23-Sep-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ )  ବଲାଙ୍ଗୀର ବନ ଡିଭିଜନର ପାଟଣାଗଡ ରେଞ୍ଜ୍ ଅନ୍ତର୍ଗତ ଖପ୍ରାଖୋଲ ବ୍ଲକ୍ ର ବାଘମୁଣ୍ଡ ପଞ୍ଚାୟତର ବାନ୍ଧନମାଲ ଗ୍ରାମର ଗ୍ରାମବାସୀମାନେ ସେଠାକୁ ହାତୀ ଘଉଡାଇବାକୁ ଯାଇଥିବା ପାଟଣାଗଡ ରେଞ୍ଜର ଆନନ୍ଦ ଚନ୍ଦ୍ର ବିଶିଙ୍କ ସମେତ ୬ ଜଣ ବନକର୍ମଚାରୀଙ୍କୁ ଗତ ୧୯ ତାରିଖରେ ଗାଁ'ରେ ଅଟକ ରଖି ସେମାନେ ୮ ମାସ ହେଲା ସେମାନେ ଗତ ଜାନୁଆରୀ ମାସରେ କରିଥିବା ମନରେଗା କାମର ମଜୁରୀ ନ ପାଇ ବାରମ୍ବାର ପାଟଣାଗଡ ରେଞ୍ଜ ଅଫିସ୍ କୁ ଧାଇଁ ନିରାଶ ହୋଇପଡିଥିଲେ । ଅଭିଯୋଗ ଅନୁଯାୟୀ ,  ମାଟିଖୋଳା ବାବଦରେ ବାନ୍ଧନମାଲ ଓ ବାଘମୁଣ୍ଡ ଗ୍ରାମର ୬୦ / ୭୦ ଜଣ ଶ୍ରମିକଙ୍କର ପ୍ରାପ୍ୟ ବାବଦକୁ ୮ ଲକ୍ଷ ୬୩ ହଜାର ଟଙ୍କା ସେମାନଙ୍କୁ ଦିଆ ନଯାଇ ଅନ୍ ଲାଇନ୍ ରେ ଉଠାଇ ନିଆଯାଇଥିଲା । ଏହା ପୂର୍ବରୁ ଜଣେ ଫରେଷ୍ଟ୍ ଗାର୍ଡ ଆସି ସେମାନଙ୍କଠାରୁ ଦସ୍ତଖତ କରାଇ ନେଇ ଯାଇଥିଲେ । ସ୍ଥାନୀୟ କିଓସ୍କ ବ୍ୟାଙ୍କରେ ଏହା କରାଯାଇଥିଲା । ଉତ୍ତ୍ୟକ୍ତ ଶ୍ରମିକମାନେ ଦୀର୍ଘ ୯ ଘଣ୍ଟାକାଳ ବନଅଧିକାରୀମାନଙ୍କୁ ଅଟକ ରଖିବା ପରେ ଫୋନ୍ ରେ ବଲାଙ୍ଗୀର ଡିଏଫଓ ନୀତିଶ କୁମାର ସେମାନଙ୍କୁ ପାଉଣା

ମିଳିବାର ପ୍ରତିଶ୍ରୁତି ଦେବାପରେ ଲରମ୍ଭା ଥାନାଧିକାରୀ ସେମାନଙ୍କୁ ବୁଝାଇବା ପରେ ଅଟକ କର୍ମଚାରୀଙ୍କୁ ଲୋକେ ଛାଡିଥିଲେ । ପରଦିନ ବାନ୍ଧନମାଲ ଗ୍ରାମରେ ରେଞ୍ଜର ଓ ଗ୍ରାମବାସୀଙ୍କ ମଧ୍ୟରେ ଏକ ବୈଠକ ବସି ବ୍ୟାଙ୍କ ଷ୍ଟେଟ୍ ମେଣ୍ଟ ଇତ୍ୟାଦିର ଯାଞ୍ଚ କରାଯାଇଛି । ଅସଲ ତଥ୍ୟ ଅଦ୍ୟାବଧି ବାହାରି ନାହିଁ ଓ ବିଭାଗ ତରଫରୁ ଘଟଣାର ସମାଧାନ ନିମନ୍ତେ ଉଦ୍ୟମ କରାଯାଉଥିଲେ ହେଁ , ପ୍ରକୃତରେ ଦୋଷୀମାନଙ୍କୁ ଘଣ୍ଟଘୋଡାଯାଉଥିବା ଅଭିଯୋଗ କରାଯାଉଛି ।

ଏହା ମନରେଗାର ଶ୍ରମଭିତ୍ତିକ ଯୋଜନାରେ ବିଭାଗୀୟ ବାଟମାରଣାର ' ଭାତହାଣ୍ଡିରୁ ଗୋଟିଏ ' ପରି  ଏକ ଘଟଣା ହୋଇଥିଲେ ହେଁ , ସର୍ବତ୍ର ଉପରୁ ତଳସ୍ତରର ସମ୍ପୂର୍ଣ୍ଣ ଜ୍ଞାତସାରରେ ଚାଲିଆସୁଥିବା ବହୁଦିନରୁ ଅଭିଯୋଗ ପ୍ରକାଶ ପାଇ ଆସୁଛି ।  ଏହାପୂର୍ବରୁ ଲାଠୋରର କନ୍ଦାଗାଡ ,  ଭାଲୁକନା , କଣ୍ଟାବାଞ୍ଜିର ବିଭିନ୍ନ ଅଞ୍ଚଳ ଏବଂ ଆହୁରି ଅନେକ ଅଭିଯୋଗ ଗଣମାଧ୍ୟମରେ ପ୍ରକାଶ ପାଇ ଆସୁଛି । ମୁଖ୍ୟତଃ ଜାଲ୍ ଶ୍ରମିକ ଓ ମିଥ୍ୟାଶ୍ରମଦିବସ ରେକର୍ଡପତ୍ରରେ ଦର୍ଶାଯାଇ   ଏପରି କୋଟି କୋଟି ଟଙ୍କାର ବିଭାଗୀୟ ବାଟମାରଣା ବର୍ଷ ବର୍ଷ ଧରି ଚାଲିଆସୁଥିଲେ ହେଁ , ହାତ ଚିକ୍କଣ କରି ବିଭାଗର ବଡବଡିଆମାନେ ଦୁର୍ନୀତିକୁ ଚପାଇ ଆସୁଥିବା ଚର୍ଚ୍ଚା ହେଉଛି ।

ଅନୁସନ୍ଧାନରୁ ପ୍ରକାଶ ଯେ ,ଉକ୍ତ କାମରେ ଆଦୌ ଶ୍ରମିକଙ୍କର ଆକାଉଣ୍ଟ୍ ଖୋଲାଯାଈ ନଥିଲା । ଇତିମଧ୍ୟରେ ତତ୍କାଳୀନ ରେଞ୍ଜର ବଦଳି ହୋଇ ଯାଇଥିବାବେଳେ ଫରେଷ୍ଟରଙ୍କୁ ଏକ ଲାଞ୍ଚ ମାମଲାରେ ନିଲମ୍ଵିତ କରାଯାଇଛି । ସମ୍ପୃକ୍ତ ଗାର୍ଡ ଜଣକୁ ଘଣ୍ଟଘୋଡାଇ ବର୍ତ୍ତମାନର ରେଞ୍ଜର ଶ୍ରୀ ବିଶି ଆମ ପ୍ରତିନିଧି ପଚାରିବାରୁ  ତା'ର ବଦଳି ହୋଇଯାଇଥିବା ସଫେଇ ଦେଇଛନ୍ତି । ଏହି ମନରେଗା ଶ୍ରମିକଙ୍କ ଏତେ ପରିମାଣର ଲକ୍ଷାଧିକ ମଜୁରୀ ଟଙ୍କା ଦୀର୍ଘ ୯ ମାସ ଧରି ହଡପ କରାଯାଇ ସେହି ରେଞ୍ଜର , ଫରେଷ୍ଟରଙ୍କ ସମେତ ଗାର୍ଡଙ୍କୁ ଅନ୍ୟତ୍ର ସ୍ଥାନାନ୍ତରିତ କରାଯାଇଥିଲେ ହେଁ , ଡିଏଫଓ କେମିତି ଜାଣି ନଥିଲେ  ଓ ଏବେ ସେହିଟଙ୍କା କେଉଁଠୁ ଆଣି ଶ୍ରମିକମାନଙ୍କୁ ପାଉଣା ଦିଆଯିବ , ପ୍ରଶ୍ନ ଉଠୁଛି  ?

ଏହାସହିତ ବଲାଙ୍ଗୀର ବନବିଭାଗର ଅନ୍ୟାନ୍ୟ ସମସ୍ତସ୍ଥାନର ମନରେଗା କାମର ପାଉଣା ପ୍ରଦାନର ଏକ ଭିଜିଲାନ୍ସ ତଦନ୍ତ ନିମନ୍ତେ ଜନସାଧାରଣ ଦାବି କରିଛନ୍ତି ।ତଳିଆ କର୍ମଚାରୀଙ୍କୁ ନିୟୋଜିତ କରି ମନରେଗା ମଜୁରୀ କିଓସ୍କ ବ୍ୟାଙ୍କରେ ହଡପ କରାଯିବାର ଏହା ଏକ ଜ୍ବଳନ୍ତ ଉଦାହରଣ । ଏଥିରେ ଡିଏଫଓଙ୍କ ସମ୍ପୃକ୍ତି ଥିବା ଚର୍ଚ୍ଚା ହେଉଛି । ତେଣୁ ଅଧସ୍ତନମାନେ ନିରଙ୍କୁଶ ହୋଇପଡିଛନ୍ତି ।