08-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ଏବେ ସରିଲା କେନ୍ଦୁପତ୍ର ଖର୍ଦ୍ଦି ।  ପ୍ରଥମେ ଗୋଚ୍ଛାକଟେଇ ଓ ପତ୍ରତୋଳା , ଫଡି ମରାମତି  , ପତ୍ରକିଣା , ଶୁଖେଇ ଇତ୍ୟାଦିରେ ବଲାଙ୍ଗୀର କେନ୍ଦୁପତ୍ର କଞ୍ଜରଭେଟରଙ୍କ ଅଧୀନରେ ଥିବା ବଲାଙ୍ଗୀର ଓ ସୋନପୁର ଜିଲ୍ଲାର ୩ ଟି ଡିଭିଜନ ସମେତ ପଦ୍ମପୁର , ଖଡିଆଳ , ନବରଙ୍ଗପୁର ଓ ଭବାନୀପାଟଣାଆଦି ଡିଭିଜନର ରେଞ୍ଜ୍ ଗୁଡିକରେ ଲକ୍ଷାଧିକ ଶ୍ରମିକ ବା ହିତାଧିକାରୀଙ୍କୁ ପ୍ରତିବର୍ଷ କୋଟି କୋଟି ଟଙ୍କାର ମଜୁରୀ ଓ ପାଉଣା ପ୍ରଦାନ କରାଯାଇଥାଏ । ଚଳିତବର୍ଷ ମଧ୍ୟ ଦିଆଯାଉଛି । ତେବେ ଟଙ୍କା ଉଠାଣ ଓ ପ୍ରଦାନ ମଧ୍ୟରେ ଆହେତୁକ କାଳକ୍ଷେପଣ ସହିତ ' ଏବେ  ସବୁ ବ୍ୟାଙ୍କ୍ ଆକାଉଣ୍ଟ୍ ରେ ଦିଆଯାଉଥିବା ' ସଫେଇ ସତ୍ତ୍ୱେ ପ୍ରାୟ ସବୁଠି ହଜାର ହଜାର ଜାଲ୍ ଆକାଉଣ୍ଟ୍ ଓ  ଲକ୍ଷାଧିକ ମିଥ୍ୟାଶ୍ରମିକ ବା ହିତାଧିକାରୀଙ୍କ ନାଁ'ରେ ବ୍ୟାପକ ବାଟମାରଣା କରାଯାଇଆସୁଥିବା ଚର୍ଚ୍ଚା ହେଉଛି । ସବୁ ରେଞ୍ଜ୍ ରେ ମଧ୍ୟ ଆକାଉଣ୍ଟ୍ ପେମେଣ୍ଟ୍ ନ ହୋଇ କିଛିଭାଗ  ନଗଦ ପେମେଣ୍ଟ୍ ହେଉଥିବା ଶୁଣାଯାଇଛି ।  ଏହାଛଡା ଯେଉଁ କର୍ମଚାରୀ ବା ଅଧିକାରୀଙ୍କ ଜରିଆରେ ଏହି ବିପୁଳ ଟଙ୍କା ଖର୍ଚ୍ଚ କରାଯାଉଛି , ସେମାନଙ୍କର କ୍ଷମତା କେତେ , ଏହାର ଯଥାଯଥ ବିଚାର କରାଯାଉନାହିଁ । ପ୍ରାୟତଃ  ଗାର୍ଡ , ଫରେଷ୍ଟରରୁ ପଦୋନ୍ନତି ପାଇଥିବା ଭାରପ୍ରାପ୍ତ ଡେପୁଟି ରେଞ୍ଜର ବା ରେଞ୍ଜର ଅଥବା ଏସିଏଫଙ୍କ ମାଧ୍ୟମରେ ପୁଳା ପୁଳା ଟଙ୍କାର ବ୍ୟୟ କରାଯାଇ ଆସୁଛି ।  କେନ୍ଦୁପତ୍ର ଏକ ଋତୁକାଳୀନ ବ୍ୟବସାୟ ହୋଇଥିବାରୁ ଓ ସରକାରଙ୍କୁ ଏଥିରୁ କୋଟି କୋଟି ଟଙ୍କାର ବିପୁଳ ରାଜସ୍ୱ ମିଳୁ ଥିବାରୁ , କେବେ ଏହି ବିଭାଗର କଡାକଡି ସମୀକ୍ଷା ବା ହିସାବନିକାଶ ହୁଏ ନାହିଁ । ବଲାଙ୍ଗୀର ଜିଲ୍ଲାର ତିନୋଟି ଡିଭିଜନରେ ଦୀର୍ଘବର୍ଷ ଧରି ବିଭିନ୍ନ କେଳେଙ୍କାରୀ ଚାଲିଆସିଥିଲେ ହେଁ , ସିଜନ୍ ପରେ ବା କିଛିଦିନ ପରେ ବଦଳି କରିଦିଆଯାଇ ଏହି ବିଭାଗରେ ଉପୁଜୁଥିବା ଆର୍ଥିକ ଅନିୟମିତତାକୁ ଘଣ୍ଟଘୋଡାଇ ଦିଆଯାଇଆସୁଛି । ପୂର୍ବରୁ ଏଠାରେ ଅବସ୍ଥାପିତ ଏହି ବିଭାଗର ପୂର୍ବତନ ବଲାଙ୍ଗୀର କଞ୍ଜରଭେଟର ବରିଷ୍ଠ ଆଇ ଏଫ୍ ଏସ୍ ଅଭୟକାନ୍ତ ପାଠକଙ୍କ ଅମଳରୁ ଏଠାରେ ଦୁର୍ନୀତିର ଅଭିଯୋଗକୁ ଚପାଇଦିଆଯିବାର ପରମ୍ପରା ରହିଆସିଥିବା କୁହାଯାଇଛି ।

ତେବେ ଅଭିଯୋଗ ଉଠୁଥିବା ଚଳିତ ବର୍ଷ ବଲାଙ୍ଗୀର ଓ ସୋନପୁର ଜିଲ୍ଲାରେ ଥିବା ବଲାଙ୍ଗୀର , ପାଟଣାଗଡ ଓ ଟିଟିଲାଗଡ କେନ୍ଦୁପତ୍ର ଡିଭିଜନର ରେଞ୍ଜ୍ ଗୁଡିକରେ ହୋଇଆସୁଥିବା ଉପରୋକ୍ତ ଜାଲ୍ ଆକାଉଣ୍ଟ୍ ଓ ମିଥ୍ୟାଶ୍ରମିକ -ହିତାଧିକାରୀ ପେମେଣ୍ଟ୍ ର ଗୁରୁତର କୋଟି କୋଟି ଟଙ୍କାର ବାଟମାରଣାର ତନ୍ନ ତନ୍ନ ଅନୁସନ୍ଧାନ ଜରୁରୀ ହୋଇପଡିଛି ବୋଲି ଜନମତ ପ୍ରକାଶ ପାଉଛି । ଏ ସମ୍ପର୍କରେ ଆଗାମୀଦିନମାନଙ୍କରେ କ୍ରମାନ୍ୱୟରେ ଅନୁସନ୍ଧାନମୂଲକ ରିପୋର୍ଟ ପ୍ରକାଶ ପାଇବ । ମୂଖ୍ୟତଃ ଏହାର ପେମେଣ୍ଟ୍ ହେଉଥିବା କିଓସ୍କ ବ୍ୟାଙ୍କ୍ ବା ଗ୍ରାହକ ସେବା କେନ୍ଦ୍ର ଗୁଡ଼ିକରେ ଏଭଳି ଜାଲିଆତିର ସୁଯୋଗ ରହିଥିବା ଚର୍ଚ୍ଚା ହେଉଛି ।