06-Jun-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ) ଏବେ ବଲାଙ୍ଗୀର ସହରରେ ଚାଲିଛି ଶୀତଳଷଷ୍ଠୀ ଯାତ୍ରା । ମୀନାବଜାରରେ ବି ବହୁତ ଭିଡ ଜମୁଛି । ତେବେ ଏଇ ଭିଡରେ ପ୍ରେମିକ ପ୍ରେମିକା , ଦର୍ଶକ , କ୍ରେତା ବିକ୍ରେତା , ଭ୍ରମଣକାରୀ , ଉପଭାକ୍ତା ଓ ଉପଭୋଗକାରୀ / କାରିଣକଙ୍କ ସହ ମାତିଛନ୍ତି ଚୋରମାନେ । ବିଶେଷକରି ମୋବାଇଲ୍ ଚୋର  !  ଏକ ସୂଚନାକ୍ରମେ ଗତକାଲି ବଲାଙ୍ଗୀର କଳାମଣ୍ଡଳରେ ପଡିଥିବା ମୀନାବଜାର ଓ ଅନ୍ୟାନ୍ୟସ୍ଥାନରୁ ରାତି ପ୍ରାୟ ୮ ଟାରୁ ୧୦ଟା ମଧ୍ୟରେ ୫୨ ଟି ମୋବାଇଲ୍ ଚୋରି ବା ପକେଟ୍ ମାର୍ ହୋଇଥିବାର ଟାଉନ୍ ଥାନାରେ ଏତଲା ଦିଆଯାଇଥିବା ପ୍ରକାଶ ।  ସହରବଜାରରେ ମୋବାଇଲ୍ ଚୋରି ନୂଆଘଟଣା ନୁହେଁ । ପୁଣି କେବଳ ଯେ ବଲାଙ୍ଗୀରରେ ହୁଏ ଓ ଶୀତଳଷଷ୍ଠୀବେଳେ ହେଉଛି ; ୟା' ବି ନୁହେଁ  ! 

ଏବେ ସମ୍ବଲପୁର , ବରପାଲି ସମେତ ପଶ୍ଚିମଓଡିଶାର ଅନ୍ୟାନ୍ୟ ସ୍ଥାନମାନଙ୍କରେ ଶୀତଳଷଷ୍ଠୀ ଉତ୍ସବ ପାଳିତ ହେଉଛି ।  ଏସବୁ ସ୍ଥାନରେ ମୋବାଇଲ୍ ଚୋରି ବି ବୃଦ୍ଧି ପାଇଛି । ସବୁଆଡର ରିପୋର୍ଟ ସଂଗ୍ରହ କରି ଏକାଠି ମିଶାଇଲେ , ଏହା ଶହେରୁ ହଜାର ସଂଖ୍ୟାରେ ପହଞ୍ଚିବ । 

ତେବେ ଆପଣମାନେ ଜାଣନ୍ତି , ଏସବୁ ମୋବାଇଲ୍ ଚୋରମାନେ କେଉଁଠିକାର  ? ଏବଂ ଆପଣ ଚାହିଁଲେ ଓ ସଚେତନ ରହିଲେ ଏବଂ ପୁଲିସ୍ ଚାହିଁଲେ  , ଏହା ଧରାଯାଇ ପାରିବ । ଆଜିକାଲି ସାଇବରସେଲ୍ ଗଠନ କରାଯାଇଛି । ଅବଶ୍ୟ ପୁଲିସ୍ ବାବୁମାନେ ଚାହିଁଲେ ଯାଇ  !

ଏଇ ଚୋମାନଙ୍କ ମଧ୍ୟରେ ଅଧିକାଂଶ ସୋନପୁର ଜିଲ୍ଲାର ତରଭା ଆଖପାଖ ଓ କମସରାର । କିଛିଦିନତଳେ ଏହି ସାମ୍ବାଦିକର ବି ଏକ ଦାମୀ ମୋବାଇଲ୍ ଫୋନ୍ ଚୋରିହେଇ ଯାଇଥିଲା । ବଲାଙ୍ଗୀର ସହରର ଏକ ବଡ ଔଷଧଦୋକାନର କାଉଣ୍ଟରରୁ । ମୁଁ ସନ୍ଦେହରେ ଦୋକାନର ସିସିଟିଭିରୁ ମୋ ପଛରେ ଆସି ଜାକିହେଇ ଠିଆହେଇଥିବା ଜଣେ ନିରୀହମୁହଁର ଯୁବକଙ୍କୁ ଦେଖିଲି । କିଛି ସମୟ ପରେ ସେ ଚଳଚଞ୍ଚଳ ହୋଇ ଉଠି ଅଳ୍ପଦୂରରେ ଠିଆହୋଇଥିବା ତା'ର ଜଣେ ସାଙ୍ଗ ସହ ତତ୍ କ୍ଷଣାତ୍ ସେ ସ୍ଥାନ ପରିତ୍ୟାଗ କରି ଚାଲିଯାଉଥିଲା । ମୁଁ ପ୍ରଥମେ ମୋ ପ୍ୟଣ୍ଟ୍ ପକେଟ୍ ରେ ମୋବାଇଲ୍ ନଥିବା ଜାଣିପାରିଲି । ତା'ପରେ କାଳେ ଘରେ ଛାଡି ଆସିଛି କି ବୋଲି ଆର ପକେଟ୍ ରେ ଥିବା ଛୋଟ ମୋବାଇଲ୍ ରେ ଘରକୁ ଫୋନ୍ କରି ପକେଟ୍ ମାର୍ ହେଇଯାଇଥିବା ନିଶ୍ଚିତ ହେବା ପରେ ଥାନାକୁ ଯାଇ ଏତଲା ଦେଲି । ସୌଭାଗ୍ଯକୁ ସେତେବେଳେ ଟାଉନ୍ ଥାନାରେ ମୋର ଜଣେ ସାନଭାଇ ସଦୃଶ ସାହିତ୍ୟିକବନ୍ଧୁ ଆଇ ଆଇ ସି ଥିଲେ । ତା'ପରେ ଭୁବନେଶ୍ବରରେ ଥିବା ମୋ ପୁଅମାନଙ୍କୁ ଖବରଦେଲି । ସେମାନେ ସର୍ଚ୍ଚ କରି ଜାଣିପାରିଲେ , ମୋ ଦାମୀମୋବାଇଲ୍ ଟି ସେତେବେଳକୁ ମାତ୍ର କେଇମିନିଟ୍ ଭିତରେ କମସରା ଗାଁ'ର ଏକ ମନ୍ଦିରପାଖ ଗଳିରେ ଥିବା ସଂକେତ ଦେଉଛି ଏବଂ ଆଉ କିଛିସମୟପରେ ତା'ର ଚାର୍ଜ ସରିଯିବ । ମୋବାଇଲ୍ ଟିର ଚାର୍ଜ ସରିଗଲେ , ତାହାକୁ ଲୋକେଟ୍ କରିବା କଷ୍ଟକର ହୋଇପଡିବ । ଏଣୁ ମୁଁ ମୋର ଜଣେ ଅଧ୍ୟାପକ ଓ ଜଣେ ସାମ୍ବାଦିକ ସାଙ୍ଗଙ୍କ ସହ ସିଧା କମସରା ଗଲୁ । ସେଠାରେ ଜଣେ ସ୍ଥାନୀୟ ଯୁବକଙ୍କୁ ଭେଟି ତାଙ୍କର ସାହାଯ୍ୟ ନେଲୁ । ସେ କହିଲେ  : ହଁ , ଅଳ୍ପ ସମୟ ହେଲା , ଗା'କୁ ୪/ ୫ ଟି ଦାମୀ ସେଟ୍ ଆସିଛି । ଆରଦିନ ସେ ବଲାଙ୍ଗୀର ବି ଆସି ଦୋକାନରୁ ପୁଲିସ୍ ସଂଗ୍ରହ କରିଥିବା ସିସିଟିଭି ଫୁଟେଜ୍ ରୁ ଥାନାରେ ଦେଖି ତାଙ୍କ ଗ୍ରାମର ୨ ଜଣ ଦାଗୀଚୋରଙ୍କୁ ଚିହ୍ନଟ କଲେ । 

ସେଇଦିନ ରାତିରେ ମୋ'ରି ଗାଡିରେ ଥାନାଧିକାରୀଙ୍କ ନିର୍ଦ୍ଦେଶରେ ବଲାଙ୍ଗୀର ଟାଉନ୍ ଥାନାର ପୁଲିସ୍ ସଦଳବଳେ କମସରା ଫାଣ୍ଡି ପୁଲିସ୍ ର ସହାୟତାରେ କମସରା ହରିଜନବସ୍ତି ଚୋରଙ୍କ ଘର ଉପରେ ଚଢାଉ କରି ଜଣକୁ ଧରିଦେଲୁ । ଚୋର କହିଲା , ସେ ମୋବାଇଲ୍ ଟିକୁ ତାଙ୍କ ଗାଁ'ର ବଏଲର କୁକୁଡାଦୋକାନୀକି ଦୁଇହଜାର ଟଙ୍କା ଓ ଚାରିକିଲୋ ମାଂସ ବଦଳରେ ବିକିଛି ।  ସେଇ ଦୋକାନୀର ଘର ଉପରେ ପୁଲିସ୍ ଚଢାଉ କରି ତାକୁ ଧରିଲେ । ସେ ପୂର୍ବନିର୍ବାଚନରେ ଜଣେ ସରପଞ୍ଚ ପ୍ରାର୍ଥୀ ଥିଲେ । କମସରା ଫାଣ୍ଡିବାବୁ ତାଙ୍କୁ କହିଲେ  :  ଛି , ଆପଣ ଏମିତି କାମ କରୁଛନ୍ତି  ? ' 

ଆମସାଙ୍ଗରେ ଯାଇଥିବା ମହିଳା ହୋମ୍ ଗାର୍ଡ ତାଙ୍କୁ ଆଣି ଗାଡିରେ ବସାଗଲାବେଳେ ଜୁହାର ହେଲେ । ସେ କୁକ ତାଙ୍କ ସ୍ବାମୀଙ୍କର ମିତ  ! 

ସେ କହିଲେ , ମୋବାଇଲ୍ ଟିକୁ ସେ ତରଭାର ବଏଲର ହୋଲସେଲର ଦୋକାନର ହେଲପରକୁ ଦେଇଛି । ସେଠୁ ରାତାରାତି ଆମ ଗଲୁ ତରଭା । ସେ ମୁସଲମାନ ଦୋକାନୀର ଘର ପାଖ ଗାଁ' ଖଲିଆପାଲି । ବହୁତ ଡକାହକା ପରେ ସେ ଉଠିଲା ଓ କହିଲା, ଆର ପଡାର ତା' ଦୋକାନର ନୌକରପିଲାକୁ ଦେଇଛି । ତା'କୁ ସାଙ୍ଗରେ ଧରି ପୁଣି ଆର ପଡାକୁ । ଶେଷରେ ମିଳିଗଲା । ଆହା, କଭର୍ ଖୋଲି ଫିଙ୍ଗିଦିଆଯାଇଥିବା ଓ ସେଥିରେ ସେ ମୁସଲମାନ ଟୋକାର ବିବି ପିଲାଙ୍କ ଫଟୋ ଭିଡିଓ ଗାନା ଲୋଡ୍ ହେଇଥିବାର ମୋର ପ୍ରିୟ କୋଡିଏ ହଜାର ଟଙ୍କିଆ ସାମସଙ୍ଗ ମ୍ୟାକ୍ସ ମୋବାଇଲ୍ ହ୍ୟାଣ୍ଡ ସେଟ୍ ଟି । ସେ ମୋବାଇଲ୍ ଟି ଆମକୁ ହସ୍ତାନ୍ତର କଲାବେଳେ ରାତିରେ ପୁଲିସ୍ ମାନଙ୍କୁ ଧରି ଆମ ସ୍କୋର୍ପିଓ ଚଳାଇ ରାତିଅଧରେ ଯାଇଥିବା ମୋ ସାନପୁଅ ତା'କୁ ମାରେ କି ନମାରେ  ! 

ଗାଡିରେ ଚୋରଙ୍କୁ ଧରି ବଲାଙ୍ଗୀର ଫେରିଲାବେଳେ ମୁଁ ପଚାରିଲି କମସରା ଚୋର ଭାଇଟିକି  :  ଆଉ , ଆଜିକାଲି ଆଉ କ'ଣ କ'ଣ ଚୋରିଫୋରି କାମ ଚାଲିଛି  ?

ସେ ନିର୍ବିକାରରେ ଉତ୍ତର ଦେଲା  :  ଏଇ ମୋବାଇଲ୍ ପକେଟ୍ ମାର୍ , ଆଜ୍ଞା  ! ଗଲାଥର ସମ୍ବଲପୁର ଶୀତଳଷଷ୍ଠୀରୁ ଚାରିହଜାରଟା ପାଖାପାଖି  । ଏ ବର୍ଷ ପୁରୀ ରଥଯାତ୍ରାରୁ ସଢେ ସାତ ହଜାର  । "
 ଆଁ  !!!  ଆମେ ଆଶ୍ଚର୍ଯ୍ୟ ହେଇଗଲୁ ।

ଥାନାରେ ପରଦିନ ଥାନାବାବୁ ବି ଏଇ କିଛି ମାସ ମଧ୍ୟରେ ତାଙ୍କର ଦୁଇଟି ମୋବାଇଲ୍ ଚୋରି ହେଇଥିବାର ସୂଚନା ଦେଲେ । ଗୋଟିଏ ବଲାଙ୍ଗୀର ରେଳଷ୍ଟେସନରୁ ଓ ଆଉଗୋଟେ ଅନ୍ୟତ୍ର ।

ତେବେ ଖବର ପରିବେଷଣ ଆଳରେ ଏହା ଏକ ଗପ ନୁହେଁ । ଜନହିତରେ ଜାରୀ  । ଥାନାରେ ଅନ୍ୟମାନେ ସେମାନଙ୍କ ମୋବାଇଲ୍ ଚୋରିର ରିପୋର୍ଟ କରିଥିଲେ । କହିଲେ  : ତମେ ସାମ୍ବାଦିକ ବୋଲି ପୁଲିସ୍ ସହଯୋଗ କଲା । ଥାନାବାବୁ ପ୍ରତିବାଦ କଲେ: କଥା ସେଇଆ ନୁହେଁ । ବରଂ ସେ ନିଜେ ଆଗ୍ରହ ନେଇ ତଥ୍ୟ ସଂଗ୍ରହ କଲେ ଓ ଆମକୁ ସାହାଯ୍ୟ କଲେ ବୋଲି  ।

ଏଣୁ ଯେଉଁମାନଙ୍କର ମୋବାଇଲ୍ ଚୋରିହୋଇଛି ବା ହେଉଛି , ସେମାନେ ଭାଗ୍ୟକୁ ନ ନିନ୍ଦି, ଚୁପ୍ ନ ପଡି, ଖବର ସଂଗ୍ରହ କରି ପୁଲିସ୍ ର ସହାୟତା ନିଅନ୍ତୁ ଓ ନିଜେ ଭିଡଭିତରେ ସଚେତନ ରୁହନ୍ତୁ ।