04-Jun-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ) ରାଜ୍ୟର ଉଚ୍ଚଶିକ୍ଷା ବିଭାଗ କିପରି ଗୁରୁତର ଅନିୟମିତତାର ଶିକାର ହୋଇଛି , ଏହାର ଜ୍ବଳନ୍ତ ପ୍ରମାଣ ହେଉଛି ବଲାଙ୍ଗୀର ଜିଲ୍ଲାର ଗୋଟିଏ କଲେଜରେ ଦୀର୍ଘ ୨୩ ବର୍ଷ ଧରି ଜାଲ୍ ମାର୍କସିଟ୍ ଦାଖଲ ବଳରେ ଏକ ଜୁନିଅର କଲେଜରେ ଚାକିରୀ କରି ପ୍ରାୟ ୪୦ ଲକ୍ଷ ଟଙ୍କା ବେତନ ବାବଦକୁ ପରିଚାଳନା କମିଟି ଓ ସରକାରୀ ତହବିଲରୁ ଲୁଟିନେବାପରେ ଏବେ ଧରାପଡି ଥାନାରେ ମାମଲା ଋଜୁ ହେବା ଘଟଣା । ପାଟଣାଗଡ ଥାନାରେ ଋଜୁ ମାମଲା ଅନୁଯାୟୀ, ଏହି ଦୁଇଜଣ ହେଲେ ଯୋଗୀମୁଣ୍ଡା ରାଜେନ୍ଦ୍ର ମେହେର ଜୁନିଅର କଲେଜର ଅଧ୍ୟାପକ । କଲେଜ ଅଧ୍ୟକ୍ଷଙ୍କ ଅଭିଯୋଗ ଅନୁଯାୟୀ ଗତ ୧୯୯୯ରୁ ଏମାନେ ନିଯୁକ୍ତି ପାଇ ଚାକିରୀ କରିଆସୁଥିଲେ । ଏବେ ପାଟଣାଗଡ ପୁଲିସ୍ ଏହାର ତଦନ୍ତ କରୁଥିବା ପ୍ରକାଶ ।  ତେବେ ଏଠି କଥା ଉଠୁଛି , ଏହା କିପରି ସମ୍ଭବ ହେଲା  ? ଯଦି ସେତେବେଳେ କଲେଜର ନିଯୁକ୍ତିଦାତା ମ୍ୟାନେଜିଂ କମିଟି ଏହା ଜାଣିପାରି ନଥିଲେ , ଦୀର୍ଘ ୨୩ ବର୍ଷ ଧରି ବିଭାଗ କେମିତି ଶୋଇପଡିଥିଲା  ? ଏତେବର୍ଷ ମଧ୍ୟରେ ନା ପ୍ରଶାସନ  ନା ଉଚ୍ଚଶିକ୍ଷା ବିଭାଗ  ନା ସହକର୍ମୀ ନା କୌଣସି ନୀରିକ୍ଷକ, ଅଡିଟ୍ ବାଲେ ; କେହି ବି ଏତେବଡ ଅନିୟମିତତାକୁ ଧରିପାରି ନଥିଲେ କେମିତି  ? 

ଏବେ ଆଉ ଏକ ସନ୍ଦେହ ସୃଷ୍ଟି ହେଲାଣି ଯେ , ଏଭଳି ଜାଲିଆତି କେବଳ ସେହି କଲେଜରେ ଘଟିଛି ନା ଜିଲ୍ଲାର ବା ଅନ୍ୟାନ୍ୟ କଲେଜରେ ବି ଘଟିଛି  ?

ସ୍ଥାନୀୟ ଜନସାଧାରଣଙ୍କ ଆଲୋଚନା ଅନୁଯାୟୀ , ସେଇ ପାଟଣାଗଡ ଉପଖଣ୍ଡର ଆଉ ଏକ ଗ୍ରାମର ଯୁକ୍ତ ଦୁଇ ଓ ଯୁକ୍ତ ତିନି କଲେଜରେ ଏଭଳି ଜାଲିଆତିର ଯଥେଷ୍ଟ ସମ୍ଭାବନା ରହିଛି ।  ଏହି କଲେଜର ଦୁଇଜଣ ସ୍ବାମୀ- ସ୍ତ୍ରୀ ଅଧ୍ୟକ୍ଷ- ଅଧ୍ୟକ୍ଷାଙ୍କ କାର୍ଯ୍ୟକଳାପ ସମ୍ପର୍କରେ ଦୀର୍ଘଦିନରୁ ସନ୍ଦେହ ପ୍ରକାଶ ପାଇଆସୁଛି ।  ଏହି କଲେଜର ଛାତ୍ରଛାତ୍ରୀଙ୍କ ଆଡ୍ ମିଶନ୍ ଠାରୁ ପରୀକ୍ଷା, ପରୀକ୍ଷାଫଳ, ଭିତ୍ତିଭୂମି ନିର୍ମାଣ, ଅଧ୍ୟାପକ/ଅଧ୍ୟାପିକାଙ୍କ ନିଯୁକ୍ତି ଓ ଅନ୍ୟାନ୍ୟ ବିଷୟରେ ଯାବତୀୟ ଗୁରୁତର ଅଭିଯୋଗ ପ୍ରକାଶ ପାଇ ଆସିଛି ।  ସବୁଠାରୁ ବଡ଼କଥା ହେଲା, ଏହି ଉଭୟ କଲେଜର ଅଧ୍ୟକ୍ଷ / ଅଧ୍ୟକ୍ଷାଙ୍କ ନିଯୁକ୍ତି ବେଳର ପ୍ରମାଣପତ୍ରର ବୈଧତାର ପୁନର୍ବାର ଯାଞ୍ଚ୍ ବୋଲି ଅଞ୍ଚଳର କେତେକ ବୁଦ୍ଧିଜିବୀ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି ।  ବିଭାଗୀୟ ଅଧିକାରୀଙ୍କ ସହ ଲମ୍ବାହାତ ଓ ରାଜନୈତିକ ପୃଷ୍ଠପୋଷକତାରେ ଏହି ପ୍ରିନିସ୍ ପାଲ୍ ଦମ୍ପତ୍ତିଙ୍କର ନାଗ- ନାଗୋଣୀଖେଳର ପର୍ଦ୍ଦାଫାଶ୍ ଜରୁରୀ ହୋଇ ପଡିଥିବା ଲୋକମତ ପ୍ରକାଶ ପାଉଛି ।
ଏଣୁ ପଶ୍ଚିମଓଡିଶା ସମେତ ସାରା ରାଜ୍ୟରେ ଦେଶପାଇଁ ଭବିଷ୍ୟତ ନାଗରିକ ଗଠନର ଦାୟିତ୍ୱ ବହନ କରୁଥିବା ଏହି ମଣିଷ ତିଆରି କାରଖାନାକୁ ସବୁମନ୍ତେ ସ୍ବଚ୍ଛ ଓ ଦୁର୍ନୀତିମୁକ୍ତ ରଖିବା ସରକାରଙ୍କର ପ୍ରଥମ ଦାୟିତ୍ବ ।