22-Jul-2022

ବଲାଙ୍ଗୀର, ବଲାଙ୍ଗୀର ରେଲୱେ ଷ୍ଟେସନ ର ବିଭିନ୍ନ ଉନ୍ନତିକରଣ କାର୍ଯ୍ୟ ବ୍ୟତିତ ବରିଷ୍ଠ ନାଗରିକ ମାନଙ୍କ ପାଇଁ ଲିଫ୍ଟ ଓ ଟିକେଟ ବୁକିଂ କାଉଣ୍ଟର ଠାରୁ ପ୍ଲାଟଫର୍ମ ପର୍ଯ୍ୟନ୍ତ ଏକ ସେଡ୍ ନିର୍ମାଣ କାର୍ଯ୍ୟ ଶୀଘ୍ର ହେବ ବୋଲି ଜଣା ପଡିଛି । ଗତକାଲି ପୂର୍ବତଟ ରେଲୱେ ସମ୍ବଲପୁର ଡିଭିଜନ କାର୍ଯ୍ୟାଳୟ ଠାରେ ଡିଆର୍‌ୟୁସିସି ସଭ୍ୟ ମାନଙ୍କର ଏକ ବୈଠକ, ପ୍ରବନ୍ଧକ ପ୍ରଦୀପ କୁମାର ଙ୍କ ନେତୃତ୍ୱରେ ଅନୁଷ୍ଠିତ ହୋଇଥିଲା । ଏଥିରେ ଅନ୍ୟାନ୍ୟ ମାନଙ୍କ ସହ ମାର୍ଚ୍ଚେଣ୍ଟ ଏସୋସିଏସନଣ୍ଟ  ତରଫରୁ ଗୋପବନ୍ଧୁ ସତପଥୀ ଓ ବଲାଙ୍ଗୀର ନାଗରିକ କମିଟିର ସଂପାଦକ ମନୋରଞ୍ଜନ ସାହୁ ବଲାଙ୍ଗୀରରୁ ପ୍ରତିନିଧିତ୍ୱ କରିଥିଲେ । ସେହିପରି ହୀରାକୁଦ ଏକ୍ସପ୍ରେସ୍ ଭାୟ ଟିଟିଲାଗଡ଼ ଓ ବଲାଙ୍ଗୀର ମଧ୍ୟରେ ସପ୍ତାହକୁ ଅବଶିଷ୍ଟ ଦୁଇ ଥର ଯାତାୟତ କରିବା ପାଇଁ ପ୍ରସ୍ତାବ ଦେଇଥିବା ବେଳେ ଉକ୍ତ ପ୍ରସ୍ତାବ ଟି ଅନ୍ତଃରେଲ୍ ଟାଇମ୍‌ଟେବୁଲ କମିଟିରେ ବିଚାରଧୀନ ଅଛି ବୋଲି ସୂଚନା ଦେଇଥିଲେ । ବଲାଙ୍ଗୀରୁ ପ୍ରୟାଗରାଜ ଓ ସମ୍ବଲପୁର-ପୁରୀ ଇଣ୍ଟରସିଟିକୁ  ବଲାଙ୍ଗୀର ପର୍ଯ୍ୟନ୍ତ ବର୍ଦ୍ଧିତ କରିବା ପାଇଁ ଶ୍ରୀ ସାହୁ ପ୍ରସ୍ତାବ ଦେଇଥିଲେ । କିନ୍ତୁ ପିଟ୍ ଲାଇନ୍ ର ଅଭାବ ଓ ଦୋହରୀକରଣ ଅସଂପୂର୍ଣ୍ଣ ଯୋଗୁଁ ନୂତନ ଟ୍ରେନ୍ ଚଳାଚଳରେ ଅସୁବିଧା ହେଉଛି ବୋଲି ରେଳ ପ୍ରବନ୍ଧକ କହିଥିଲେ । ସମାନ ପ୍ରକାର ସମସ୍ୟା ଥିବାରୁ କଂଟାବାଞ୍ଜିର ରାଜେଶ ଅଗୱାଲ, ଅନୀଲ ଅଗୱାଲ, ଟିଟିଲାଗଡ଼ର ମଦନମୋହନ ପୃଷ୍ଟି ଓ ବରଗଡ଼ର କୃଷ୍ଣଚନ୍ଦ୍ର ପଣ୍ଡା ତଥା ଲିପ୍ସିତ ମିଶ୍ର ଙ୍କୁ ନେଇ ଏକ ମିଳିତ ଆକାରରେ ରେଲୱେ ର ବିଭିନ୍ନ ସମସ୍ୟା ସମାଧାନ ପାଇଁ ଦାବି ଉପସ୍ଥାପନ କରାଯିବ ବୋଲି ଶ୍ରୀ ମନୋରଞ୍ଜନ ସାହୁ ପ୍ରକାଶ କରିଛନ୍ତି ।