03-Jun-2022

ବଲାଙ୍ଗିର,(ପ୍ରେରଣା ଖବର) ବଲାଙ୍ଗିର ଭୀମ ଭୋଇ ମେଡିକାଲ କଲେଜ ଓ ଡାକ୍ତରଖାନାରେ ଥିବା ଏକ ମାତ୍ର ଡାଏଲିସିସ ସେନ୍ଟରର ଅବସ୍ଥା ସାଂଘାତିକ ହୋଇ ପଡିଛି । ଏକ ବେସରକାରୀ ସଂସ୍ଥା ହାତକୁ ଏହି ଅତି ସମ୍ବେଦନଶିଳ ବିଭାଗକୁ ଟେକି ଦିଆ ଯାଇଛି । ସେହି ସଂସ୍ଥାର ଅପାରଗତା ଓ ଡାକ୍ତରଖାନା କର୍ତ୍ତୁପକ୍ଷଙ୍କ ବେପରୁଆ ମନୋଭାବ ଯୋଗୁଁ ଡାଏଲିସିସ ବିଭାଗକୁ ଜମକୁଣ୍ଡରେ ପରିଣତ କରି ଦିଆଯାଇଛି ବୋଲି ଡାଏଲିସିସ୍ ରୋଗୀମାନେ  ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି । ପ୍ରାପ୍ତ ସୂଚନା ଅନୁସାରେ, ଭୀମ ଭୋଇ ମେଡିକାଲରେ ଡାଏଲିସିସ୍ ବିଭାଗ ଚଳାଇବାର ସମସ୍ତ ଦାୟିତ୍ୱ ରାହୀ କେଆର ନାମକ ଏକ ଘରୋଇ ସଂସ୍ଥାକୁ ଦିଆ ଯାଇଛି । କିନ୍ତୁ ଉକ୍ତ ସଂସ୍ଥା ପକ୍ଷରୁ ୯୦ ଜଣ ଡାଏଲିସିସ୍ ରୋଗୀଙ୍କ ପାଇଁ ମାତ୍ର ଜଣେ ଟେକନିସିଆନ୍‌ଙ୍କୁ ନିଯୁକ୍ତ କରାଯାଇଛି । ତେବେ ସେହି ଟେକନିସିଆନଙ୍କୁ ବାରମ୍ବାର ବଦଳି କରାଯାଇଛି ।

 କିନ୍ତୁ ଏବେ ଜଣେ ଅନଭିଜ୍ଞ ଟେକନିସିଆନଙ୍କୁ ଆଣି ବିଭାଗରେ ନିୟୋଜିତ କରାଯାଇଛି । ଉକ୍ତ ଟେକନିସିଆନ୍ ଜଣଙ୍କ ଅନଭିଜ୍ଞ ଥିବା ବେଳେ ଅନେକ ଡାଏଲିସିସ୍ ରୋଗୀଙ୍କ ପିସ୍ତୁଲା ସଂଯୋଗ କରି ପାରୁ ନାହାନ୍ତି ବୋଲି ଅଭିଯୋଗ ହେଉଛି ।  ଫଳରେ ରୋଗୀମାନଙ୍କ ପ୍ରବଳ ରକ୍ତସ୍ରାବ ହେବା ସହିତ କେତେକଙ୍କ ପିସ୍ତୁଲା ସଂପୁର୍ଣ୍ଣ ନଷ୍ଟ ହୋଇ ଘାତକ ପରିସ୍ଥିତି ସୃଷ୍ଟି ହେଉଛି ।  ସେହିପରି ଡାଏଲିସିସ୍ ବିଭାଗରେ ୧୦ଟି ମେସିନ ରହିଥିଲା । ସେଥିରୁ ଏବେ ଦୁଇଟି ଅଚଳ ହୋଇ ପଡିଥିବା ବେଳେ କେବଳ ୮ଟି ମେସିନରେ ୮୮ଜଣ ରୋଗୀଙ୍କ ଡାଏଲିସିସ୍ ବୋଝ ପଡୁଛି ।  ଯଦ୍ୱାରା କିଡନୀ ରୋଗୀଙ୍କ ପାଇଁ ପ୍ରଯ୍ୟୁଜ୍ୟ ସାଢେ ତିନି ଘଣ୍ଟାର ଡାଏଲିସିସ୍ ପରିବତ୍ତେ ରୋଗୀଙ୍କୁ ମାତ୍ର ୨ ଘଣ୍ଟା ଡାଏଲିସିସ୍ କରାଯାଉଛି । ଯାହା ରୋଗୀଙ୍କ  ପାଇଁ ନିଅଣ୍ଟିଆ ।  ଡାଏଲିସିସ୍ ମେସିନକୁ ନିୟମ ମୁତାବକ ପ୍ରକ୍ରିୟାରେ ସଫା କରାଯାଉନଥିବାବେଳେ ରୋଗୀଙ୍କ ଶରୀରରେ ସଂକ୍ରମଣ ବଢାଉଛି । ବିଭାଗରେ ଲାଗିଥିବା ୫ଗୋଟି ଏସି ମଧ୍ୟରୁ ୪ ଗୋଟି ଦୀର୍ଘ ଦୁଇ ମାସ ହେବ ବନ୍ଦ ରହିଛି । ଆହୁରି କିଡନୀ ରୋଗୀଙ୍କ ଉଦ୍ଦେଶ୍ୟରେ ସରକାରଙ୍କ ତରଫରୁ ଲୋକାଲ ପର୍ଚେଜ ଫର୍ମ ମାଧ୍ୟମରେ ଦିଆଯାଉଥିବା ମାଗଣା ଔଷଧକୁ ମଧ୍ୟ ଗତ ନଭେମ୍ବର ମାସ ଠାରୁ ବନ୍ଦ କରି ଦିଆଯାଇଛି । ତାଛଡା ବିଭାଗରେ ପିଇବା ପାଣି ଓ ବଜୁଳି୨୪ ଘଣ୍ଟା  ଯୋଗା ଯାଇ ପାରୁ ନାହିଁ । ଡାକ୍ତରଖାନା ତରଫରୁ ହସପିଟାଲ ସୁପରିଷ୍ଟେଡେନ୍ଟ   ମଧ୍ୟ ପରିଦର୍ଶନକୁ ଆସୁ ନଥିବା ବେଳେ ରୋଗୀଙ୍କ ଆକୁଳ ଅଭିଯୋଗ ଅଶୁଣା ରହୁଛି । ଏ ସବୁ ସମସ୍ୟାରେ ଭୋଗି ଭୋଗି ଗତ ଦେଢ ମାସରେ ୧୦ ଜଣ ରୋଗୀ ମୃତ୍ୟୁ ବରଣ କଲେଣି, ତଥାପି ପ୍ରଶାସନ ଓ ବ୍ୟବସ୍ଥା ର ଆଖି ଖୋଲିନି । ଯଦି ଯଥାଶିଘ୍ର ଏହି ସମସ୍ୟା ଗୁଡିକର ସମାଧାନ କରାନଯାଏ , ତେବେ ଆମେ ମୁର୍ମୁଷ ରୋଗୀମାନେ ଆମର ଜୀବନ ରକ୍ଷା ପାଇଁ ଜିଲ୍ଲାପାଳ ଅଫିସ ଆଗରେ ଧାରଣା ଦେବାକୁ ବାଧ୍ୟ ହେବୁ ବୋଲି ଡାଏଲିସିସ୍ କରାଉଥିବା ରୋଗୀ ସତ୍ୟେନ୍ଦ୍ର ପ୍ରସାଦ ସିଂଦେଓ(ଚକୁ) ,ନେତ୍ରାନନ୍ଦ ଶତପଥି , ସତ୍ୟକୃଷ୍ଣ ବାରିକ , ମାନସ ରଂଜନ ମିଶ୍ର , ମଧୁମିତା ପୂଝାରୀ , ସାନ ଡାଙ୍ଗ , ପ୍ରଫୁଲ୍ଲ ସାହୁ , ଅଜିତ ପାତ୍ର , ରମେଶ ମିଶ୍ର , ଚକ୍ରଧର ପଣ୍ଡା ଓ ରବିଚନ୍ଦ୍ର ବାରିକ ପ୍ରମୁଖ ଜଣାଇଛନ୍ତି ।