nov-2022

ସିନ୍ଧେକେଲା (ଅନୀଲ କୁମାର ତ୍ରିପାଠୀ) ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ସିନ୍ଧେକେଲା ଅଞ୍ଚଳର ଇଷ୍ଟଦେବୀ ମାଁ ଦ୍ବାରସେହ୍ନୀଙ୍କ ମନ୍ଦିର ନିକଟରେ କାହିଁ କେତେ ଆବାହମାନ କାଳରୁ ୧୮ ଏକର ବିଶିଷ୍ଟ ବାଣୀବଘାର ପୋଖରୀ ରହିଛି । ଏହି ପୋଖରୀ ଆରାଧ୍ୟା ଦେବୀ ମାଁଙ୍କ ମନ୍ଦିର ନିକଟରେ ଥିବାରୁ ଅଞ୍ଚଳର ଲୋକେ ପବିତ୍ର ପୁଷ୍କରିଣୀର ଆଖ୍ୟା ଦିଅନ୍ତି। ହେଲେ ଶତାବ୍ଦୀ ଶତାବ୍ଦୀ ଧରି ନିଜ ସ୍ଥିତି ବଞ୍ଚାଇ ରଖିବାସହ ସିନ୍ଧେକେଲା ଅଞ୍ଚଳର ମାଟି ତଳର ପାଣିର ସ୍ତରକୁ ଠିକ ରଖିବାରେ ସହାୟକ , ଦୈନନ୍ଦିନ କର୍ମ ପାଇଁ ଏ ପୋଖରୀ ଉପରେ ସିନ୍ଧେକେଲା ତଥା ଆଖପାଖ ଗାଁ ମାନଙ୍କର ୯୦ % ଲୋକ ନିର୍ଭରଶୀଳ ତେଣୁ ଏ ପୋଖରୀ ସିନ୍ଧେକେଲା ଅଞ୍ଚଳର ଜୀବନ ବିନ୍ଦୁ ବୋଳି ମଧ୍ଯ ଲୋକେ କହନ୍ତି। କିନ୍ତୁ ବର୍ତ୍ତମାନ ପୋଖରୀର ଅବସ୍ଥା ଖରାପ,

ପୋଖରୀର ପାଣୀ ପାଟିରେ ନେଇ କୁଲି କରିବା ତ ଦୁରର କଥା ଗାଧୋଇଲେ ଚର୍ମ ରୋଗ ସୁନିଶ୍ଚିତ। ଏ ପୋଖରୀରେ ଏବେ ପଦ୍ମଫୁଲ ଓ କଇଁଫୁଲ ର ପତ୍ର ଓ ଅନାବନା ଘାସ ଖାଳି ଦେଖାଯାଉଛି ଫଳରେ ତାହା ପାଣିରେ ପଚିଯାଇ ଦୁର୍ଗନ୍ଧ ସହ ବିଭିନ୍ନ କିଟ ସୁଳୁବୁଳୁ ହେଉଥିବାରୁ ବାଣୀବଘାର ଉପରେ ନିର୍ଭର କରୁଥିବା ଲୋକେ ନାହିଁ ନ ଥିବା ହଇରାଣ ହରକତ ହେଉଛନ୍ତି। ଏହି ପୋଖରୀ ବର୍ଷ ବର୍ଷ ଧରି ମାଛଚାଷ ଦ୍ବାରା ପଞ୍ଚାୟତ ପ୍ରଶାସନ କୁ ଲକ୍ଷ ଲକ୍ଷ ଟଙ୍କାର ରାଜସ୍ବ ଦେଉଥିଲେ ହେଁ ପୋଖରୀର ଉନ୍ନତୀକରଣ ପାଇଁ କୌଣସି ପଦକ୍ଷେପ ନିଆଯାଇ ନ ଥିବାରୁ ଏହି ପବିତ୍ର ପୋଖରୀ ଏବେ ଶ୍ରୀହୀନ ହୋଇ ଚର୍ମ ରୋଗ ର କାରକ ପାଳଟୁଥିବା ଲୋକେ ଅଭିଯୋଗ କରିଛନ୍ତି । ସିନ୍ଧେକେଲା ଅଞ୍ଚଳ ଟିଟିଲାଗଡ ନିର୍ବାଚନ ମଣ୍ଡଳୀରେ ଥିବା ସମୟରେ ଟିଟିଲାଗଡ ବିଧାୟକ ଯୋଗେନ୍ଦ୍ର ବେହେରା ଙ୍କ ସମୟରେ ଓଡିଶାର ମୁଖ୍ଯମନ୍ତ୍ରୀ ନବୀନ ପଟ୍ଟନାୟକ ସିନ୍ଧେକେଲା ପଲ୍ଲିଶ୍ରୀ ଖେଳପଡିଆ ରେ ଏକ କାର୍ଯ୍ୟକ୍ରମ ରେ ଯୋଗଦେଇ ସିନ୍ଧେକେଲା ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ଦ୍ବାରସେହ୍ନୀଙ୍କ ଦର୍ଶନ କରିବାପାଇଁ ମନ୍ଦିର ଯାଇ ଫେରିବା ସମୟରେ ଏହି ପୋଖରୀର ପୁନରୁଦ୍ଧାର ପାଇଁ ବିଧାୟକଙ୍କ ଜରିଆରେ ନିବେଦନ କରାଯାଇଥିଲା। ଏବଂ  ସେହି ସମୟରେ ପୋଖରୀର ପୁନରୁଦ୍ଧାର କରାଯାଇଥିଲା । ତା ପରେ କେବଳ ଠିକାଦାର ଓ କର୍ମୀ ପୋଷା ନୀତିରେ କେବଳ ପାହାଚ ଓ ଗାର୍ଡୱାଳ କାମ ଛଡା ପାଖାପାଖି ଆଜିକୁ ଦୁଇ ଦଶନ୍ଧି ହେଲା ଆଉ ପୋଖରୀର ପୁନରୁଦ୍ଧାର କିମ୍ବା ଉନ୍ନତିକରଣ କରାଯାଇ ନ ଥିବା ଫଳରେ ପବିତ୍ର ପୋଖରୀ ଏବେ ଦୁଷିତ ଅବସ୍ଥାରେ। ଗୁରୁତ୍ବପୂର୍ଣ୍ଣ କଥାହେଲା ପ୍ରତିବର୍ଷ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ଯୋଉ ପୋଖରୀ ମାନଙ୍କ ବ୍ୟବହାର କାଁଭାଁ ହୋଇଥାଏ ସେହି ପୋଖରୀ ମାନଙ୍କ ପୁନରୁଦ୍ଧାର କାର୍ଯ୍ୟକ୍ରମ ହୋଇପାରୁଛି ହେଲେ ଯୋଉ ପୋଖରୀ ସିନ୍ଧେକେଲାର ଜୀବନ ବିନ୍ଦୁ ସେହି ପୋଖରୀ ଏବେ କାହିଁକି ଅଲୋଡା ହୋଇ ପଡିଛି। ବଙ୍ଗୋମୁଣ୍ଡା ବ୍ଲକ ଅଧ୍ୟକ୍ଷା ରଞ୍ଜୁବାଲା

ବେହେରାଙ୍କୁ ପଚାରିବାରୁ ସେ ବ୍ଲକ ପାଣ୍ଠିରୁ କେବଳ ୧୦ ଲକ୍ଷ ଟଙ୍କା ପର୍ଯ୍ୟନ୍ତର କାମ କରା ଯାଇପାରିବ ବାଣୀଭଗାର ପୁଷ୍କରିଣୀ ୧୮ ଏକର ବିଶିଷ୍ଟ ଥିବାରୁ ଏମଆଇ ବିଭାଗ କିମ୍ବା ପଶ୍ଚିମ ଓଡିଶା ବିକାଶ ପରିଷଦ ତରଫରୁ କାମ କରାଯାଇ ପାରିବ ତେଣୁ ଆମ ତରଫରୁ ଆମେ ବିଧାୟକଙ୍କ ନଜରକୁ ଆଣି ଆଗକୁ ପୁଷ୍କରିଣୀ କୁ ପୁନରୁଦ୍ଧାର ପାଇଁ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଇ ପଦକ୍ଷେପ ନେବୁ ବୋଳି କହିଥିଲେ। ଏହି ପୋଖରୀ ବିନା ସିନ୍ଧେକେଲା ଜନସାଧାରଣ, ବିଭିନ୍ନ ପଶୁପକ୍ଷୀ, ଗାଁର ଜଳସ୍ତର ସମସ୍ତେ ପ୍ରଭାବିତ ହେବାର ଆଶଙ୍କା ଥିବାରୁ ଏ ଉପରେ ଜିଲ୍ଲା ପ୍ରଶାସନ , ଜଳସମ୍ପଦ ମନ୍ତ୍ରୀଙ୍କ ସହ ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ ମଧ୍ଯ ଅସୁବିଧାର ହୃଦୟଙ୍ଗମ କରିବାସହ ଶିଘ୍ର ପଦକ୍ଷେପ ନେଇ ପୁଷ୍କରିଣୀର ପୁନରୁଦ୍ଧାର କରିବାପାଇଁ ଜନସାଧାରଣ ଦାବି କରିଛନ୍ତି ।