06-Nov-2022

ବିନିକା(ହିମାଂଶୁ ଶେଖର ପୁଟେଲ) ବିନିକା ସହର ସମେତ ବ୍ଳକ ଅଞ୍ଚଳବାସୀଙ୍କୁ ଉତ୍ତମ ସେବା ଯୋଗାଇଦେବା ଓ ସ୍ବାସ୍ଥ୍ୟ କ୍ଷେତ୍ରରେ ବୈପ୍ଲବିକ ପରିବର୍ତ୍ତନ ଆଣିବା ନେଇ ଜାତୀୟ ସ୍ବାସ୍ଥ୍ୟ ମିଶନ ଯୋଜନା ତରଫରୁ ୩କୋଟି ୨୯ଲକ୍ଷ ୧୦ହଜାର ଟଙ୍କା ଅନୁଦାନରେ ନବ ନିର୍ମିତ ଗୋଷ୍ଟି ସ୍ବାସ୍ଥ୍ୟ କେନ୍ଦ୍ରର କୋଠାଘରକୁ ଗତ ଅଗଷ୍ଟ ୧୬ତାରିଖରେ ମାନ୍ୟବର ବଲାଙ୍ଗୀର ସାଂସଦ ସଙ୍ଗୀତା କୁମାରୀ ସିଂଦେଓ ଏବଂ  ମାନ୍ୟବର ବୀରମହାରାଜପୁର ବିଧାୟକ ପଦ୍ମନାଭ ବେହେରା ଉଦ୍ଘାଟନ କରିଥିଲେ । ଏହି ଅବସରରେ ଅନୁଷ୍ଟିତ କାର୍ଯ୍ୟକ୍ରମରେ ସୁବର୍ଣ୍ଣପୁର ଜିଲ୍ଲାପାଳ ଅବୋଲି ସୁନୀଲ ନରୱନେ,ଜିଲ୍ଲା ମୁଖ୍ୟ ଚିକିତ୍ସାଧିକାରୀ ବିଶ୍ବରଂଜନ ପତି,ବିନିକା ଡାକ୍ତରଖାନା ଚିକିତ୍ସାଧିକାରୀ ଡ.ଅଂଶୁମାଲିନି ପଣ୍ଡା ଏବଂ  ଅଞ୍ଚଳର ବହୁ ମାନ୍ୟଗଣ୍ୟ ବ୍ୟକ୍ତି ବିଶେଷ ଉପସ୍ଥିତ ଥିଲେ  l କିନ୍ତୁ ଅତ୍ୟନ୍ତ ପରିତାପର ବିଷୟ ବିନିକା ଏନଏସି ମୁଖ୍ୟରାସ୍ତା ଅର୍ଥାତ ସହରବାସୀଙ୍କ ପାଇଁ ବ୍ୟବହୃତ ରାସ୍ତାରୁ ଉକ୍ତ ନୂତନ ଗୋଷ୍ଟି ସ୍ବାସ୍ଥ୍ୟ କେନ୍ଦ୍ରକୁ ପାଦଚଲା ରାସ୍ତାଟିଏ ନଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।ସୂଚନା ଯୋଗ୍ୟ ଯେ ପୁରୁଣା ବସଷ୍ଟାଣ୍ଡ ଠାରୁ ତହସିଲ ଅଫିସ ପର୍ଯ୍ୟନ୍ତ ସହର ମୁଖ୍ୟରାସ୍ତା ପାର୍ଶ୍ବରେ ସରକାରୀ ବାଳକ ଉଚ୍ଚ ବିଦ୍ୟାଳୟ,ବାଳିକା ଉଚ୍ଚ ବିଦ୍ୟାଳୟ,ସେବା ସମବାୟ ସମିତି,ରାଜସ୍ବ ବିଭାଗ ଥିବାବେଳେ,ଟେଲିଫୋନ ବିଭାଗ,ମହିଳା ମହାବିଦ୍ୟାଳୟ,ପଞ୍ଜାବ ନ୍ୟାସନାଲ,କୃଷି ସମବାୟ ବ୍ୟାଙ୍କ ଏବଂ ଗୌରପଡ଼ା,ଚଣ୍ଡୀପଡ଼ା,କୁଲି ପଡ଼ା, କଂସାରି ପଡ଼ା,ବିନିକା ପଡ଼ା,ମାରୱାଡ଼ି ପଡ଼ା,ଦଣ୍ଡସେନା ପଡ଼ା,ଦୈନନ୍ଦିନ ବଜାର ଆଦି ସଂଯୋଗ କରୁଛି ।ଏହା ବ୍ୟତୀତ ଏହି ରାସ୍ତାରେ ଅନେକ ଛୋଟବଡ ବ୍ୟବସାୟୀକ ପ୍ରତିଷ୍ଠାନ ରହିଥିବାରୁ ରାସ୍ତାଟି ଜନବହୁଳ ରାସ୍ତାରେ ପରିଣତ ହୋଇଛି ।ଭଗବାନ ନ କରନ୍ତୁ ଯଦି କୌଣସି ଅଘଟଣ ଘଟିଲା ତେବେ ସେହି ମାନଙ୍କୁ ଡାକ୍ତରଖାନାରେ ଭର୍ତ୍ତି କରିବା ମସ୍କିଲ ହୋଇ ପଡ଼ିବ କାରଣ ପାଦଚଲା ରାସ୍ତା ନଥିବାରୁ ଥାନା ପଛପଟ କିମ୍ବା ତହସିଲ ଅଫିସ ରାସ୍ତାଦେଇ ବୁଲିବା ପରେ ମୁଖ୍ୟ ରାସ୍ତାରୁ ଏକମାତ୍ର ଗେଟ ଯୋଗେ ଡାକ୍ତରଖାନାକୁ ଯିବାକୁ ହେବ । ଅନ୍ୟ ପକ୍ଷରେ ବର୍ତ୍ତମାନ ସୋନପୁର-ବିନିକା-ଡୁଙ୍ଗୁରିପାଲି ମୁଖ୍ୟରାସ୍ତାରେ ପ୍ରତ୍ୟେକ ଦିନ ହଜାର ହଜାର ସଂଖ୍ୟାରେ ବିଭିନ୍ନ ପ୍ରକାରର ଯାନବାହାନ ଚଳାଚଳ କରୁଥିବାରୁ ଏହି ରାସ୍ତାଦେଇ ସହରର ବୃଦ୍ଧ, ବୃଦ୍ଧା, ଅସହାୟ, ବିକଳାଙ୍ଗ ଡାକ୍ତରଖାନାକୁ ଚିକିତ୍ସା ପାଇଁ ଆସିବା କଷ୍ଟକର ହୋଇପଡୁଥିବା ଜଣାପଡିଛି ।ବର୍ତମାନ ଏହି ମୁଖ୍ୟରାସ୍ତା କାମ ଆରମ୍ଭ ହୋଇଥିବାରୁ ଆଗାମୀ ଦିନରେ ଗାଡ଼ି ମଟର ଯିବା ଆସିବା ସଂଖ୍ୟା ବୃଦ୍ଧି ପାଇବ । ତେଣୁ ଏହି ପରିପ୍ରେକ୍ଷୀରେ ସହରବାସୀଙ୍କ ଜରୁରୀ ଚିକିତ୍ସା ନିମନ୍ତେ ସହର ପଟରୁ ଜଣେ/ଦୁଇ ଜଣ ରୋଗୀଙ୍କ ଯିବା ଆସିବା ଭଳିଆ ମୋଭିଂ ଗେଟ ଦିଆଗଲେ ସବୁ ବର୍ଗର ଲୋକେ ତୁରନ୍ତ ଚିକିତ୍ସା ସେବା ପାଇପାରିବେ । ସ୍ବାସ୍ଥ୍ୟ ଅମୂଲ୍ୟ ସମ୍ପଦ ହୋଇଥିବାରୁ ତୁରନ୍ତ ଜିଲ୍ଲାପ୍ରଶାସନ ଏ ଦିଗରେ ଦୃଷ୍ଟି ଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି ହେଉଛି ।