04-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ବଲାଙ୍ଗୀର ଜିଲ୍ଲାରେ ବିଭିନ୍ନ ସ୍ଥାନରେ ଗତ କେତେବର୍ଷ ଧରି ସରକାରୀ ଚାଉଳଚୋରି ଘଟଣା ଲୋକଙ୍କର ଏକପ୍ରକାର ଦିହସୁହା ହେଇଗଲାଣି । ପିଡିଏସ୍ , ସ୍କୁଲ୍ ର ମଧ୍ୟାହ୍ନଭୋଜନ ବା ଅଙ୍ଗନବାଡିର ଶିଶୁ ଓ ଗର୍ଭବତୀ / ପ୍ରସୂତୀମହିଳାଙ୍କ ପାଇଁ ରନ୍ଧାଖାଦ୍ୟ ଭାବେ ସରକାର ଯୋଗାଇଦେଉଥିବା ରିହାତିମୂଲ୍ୟର ଚାଉଳ କେବେ ରାଇସ୍ ମିଲ୍ ରୁ , ମିଲ୍ ପାଖରୁ , ଆର ଆର ସି ଗୋଦାମରୁ , ରାଜ୍ୟ ପଣ୍ୟାଗାର ଓ ଏଫସିଆଇ ଗୋଦାମରୁ ଓ ରାସ୍ତାଘାଟରୁ ଗାଡି ଗାଡି ଧରାପଡି ଥାନାରେ ଦିନଦିନ ଧରି ଅଟକ ରହିବାପରେ ଯୋଗାଣବିଭାଗ , ଶିକ୍ଷା ବିଭାଗ , ପ୍ରଶାସନ ବା ସରକାରଙ୍କ ପକ୍ଷରୁ କ୍ଲିନ୍ ଚିଟ୍ ଦିଆଯାଇଥିବା ପରି ପ୍ରହସନ ଏ ଜିଲ୍ଲାର ପୁରୁଣା ମାମଲା ।

ଅଳ୍ପଦିନତଳେ ଯୋଗୀମୁଣ୍ଡା ନିୟନ୍ତ୍ରିତ ବଜାର ପ୍ରାଙ୍ଗଣ ପରିସରରେ ଥିବା ରାଇସ୍ ରିସିଭିଙ୍ଗ୍ ସେଣ୍ଟର୍ ବନାମ ଯୋଗାଣ ନିଗମର ଗୋଦାମରୁ ୧୪ ୪୨  ବସ୍ତା ଅଙ୍ଗନବାଡି ଚାଉଳ ନେଇ ଯୋଗୀମୁଣ୍ଡାର ଜଣେ ମାରୁଆଡି ବ୍ୟବସାୟୀଙ୍କ ଗୋଦାମରେ ରଖି ଧରାପଡିଥିଲେ ଏହାର ପରିବହନ ଏଜେଣ୍ଟ ତୋଫାନ୍ ମେହେର ବୋଲି ପ୍ରକାଶ ପାଇ ହଇଚଇ ସୃଷ୍ଟି ହେଲାପରେ ସବୁ ଫୁସ୍ ହେଇଗଲା । ପୁଣି ଏବେ ସଇଁତଳା ଅଞ୍ଚଳରେ ଓ ପାଟଣାଗଡ ବଥର୍ଲାଛକରେ ଦୁଇଟି ଚାଉଳଭର୍ତ୍ତି ମିନିଟ୍ରକ୍ ଧରାପଡିଛି । ତେବେ ସଇଁତଳା ଅଞ୍ଚଳରେ ଧରାପଡିଥିବା ଗାଡିଟିର ଚାଉଳକୁ ତୁଷରାର ଜଣେ ତଥାକଥିତ ଟ୍ରେଡିଂବେପାରୀ ନାଁ'ରେ ଛାଡିଦିଆସାରିଥିବା ବେଳେ , ଦୀର୍ଘ ୭ ଦିନଧରି ପାଟଣାଗଡ ଥାନାରେ ଅଟକ ରହିଥିବା ଚାଉଳଗାଡି ସମ୍ପର୍କରେ ଗଣମାଧ୍ୟମରେ ତନାଘନା ଖବର ପ୍ରକାଶ ପାଉଛି । ଏହି ଚାଉଳ ଯୋଗୀମୁଣ୍ଡାର ଆରଏମସିରୁ ଆସି ଖପ୍ରାଖୋଲ ଯିବା ବଦଳରେ ପାଟଣାଗଡ ପଟକୁ ଆସୁଥିଲା ଓ ଏହା ସେହି ପରିବହନ ଏଜେଣ୍ଟ ତୋଫାନ୍ ମେହେରଙ୍କର ବୋଲି ପ୍ରକାଶ । ପୁଲିସ୍ ତାଙ୍କୁ ଡକାଇଥିବା ସତ୍ତ୍ୱେ ସେ ଆସୁ ନଥିବା ଅଧିକ ସନ୍ଦେହ ସୃଷ୍ଟି କରିଛି ।

ତେବେ ଜିଲ୍ଲାରେ ଟିଟିଲାଗଡର ଜଣେ ପୁରୁଣା କୁଖ୍ୟାତ ସରକାରୀ ଚାଉଳ ମାଫିଆ ହିଁ ଏସବୁର ମୁଖ୍ୟ କାର୍ପଟ୍ ଦାର୍ ବୋଲି ଲୋକେ ବହୁଦିନରୁ ସନ୍ଦେହ କରି ଆସୁଛନ୍ତି । ତାଙ୍କର ବିଭିନ୍ନ ଦଳର ରାଜନେତା , ଲୋକ ପ୍ରତିନିଧି , ପୁଲିସ୍ , ଉପଜିଲ୍ଲାପାଳ , ମନ୍ତ୍ରୀ , ବିଧାୟକ , ସାଂସଦ , ଜିଲ୍ଲା ପ୍ରଶାସନ , ସଚିବ , ଯୋଗାଣ ବିଭାଗ ସହ ରାଜଧାନୀରେ ଲମ୍ବାହାତ ରହିଥିବାରୁ  ଜିଲ୍ଲାରେ ଏଭଳି ସରକାରୀଚାଉଳଚୋରି ବାରମ୍ବାର ଘଟିଆସୁଥିଲେ ହେଁ , ବିଭିନ୍ନ ଆଳରେ ଚପାଇ ଦିଆଯାଇଆସୁଥିବା ଚର୍ଚ୍ଚା ହେଉଛି ।