04-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)/   କୋଶଳ କଳା ମଣ୍ଡଳର ଉଦ୍ଦେଶ୍ୟ ବା କାର୍ଯ୍ୟକାରିତା ଯାହାହେଇଥାଉନା କାହିଁକି ସମ୍ପ୍ରତି ଏହା କେତେକ ଲୁଣ୍ଠନକାରୀଙ୍କ ଜାଗିର୍ ପାଲଟିଯାଇଛି । ସେଥିରେ ଜିଲ୍ଲା ପ୍ରଶାସନର କେତେକ କର୍ମଚାରୀ ବା ଅଧିକାରୀ ମଧ୍ୟ ସାମିଲ୍ । ବିଭିନ୍ନ ଆୟଉପାୟରେ କେତେକଙ୍କ ପକେଟ୍ ଗରମ ହେଉଛି । ଏହା ଆଖି ଖୋଲାକରି ସମସ୍ତେ ଦେଖୁଛନ୍ତି । ପୁଲିସ୍ ଓ ପ୍ରଶାସନ ସବୁ ଜାଣି ଅଜଣା ।  ସେମାନଙ୍କ କାରବାରରୁ ଫୁର୍ସତ୍ କାହିଁ ଯେ , ଏ ଛୋଟମୋଟ କଥାରେ ମୁଣ୍ଡ ପୁରାଇବେ  !  ତା'ଛଡା ଆମ ଲୋକେ ସବୁଦିନ ଅସଚେତନ ଓ ଭୋଳାନାଥ  !  ହେଇଥିବ, ସରକାର ପରମିଶନ୍ ଦେଇଥିବେ ବା ସେଇ ସୁଯୋଗ୍ୟ ବ୍ୟକ୍ତିବିଶେଷଙ୍କୁ ଦାୟିତ୍ୱ ଦିଆଯାଇଥିବ...ଇତ୍ୟାଦି ଭାବି ସେମାନେ ନିଶ୍ଚନ୍ତ  । 

ଏବେ ବଲାଙ୍ଗୀର ସହରରେ ଶୀତଳଷଷ୍ଠୀ ଉତ୍ସବ ଚାଲିଛି ।  ଲୋକଉତ୍ସବ, ବହି ହାଟକୁ ସିନା କରୋନା ମାଡିଯିବ, ଏତେ ଭିଡକୁ ମହାଦେବବାବା- ପାର୍ବତୀମାତା ସାହା ହେଉଛନ୍ତି । ତାଙ୍କ ଭକ୍ତମାନଙ୍କୁ କିଛି ଲଗାପଘା ନାଇଁ ।  ଏହି ଆଳରେ କୋଶଳ କଳାମଣ୍ଡଳରେ ପଡିଛି ମୀନାବଜାର । ପୂର୍ବବର୍ଷମାନଙ୍କ ପରି ଏଥିରେ ବି ଦଲାଲି ।  ପ୍ରଭାବଶାଳୀ ଚାନ୍ଦାବାଜ୍ ଗୋଷ୍ଠୀ ଏହାକୁ ଲକ୍ଷାଧିକଟଙ୍କାରେ  ଆଣିଥିବା କୁହାଯାଉଛି । ସେଇଟା ତାଙ୍କ ଆୟଉପାର୍ଜନ ।  ଜିଲ୍ଲା ସଂସ୍କୃତି ଅଧିକାରୀଙ୍କ ଅଧୀନରେ ଥିବା ପଡିଆଟି ଭଡା ଲାଗିଛି । ମାସେରୁ ଅଧିକଦିନ ରହିବ ମୀନାବଜାର । ଦିନକୁ ପନ୍ଦରଶହ ସର୍କାରୀଭଡା ।  ଅଧିକାରୀ ଗେଁ ପେଁ ହଉଥିଲେ କୁଆଡେ ଯେ , ଦୈନିକ ଭଡାଟା କମ୍ ହେଇଯାଉଛି । ସେଠି ବି ଦଲାଲ ଲାଗିଛନ୍ତି ।  ' ଏ ବର୍ଷଟା ଏତିକି ଥାଉ , ଆଗାମୀବର୍ଷ ବଢାଇବା ' ବୋଧଶୋଧ ଦେଇ ଉଭୟପକ୍ଷରୁ ସ୍ବେଚ୍ଛାସେବୀ ପ୍ରତିନିଧିତ୍ବ କରିଦେଲେଣି । ତାଙ୍କୁ ଏ ଦାୟିତ୍ୱଟି କିଏ ଦେଲା, ପଚାରିବାକୁ କାହାରି ଜିଭରେ ହାଡ ନାହିଁ  !  କାରଣ ତାଙ୍କର ଜିଲ୍ଲାପାଳଙ୍କଠୁଁ ସବୁ ମିଟିଂସିଟିଂରେ ବସାଉଠା ସମସ୍ତେ ଦେଖିଆସୁଛନ୍ତି ।

ଆଉ ଏକ ଛୋଟିଆକଥା ହେଲା, କଳାମଣ୍ଡଳରେ ପଡିଥିବା ମୀନାବଜାରକୁ ଯାଉଥିବା ଲୋକବାକଙ୍କର ବାଇକ୍, ସାଇକେଲ ଓ ଗାଡିମଟର ରଖିବାକୁ କରାଯାଇଥିବା ଅଘୋଷିତ ଅବୈଧ ଷ୍ଟାଣ୍ଡ୍ । ମଟରସାଇକଲ ପିଛା ୨୦ ଟଙ୍କା ତଣ୍ଡ ଗଣିବାକୁ ପଡୁଛି । କିଏ ଅନୁମତି ଦେଲା  ? କେହି ପଚାରିନାହାଁନ୍ତି । ଶହ ଶହ ଯାନବାହନକୁ ମାସେକାଳ ଚାଲିବ ଲୁଣ୍ଠନ । ପାଖପଡାର ଅସାମାଜିକ ଟୋକାଏ ଜବରଦସ୍ତି ସବୁବେଳେ ଏହା କରିଆସୁଛନ୍ତି ।  ସେଠି ବି  ଦଲାଲ ଲାଗିଗଲାରୁ ସେ ଦୁର୍ବୃତ୍ତଗୋଷ୍ଠୀ ଏୟା ଜବାବ୍ ଦେଲେ: ଆମେ ସବୁବେଳେ କରୁଛୁଁ ' ବୋଲି  !  ସେଉଠୁ ଅବୈତନିକ ସ୍ବେଚ୍ଛାସେବୀ ଧମକାଇ କହିଲେ: ହେଇପାରିବନି । ଆମକୁ ବି କିଛି ଦବାକୁ ପଡିବ ! ' ମାମଲା ବିଚାରାଧୀନ ରହିଛି ବୋଧେ ।

ଏମିତି କୋଉ ଉପାୟରେ କୋଉ ଅଧିକାରରେ କିଏ କୋଉଠି କେମିତି ଲୁଟୁଛି, ଜାଣିବାକୁ କାହାରି ଇଚ୍ଛା ନାହିଁ  !  ଜୟ କଳା  !