07-Aug-2022

ବରଗଡ଼(ନିରଞ୍ଜନ ତ୍ରିପାଠୀ): ବିକାଶ ନର୍ସିଂ କଲେଜ ଓ ବିକାଶ ମଲ୍ଟି-ସ୍ପେସିଆଲିଟି ହସ୍ପିଟାଲ୍‌ର ମିଳିତ ଆନୁକୁଲ୍ୟରେ ବିଶ୍ୱ ସ୍ତନ୍ୟପାନ ସପ୍ତାହ ଉତ୍ସବ ଆୟୋଜନ କରି ସ୍ତନ୍ୟପାନ ଶିଶୁଙ୍କ ମୃତ୍ୟୁ ଏବଂ ରୋଗ ହାରକୁ ହ୍ରାସ କରିବାରେ କିପରି ସହାୟକ ହୋଇପାରିବ, ସେ ବିଷୟରେ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଆଲୋକପାତ କରାଯାଇଥିଲା । ବିକାଶ ନର୍ସିଂ କଲେଜ ଛାତ୍ରଛାତ୍ରୀମାନଙ୍କ ଦ୍ୱାରା ଏକ ସଚେତନତା ରାଲି ଏବଂ ପୋଷ୍ଟର୍ ପ୍ରତିଯୋଗିତା, ପେନ୍‌ସିଲ୍ ସ୍କେଚିଂ ଓ ରଙ୍ଗୋଲି ପ୍ରତିଯୋଗିତା ଅନୁଷ୍ଠିତ ହୋଇଥିଲା । 
ଜନସାଧାରଣଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ୬ ଅଗଷ୍ଟରେ ବିକାଶ ନର୍ସିଂ କଲେଜ ଛାତ୍ରଛାତ୍ରୀମାନେ ସ୍ତନ୍ୟପାନର ଗୁରୁତ୍ୱ ଉପରେ “ସ୍ତନ୍ୟପାନ ସପ୍ତାହ ୨୦୨୨ - ଏଜୁକେଟ୍ ଏଣ୍ଡ୍ ସପୋର୍ଟ୍‌” ଶୀର୍ଷକ ନାଟକ ଓ ପାଲା ପରିବେଷଣ କରିଥିଲେ । ବିକାଶ ମଲ୍ଟି-ସ୍ପେସିଆଲିଟି ହସ୍ପିଟାଲ୍‌ର ଶିଶୁ ଓ ନବଜାତ ଶିଶୁରୋଗ ବିଭାଗର ବରିଷ୍ଠ ପରାମର୍ଶଦାତା ଡା.ଆଶିଷ ଶତପଥୀ ସ୍ତନ୍ୟପାନର ଗୁରୁତ୍ୱ ତଥା ବିଭିନ୍ନ ଦିଗ ଉପରେ ନିଜର ମତ ରଖିଥିଲେ ଏବଂ ପ୍ରସବକାଳୀନ ମା’ ଓ ୬ମାସରୁ କମ ବୟସର ଶିଶୁମାନଙ୍କ ମାଗଣା ସ୍ୱାସ୍ଥ୍ୟ ପରୀକ୍ଷା କରିଥିଲେ । ଉକ୍ତ କାର୍ଯ୍ୟକ୍ରମ ସକାଳ ୧୦ଟାରେ ଆରମ୍ଭ ହୋଇଥିଲା । କାର୍ଯ୍ୟକ୍ରମ ପ୍ରାରମ୍ଭରେ ଦୀପ ପ୍ରଜ୍ଜ୍ୱଳନ ପରେ ପରେ ପ୍ରାର୍ଥନା କରାଯାଇଥିଲା ଏବଂ ଛାତ୍ରଛାତ୍ରୀମାନଙ୍କ ଦ୍ୱାରା ନାଟକ ଓ ପାଲା ପରିବେଷଣ କରାଯାଇଥିଲା । ବିକାଶ ଗ୍ରୁପ୍‌ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା ତାଙ୍କ ଅଭିଭାଷଣରେ ବରଗଡ଼ ଜିଲ୍ଲାର ସମସ୍ତ ଗ୍ରାମରେ ଏହି ପ୍ରକାରର ସଚେତନତା କାର୍ଯ୍ୟକ୍ରମ ଅଧିକ ରୁ ଅଧିକ କରାଯିବା ଉଚିତ୍ ବୋଲି କହିଥିଲେ । ବିକାଶ ଗ୍ରୁପ୍‌ର ଡାଇରେକ୍ଟର ଏଡ୍‌ମିନିଷ୍ଟ୍ରେସନ୍ ଶ୍ରୀ ଡି.ବିବେକ, ବିକାଶ ମଲ୍ଟି-ସ୍ପେସିଆଲିଟି ହସ୍ପିଟାଲ୍‌ର ମେଡିକାଲ୍ ସୁପରିଣ୍ଟେଟେଣ୍ଟ୍ ଡା.ଡି.ବି. ପାଟିଲ୍‌, ସମସ୍ତ ଡାକ୍ତର, ସିନିୟର୍ ଜେନେରାଲ୍ ମ୍ୟାନେଜର୍‌, ଏଚ୍‌.ଆର୍‌. ମୁଖ୍ୟ, ନର୍ସିଂ ସୁପରିଣ୍ଟେଟେଣ୍ଟ୍‌, ମ୍ୟାନେଜର୍‌, ବିଭାଗୀୟ ମୁଖ୍ୟ, ବିକାଶ ନର୍ସିଂ କଲେଜର ଅଧ୍ୟକ୍ଷା ପ୍ରଫେସର୍ ୱାଇ.ଡି. ଷ୍ଟେଲା, ଉପାଧ୍ୟକ୍ଷା ଶ୍ରୀମତୀ ଦୀପାଞ୍ଜଳୀ ପଟେଲ ଏବଂ ବିକାଶ ୟୁଜି କ୍ୟାମ୍ପସ୍‌ର ଅଧ୍ୟକ୍ଷ, ଉପାଧ୍ୟକ୍ଷ, ଅଧ୍ୟାପକ-ଅଧ୍ୟାପିକା, ଛାତ୍ରଛାତ୍ରୀମାନେ ଉକ୍ତ କାର୍ଯ୍ୟକ୍ରମରେ ଉପସ୍ଥିତ ଥିଲେ ।