17-Sep-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ଚିର ମରୁଡି ପ୍ରପୀଡିତ ଦାଦନ ଅଧ୍ୟୁଷିତ ଆଦିବାସୀବହୁଳ ବଲାଙ୍ଗୀର ଜିଲ୍ଲାରେ ବାହାରର ଲୋକେ ଆସି ଶାଗମାଛ ଦରରେ ଜମି କିଣିନେଉଥିବା ଏବଂ ସମ୍ପୂର୍ଣ୍ଣ ବେଆଇନ୍ ଭାବରେ ସରକାରୀ ଜମି ରେଜିଷ୍ଟ୍ରେସନରେ ଜାଲିଆତି କରାଯାଉଥିବାବେଳେ ଧରାପଡିବା ଘଟଣା ଚର୍ଚ୍ଚାରେ ରହିଛି । ନିକଟରେ ଘଟିଥିବା ଏଭଳି ଏକ ଘଟଣା କେତେକ ସ୍ଥାନୀୟ ମିଡିଆର ଷ୍ଟିଙ୍ଗ୍ ଅପରେସନରେ ପ୍ରକାଶ ପାଇ ଲୋକଲୋଚନକୁ ଆସିବା ପରେ ପ୍ରଶାସନର ଦୃଷ୍ଟି ଆକର୍ଷଣ କରାଯିବାରୁ ଜିଲ୍ଲାପାଳ ଏହାର ତଦନ୍ତ ନିର୍ଦ୍ଦେଶ ଦେଇଥିବାରୁ ପାଟଣାଗଡ ତହସିଲଦାର ତଥା ଭାରପ୍ରାପ୍ତ ଉପ- ଜିଲ୍ଲାପାଳ ଡା.ପୁଷ୍ପାଞ୍ଜଳି ପଣ୍ଡା ଘଟଣାର ତଦନ୍ତ କରୁଥିବା ପ୍ରକାଶ ।   

ଘଟଣାରୁ ପ୍ରକାଶ ଯେ , ଗତ ୧୩ ତାରିଖ ରାତି ପ୍ରାୟ ୮ ଟା ବେଳେ ପାଟଣାଗଡ ସହରର ' ଶାରଦା ' ହୋଟେଲରେ ଆନ୍ଧ୍ରପ୍ରଦେଶରୁ ଆସିଥିବା କେତେକ କ୍ରେତା ସ୍ଥାନୀୟ ଦଲାଲଙ୍କ ସହାୟତାରେ ଖପ୍ରାଖୋଲ ବ୍ଲକ୍ ର ଟେଙ୍ଗରାପଥର ଗ୍ରାମର ଜଣେ ପ୍ରଜା କୁମର ବିଶିଙ୍କ ପରିବାରର ୧୯ ଜଣଙ୍କର ଖାତା ନ୦ . ୧୮୮ ର ୯ ଏକର ୧୨ ଡେସମିଲର ଜମିକୁ କିଣିବାକୁ ସରକାରୀ ରେଜିଷ୍ଟ୍ରେସନର ଭିଜିଟିଂ ରେଜିଷ୍ଟ୍ରି ଭାବରେ ଏକ ହାସପାତାଳର ରୋଗୀ ରେଜେଷ୍ଟ୍ରି ଚିଟ୍  ଓ  ସବ୍ - ରେଜିଷ୍ଟ୍ରାର୍ ବିକ୍ରେତାଙ୍କ ଘରକୁ ଯିବାର ଗସ୍ତଖର୍ଚ୍ଚ ୨୮୦ ଟଙ୍କାର ଫିଜ୍ ଦାଖଲ ପୂର୍ବକ ପଞ୍ଜୀକରଣ ଆଇନର ଧାରା ୩୧ ର ଜାଲିଆତି କରି କାଗଜପତ୍ର କାମ କରୁଥିବା ଅଭିଯୋଗ କରାଯାଇଥିବା କୁହାଯାଇଛି ।  ସେଠାରେ କ୍ରେତା କେ. ରମେଶ ଚନ୍ଦ୍ର , ବିକ୍ରେତାଙ୍କ ୫୦ ଜଣ , ସବ୍ - ରେଜିଷ୍ଟ୍ରାର୍ ବନ ବିହାରୀ ହରପାଲଙ୍କ  ପରିବର୍ତ୍ତେ ତାଙ୍କ ଅଫିସ୍ ର ଡାଟା ଏଣ୍ଟ୍ରି ଅପରେଟର ବିଶ୍ବମ୍ଭର ରାଉତ , ନୂଆପଡାର ଜଣେ ତେଲୁଗୁ ଓକିଲ ରାଓ , ବନେଇମୁଣ୍ଡାର ଜଣେ ଭୁଲିଆ ଓକିଲ ଓ କେତେକ ସ୍ଥାନୀୟ ଜମି ଦଲାଲ ଉପସ୍ଥିତ ଥିଲେ ।  ଆନ୍ଧ୍ର କ୍ରେତାଙ୍କ ଏକାଧିକ ବୋଲେରୋରେ ବିକ୍ରେତାମାନଙ୍କୁ ସେମାନଙ୍କ ଗାଁ'ରୁ ବୁହାଇ ଅଣାଯାଇଥିଲା । ତେବେ  ଲୁକ୍କାୟିତ ଭାବରେ ଗ୍ରାମୀଣ ସରଳ ଲୋକଙ୍କୁ ପ୍ରଲୋଭନ ଦେଇ ସେମାନଙ୍କର ଭାତହାଣ୍ଡିର ଶସ୍ଯକ୍ଷେତକୁ ଏପରିଭାବରେ ଶାଗମାଛ ଦରରେ କିଣିନେବାକୁ ଏଭଳି ରାତିଅଧିଆ ଜାଲିଆତିର ଖବର ପାଇ କେତେକ ପେଶାଦାର ସ୍ଥାନୀୟ ମିଡିଆବାଲେ ହୋଟେଲରେ ଷ୍ଟିଙ୍ଗ୍ ଅପରେସନ କରି ଚଢାଉ କରିବାରୁ ସମସ୍ତେ ସେଠାରୁ ଛିନ୍ ଛତ୍ର ହୋଇ ପଳାଇ ଯାଇଥିବା ଜଣାଯାଇଛି । ତେବେ ପରେ ଏହି ଘଟଣାରେ ସବ୍- ରେଜିଷ୍ଟ୍ରାର ବନ ବିହାରୀ ହରପାଲ ଏହାକୁ ଭିଜିଟିଂ ରେଜିଷ୍ଟ୍ରି ଓ ଏହା କରାଯିବାକୁ ସରକାରୀ ସ୍ବୀକୃତି ରହିଛି ବୋଲି ସଫେଇ ଦେଇଥିବା ପ୍ରକାଶ । ଏଣୁ ଏହା ତାଙ୍କର ସମ୍ପୂର୍ଣ୍ଣ ଜ୍ଞାତସାରରେ ହେଉଥିବା ପ୍ରମାଣିତ ହେଉଛି ।   ଏହି ଘଟଣା ମିଡିଆରେ ପ୍ରକାଶ ପାଇବା ପରେ ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା ଏହାର ତଦନ୍ତ ନିର୍ଦ୍ଦେଶ ପାଟଣାଗଡ ଉପ- ଜିଲ୍ଲାପାଳଙ୍କୁ ଦେଇଥିବା ପ୍ରକାଶ । ତେବେ ପ୍ରଶ୍ନ ଉଠୁଛି ଯେ , ଯଦି ଜମିବିକ୍ରେତାମାନେ ଅସୁସ୍ଥ ହୋଇ ରୋଗରେ ଶଯ୍ୟାଶାୟୀ ଥିଲେ ଓ  ମାତ୍ର ୨୦୦ ମିଟର ଦୂରସ୍ଥିତ ସବ୍- ରେଜିଷ୍ଟ୍ରି କାର୍ଯ୍ୟାଳୟ ବା ପାଟଣାଗଡ ସରକାରୀ ଉପଖଣ୍ଡ ହାସପାତାଳକୁ ଆସିବାକୁ ଅକ୍ଷମ ଥିଲେ , ହୋଟେଲକୁ ଆସିଥିଲେ କେମିତି  ଓ  ସବ୍ - ରେଜିଷ୍ଟ୍ରାର୍ ଙ୍କ ଅନୁପସ୍ଥିତିରେ ତାଙ୍କର ଜ୍ଞାତସାରରେ ଜଣେ ଅସ୍ଥାୟୀ ଆଉଟ୍ ସୋର୍ସିଂ ଡାଟା ଏଣ୍ଟ୍ରି ଅପରେଟର ଏହି ସରକାରୀ କାର୍ଯ୍ୟ ସମ୍ପାଦନ କରୁଥିଲେ କିପରି  ? ସେହିପରି ସମ୍ପୃକ୍ତ ଷ୍ଟିଙ୍ଗ୍ ଅପରେସନ୍ କରିଥିବା ମିଡିଆବନ୍ଧୁମାନେ ଅଦ୍ୟାବଧି ସରକାରୀ ଆଇନର ଉଲଙ୍ଘନ ହୋଇଥିବାରୁ ଏହା ବିରୁଦ୍ଧରେ ସଚେତନ ନାଗରିକ ହିସାବରେ ସ୍ଥାନୀୟ ଥାନାରେ ଏକ ଏତଲା ଦେଇଛନ୍ତି କି  ? 

ସେ ଯାହାହେଉ , ଏଭଳି ଘଟଣା ପାଟଣାଗଡ ଅଞ୍ଚଳରେ ନୂଆ ନୁହେଁ । ଏପରିକି କିଛିବର୍ଷତଳେ  ଧଣ୍ଡାମୁଣ୍ଡା ସେବା ସମବାୟ ସମିତିରେ କୃଷିଋଣ ବା ପମ୍ପ ପାଇଁ ଦାଖଲ କରାଯାଇଥିବା ଜମିର ପାର୍ଚ୍ଚାକୁ ସେହି ସମିତିର ସମ୍ପାଦକ ଓ ଖପ୍ରାଖୋଲର କେତେକ ଅପରାଧୀ ପ୍ରବୃତ୍ତିର ଯୁବକ ତୁଷୁରା ଅଞ୍ଚଳର ଜଣେ ସମ୍ପର୍କୀୟ ବୃଦ୍ଧଙ୍କୁ ଜମିମାଲିକ ଦର୍ଶାଇ  ପାଟଣାଗଡର ଜଣେ ଓକିଲଙ୍କ ଜରିଆରେ ଚଞ୍ଚକତା କରି  ଜାଲିଆତିରେ  ଖପ୍ରାଖୋଲ ବ୍ଲକ୍ ର ପଡିଆବାହାଲ ଗ୍ରାମର କେତେକଙ୍କ ଚାଷୀଙ୍କ ଅଜ୍ଞାତରେ ୭୨ ଏକର ଜମିକୁ ରାୟପୁରର ଜଣେ କ୍ରେତାଙ୍କ ନାମରେ ରେଜିଷ୍ଟ୍ରି  କରିନେଇଥିଲେ ।  ଆହୁରି ବିଚିତ୍ର ଯେ ସେତେବେଳେ ଏହି ପାଟଣାଗଡ ସବ୍- ରେଜିଷ୍ଟ୍ରି ଅଫିସ୍ ରୁ  ୨୧ ଟି ସେଲ୍ ଡିଡ୍ ହଜିଯାଇଥିଲା !  ପରେ ଏହି ମାମଲାରେ କେତେକ ଗିରଫ ହୋଇଥିଲେ ।

ଏହା ପୂର୍ବରୁ ପାଟଣାଗଡ ଉପଖଣ୍ଡର ଘୁମେର ଅଞ୍ଚଳରେ ଜାଟ୍ରୋଫା ଚାଷ ଆଳରେ ବମ୍ବେର ' ତାଜ୍ ' କମ୍ପାନୀ ଓ ଅନ୍ୟାନ୍ୟ ଜାଲ୍ କମ୍ପାନୀ ନାଁ'ରେ କତିପୟ ସ୍ଥାନୀୟ ରାଜନେତା ଓ ଜମିଦଲାଲଙ୍କ ଦ୍ବାରା ପ୍ରକୃତ ଜମିମାଲିକଙ୍କୁ ଠକି ନିଆଯାଇଥିବା ଜମି ଜାଲିଆତିରେ ତତ୍କାଳୀନ ତହସିଲଦାର , ଆର୍ ଆଇ , ଆମୀନ ଓ ସବ୍- ରେଜିଷ୍ଟ୍ରାର୍ ଗିରଫ ହୋଇ ଜେଲ୍ ଯାଇଥିଲେ । ଆହୁରି କେତେକ ଏଭଳି ଘଟଣାର ଉଦାହରଣ ମଧ୍ୟ ରହିଛି ।

ଉଲ୍ଲେଖନୀୟ ଯେ , ଏଇ କିଛିଦିନତଳେ ବଲାଙ୍ଗୀର ସଦର ତହସିଲରେ ତହସିଲଦାର ଓ ରେଜିଷ୍ଟ୍ରାରଙ୍କ ସମେତ କେତେକ ଜମି ଦଲାଲଙ୍କ ବିରୁଦ୍ଧରେ ଅଧା ଏକର ଜମିକୁ ଏକ ଏକର କରିଦେଇ ରେଜିଷ୍ଟ୍ରି କରିଥିବା ଅଭିଯୋଗରେ ଜଣେ କୁଖ୍ୟାତ ଜମିମାଫିଆ ଡନ୍ ସମେତ ୪ ଜଣ ଗିରଫ ହୋଇଥିବାବେଳେ ସହକାରୀ ତହସିଲଦାର ଓ ରେଜିଷ୍ଟ୍ରାର୍ କିଛିଦିନ ଫେରାର୍ ହୋଇଯାଇ ପରେ ହାଇକୋର୍ଟରୁ ଜାମିନରେ ଆସିଥିବା ପ୍ରକାଶ । ଆହୁରି ମଧ୍ୟ ଗତ ୮ ତାରିଖରେ କଣ୍ଟାବାଞ୍ଜି ଧାମନଡଙ୍ଗାର ଜଣେ ଗରିବ ଦଳିତ  ପ୍ରଜା କିଛିବର୍ଷ ତଳେ ଜଣେ ଓକିଲଙ୍କ ମଧ୍ୟସ୍ଥତାରେ ପ୍ରାୟ ୫ ଏକର ସମସ୍ତ ଜମିକୁ କଣ୍ଟାବାଞ୍ଜିର ଚାରିପାଞ୍ଚଜଣ ଅଣଓଡିଆ ମହାଜନ ହଡପ କରିନେଇଥିବାରୁ ଓ ମାମଲାଟି ସ୍ଥାନୀୟ ଅଦାଲତରେ ବିଚାରାଧୀନ ରହିଥିବାବେଳେ ନିରାଶ ହୋଇ ନିଜ ଜମିରେ ଆତ୍ମହତ୍ୟା କରିଥିବା ମୃତକଙ୍କ ଭାଇ ଅଭିଯୋଗ ପ୍ରକାଶ କରିଛନ୍ତି ।

ଆହୁରି ମଧ୍ୟ , ଅଳ୍ପବର୍ଷତଳେ ଗଇଁନ୍ତଲା ନିକଟସ୍ଥ ସୋନପୁର ରାସ୍ତାକଡର ଏକ ରୁଗ୍ଣକାରଖାନାର ଜମିକୁ ଜାଲିଆତି କରି ହଡପ ,  ଗାନ୍ଧୀନଗର ପଡାର ଜଣେ ବିଧବାଙ୍କ ଜମିକୁ ଟାଉନଥାନାର ଜଣେ ପୁଲିସ୍ କର୍ମଚାରୀଙ୍କ ଦ୍ବାରା ହଡପ କରାଯାଥିବାରୁ ସେ ଗିରଫ ହେବା ଘଟଣା ଚର୍ଚ୍ଚିତ ହୋଇଥିଲା । ତେଣୁ ଦଶନ୍ଧି ଦଶନ୍ଧି ଧରି ଜିଲ୍ଲାର ଗରିବଲୋକଙ୍କ ଜମିକୁ ବାହାରର ଲୋକଙ୍କ ସମେତ ଧନୀ , ପ୍ରଭାବଶାଳୀ , ଅପରାଧୀ ଓ ରାଜନେତାଙ୍କ ଦ୍ବାରା ହଡପ କରାଯାଇ ଆସୁଥିବା ସାଧାରଣ ଘଟଣାରେ ପରିଣତ ହୋଇଛି ।