13-Jun-2022

ବରଗଡ:-ଲେଖିଛି ଚିଠି ସେଇ ସଇନିକଟେ ଘର ଛାଡି ଜଗିଛି ଯେ ସାମନ୍ତ ଘାଟି ପରି ହୃଦୟ ସ୍ପର୍ଶୀ ଗୀତର ଗୀତିକାର କବି ଆନନ୍ଦ ଚନ୍ଦ୍ର ପଧାନଙ୍କ ଲେଖନୀ ଚିରଦିନ ପାଇଁ ନୀରବି ଯାଇଛି। ମ୍ରୁତ୍ୟୁ ବେଳକୁ ତାଙ୍କୁ ୭୨ବର୍ଷ ବୟସ ହେଉଥିଲା। 

ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ପଡା ଗ୍ରାମର କବି ଆନନ୍ଦ ଚନ୍ଦ୍ର ପଧାନ  ଦୀର୍ଘ ଦିନ ହେଲା ବାର୍ଦ୍ଧକ୍ୟ ଜନିତ ରୋଗରେ ଆକ୍ରାନ୍ତ ଥିଲେ। କିଛି ଦିନ ତଳେ ଗୁରୁତର ଅସୁସ୍ଥ ହୋଇ ପଡିବାରୁ ପରିବାରବର୍ଗ ତାଙ୍କୁ ବରଗଡ଼ର ଏକ ଘରୋଇ ଚିକିତ୍ସାଳୟରେ ଭର୍ତ୍ତି କରି ଚିକିତ୍ସା କରୁଥିଲେ। ହେଲେ ଚିକିତ୍ସିତ ଅବସ୍ଥାରେ ସୋମବାର ତାଙ୍କର ମୃତ୍ୟୁ ହୋଇ ଯାଇଥିଲା । ମୃତ୍ୟୁଶଯ୍ୟା ନିକଟରେ ତାଙ୍କର ପତ୍ନୀ, ପୁତ୍ର ପୁତ୍ରବଧୂ, ଝିଅ ଜ୍ବାଇଁ ଉପସ୍ଥିତ ଥିଲେ।କବି ଆନନ୍ଦ ଚନ୍ଦ୍ର ପଧାନ ଏକାଧାରରେ ଜଣେ ଶିକ୍ଷକ, କବି, ଗୀତିକାର, ଗାଳ୍ପିକ ଥିଲେ। ସେ ବରଗଡ଼ ଜିଲ୍ଲା ମାଣ୍ଡୋସିଲ ରୁ ଶିକ୍ଷକତା ଆରମ୍ଭ କରିଥିଲେ।ପରେ ଟୁହିଲାମାଲ, ମାଝିପାଲି,ରଙ୍ଗମାଟିଆ,ଭାଲୁପାଲି, ବାନ୍ଦୁପାଲିରେ ଶିକ୍ଷାଦାନ କରିବା ସହିତ ପଡା ପଞ୍ଚାୟତ ରେଙ୍ଗାଲିପାଲି ଉଚ୍ଚ ପ୍ରାଥମିକ ବିଦ୍ୟାଳୟରୁ ଅବସର ଗ୍ରହଣ କରିଥିଲେ। ବିଜେପୁର ଖଗେଶ୍ୱର ସାହିତ୍ୟ କଳା ପରିଷଦର ପ୍ରତିଷ୍ଠାତା ସଦସ୍ଯ ହେବା ସହିତ ବିଭିନ୍ନ ଅନୁଷ୍ଠାନ ସହ ଜଡିତ ରହିଥିଲେ। ଓଡ଼ିଆ ଓ ସମ୍ବଲପୁରୀ ଭାଷାରେ ତାଙ୍କର ଗଭୀର ଦକ୍ଷତା ରହିଥିଲା। ତାଙ୍କ ଦ୍ବାରା ରଚିତ ବହୁ ଗୀତ ରାଜ୍ଯ ସ୍ତରୀୟ ସଂଗୀତ ପ୍ରତିଯୋଗିତାରେ ସାମିଲ ହୋଇ ପୁରସ୍କୃତ ହୋଇଥିଲା। ଭରନି,ବଉଲ,କଲାକସ୍ତୁରୀ,ନୂଆଁସକାଲ,ନୂଆଁଝରନ,ଝୁଲାପତର,ବାଟଦୁଆରି ଆଦି ବହୁ ପ୍ରତିଷ୍ଠିତ ପତ୍ରପତ୍ରିକାରେ ତାଙ୍କର ଲେଖା ଗୁଡିକ ପ୍ରକାଶିତ ହୋଇ ପାଠକୀୟ ଆଦୃତ ଲାଭ କରିଥିଲା।ଫଳରେ ବିଭିନ୍ନ ଅନୁଷ୍ଠାନ ପକ୍ଷରୁ ସେ ସମ୍ବର୍ଦ୍ଧିତ ହୋଇଥିଲେ।ଏକମାତ୍ର ପୁତ୍ର ସୁମନ୍ତ ମୁଖାଗ୍ନି ଦେଇଥିଲେ। ତାଙ୍କର ବିୟୋଗରେ ବିଜେପୁର ଖଗେଶ୍ୱର ସାହିତ୍ୟ କଳା ପରିଷଦ, ପଡା ପାଞ୍ଚ ଲୁକିଆ ସାହିତ୍ୟ ସଂସଦ, ପ୍ରକାଶ ସାସ୍କୃତିକ ସଂସଦ, କଲା କସ୍ତୁରୀ ପରିବାର, ପରବାସୀ କୁଟୁମ, ଭେଡେନ ମନୋହର ସାସ୍କୃତିକ ସଂସଦ, ତାଳପଦର ଉତ୍ତାଳଗଡ ନାଟ୍ୟ ସଂସଦ, ଘେଁସ ଅଭିମନ୍ୟୁ ସାହିତ୍ୟ ସଂସଦ ପକ୍ଷରୁ ଗଭୀର ଶୋକ ପ୍ରକାଶ ପାଇଛି।