14-Jun-2022

ବରଗଡ଼:-ଦିନ ଥିଲା ଲୋକେ କହୁଥିଲେ ଯେ ଚାଷ କାମ ଯାହାର କେତେ ସୁଖ ତାହାର , କିନ୍ତୁ ଆଜି ଚାଷ ଓ ଚାଷୀର ଅବସ୍ଥା ଦେଖିଲେ ଲାଗୁଛି ଯେ ଚାଷ କାମ ଯାହାର ସବୁ ଦୁଃଖ ତାହାର । ଦେଶକୁ ଖାଦ୍ୟ ଯୋଗାଉ ଆସୁଥିବା ଅନ୍ନଦାତା ଆଜି ସବୁ କ୍ଷେତ୍ରରେ ଅବହେଳିତ ଓ ଶୋଷିତ । ଚାଷ କାମ ଆରମ୍ଭ କରିବା ପୂର୍ବରୁ ଓ ଫସଲ ବିକ୍ରି ହେବା ପର୍ଯନ୍ତ ସବୁ ବେଳେ ଚାଷୀ ମାନସିକ , ଶାରୀରିକ , ଓ ଆର୍ଥିକ ଶୋଷଣର ଶିକାର ହୋଇ ଆସୁଛି । ବୀମା ସହାୟତା ଚାଷୀ ପାଇଁ ଏକ ବଡ଼ ଆଶା, ହେଲେ ପ୍ରିମୀୟମ ନେଲାବେଳେ ବୀମା କମ୍ପାନୀ ଆଗରେ ଆଉ ବୀମା ଟଙ୍କା ପ୍ରଦାନ ସମୟରେ କମ୍ପାନୀ ମାନଙ୍କ ନାନା ପ୍ରକାର ବାହାନା ଆଉ ଟାଳଟୁଳ ନୀତି ଚାଷୀ ଙ୍କୁ ହତାଶ କରିଛି । ନିଜର ଚାଷ କାମ ଛାଡି ଚାଷୀ କଦାପି ଆନ୍ଦୋଳନ କରିବାକୁ ଚାହେଁ ନାହିଁ । ହେଲେ ଆଜିର ପରିସ୍ଥିତି ବାଧ୍ୟ କରିଛି ଚାଷୀକୁ ଆନ୍ଦୋଳନ କରିବା ପାଇଁ । ଗତକାଲି ରାଜବୋଡାସମ୍ବର କୃଷକ ସଙ୍ଗଠନ ର ଆହ୍ୱାନ କ୍ରମେ ବରଗଡ଼ ଜିଲ୍ଲା ପଦ୍ମପୁର ଉପ ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଚାଷୀ ଆନ୍ଦୋଳନ କରିଛି । ଜେଲ ଭରୋ ନାରାରେ ।ବୀମା ରାଶି ନ ମିଳିଲେ ଚାଷୀଙ୍କ ଏହି ଆନ୍ଦୋଳନ ଆହୁରି ଉଗ୍ରରୂପ ନେବାର ସମ୍ଭାବନା ରହିଛି । ଚାଷୀ ଗତ ୨୦୨୧ ଖରିଫ ଫସଲ ମରୁଡିଯୋଗୁଁ ଚାଷୀର ଧାନ ଅମଳ ହୋଇନଥିଲା । ସରକାରଙ୍କୁ ବାରମ୍ବାର ଦାବି ଜଣାଥିଲେ ମଧ୍ୟ ଅଦ୍ୟାବଧି ବୀମା ରାଶି କିମ୍ବା ମରୁଡି ସହାୟତା ପ୍ରଦାନ କରା ଯାଇନାହିଁ ।ତେଣୁ ଚାଷୀ ର ହୃଦୟ ନିଆଁ ପରିକା ଜଳୁଛି । ଚାଷୀ ବାରମ୍ବାର ଆନ୍ଦୋଳନ କରି ଆସୁଥିଲେ ସୁଦ୍ଧା ସରକାର କେବଳ ପ୍ରତିଶୃତି ଉପରେ ପ୍ରତିଶୃତି ଦେଇ ଦିଗ ଗଡ଼େଇ ଚାଲିଛନ୍ତି ।ସରକାର ପରୋକ୍ଷରେ ବୀମା କମ୍ପାନୀକୁ ବଞ୍ଚାଉଛନ୍ତି ଫଳରେ ଚାଷୀ ଏବେ ନିରାଶ ଓ ଉତ୍ୟକ୍ତ ହୋଇ ଆନ୍ଦୋଳନ ରେ ଝାସ ଦେଇଛି । ଗତକାଲି ପ୍ରାୟ ପଦ୍ମପୁର ଉପଖଣ୍ଡ ଅଧିନସ୍ଥ ସମସ୍ତ ଗ୍ରାମ ମାନଙ୍କରୁ ପ୍ରାୟ  ସାତ ହଜାର ରୁ ଉର୍ଧ୍ଵ ଚାଷୀ ଆନ୍ଦୋଳନକୁ ଓଲ୍ହାଇଛନ୍ତି ।ଉତ୍ୟକ୍ତ ଚାଷୀ ଉପଜିଲ୍ଲାପାଳ କାର୍ଯ୍ୟାଳୟ ସମେତ ତହସିଲଦାର ଙ୍କୁ ତାଳା

ପକାଇ ଦେଇଥିଲେ ।
ବିଗତ ଖରିଫ ୨୦୨୧ ମସିହାରେ ଭୟଙ୍କର ମରୁଡ଼ି ସତ୍ତ୍ବେ ମରୁଡ଼ି ଘୋଷଣା ଓ ବିମାରାଶି ପ୍ରଦାନ ଦାବିରେ ରାଜବୋଡାସମ୍ବର କୃଷକ ସଂଗଠନର ହଜାର ହଜାର ଚାଷୀ ଗତକାଲି ଏକତ୍ରିତ ହୋଇ ପଦ୍ମପୁର ଉପଖଣ୍ଡର ସରକାରୀ କଳକୁ ଅଚଳ କରିଛନ୍ତି । ପଦ୍ମପୁର ଉପଜିଲ୍ଲାପାଳ ଙ୍କ କାର୍ଯ୍ୟାଳୟ, ତହସିଲ କାର୍ଯ୍ୟାଳୟ, ବ୍ଳକ କାର୍ଯ୍ୟାଳୟ ତଥା ସମସ୍ତ ସରକାରୀ କାର୍ଯ୍ୟାଳୟ କୁ ତାଳାଦେଇ ଅଚଳ କରିଦେଇଥିବା ସୂଚନା ମିଳିଛି ।