30-Apr-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) : ବୋଧହୁଏ ଏହି ଗୋଟିଏ ସରକାରୀ ବିଭାଗ ରହିଛି , ଯେଉଁ ବିଭାଗରେ କେତେକ କର୍ମଚାରୀ ସରକାରୀ ତହବିଲରୁ ବେତନ ପାଇ ଖଟୁଥା'ନ୍ତି ଅଫିସରଙ୍କ ଘରେ ଘରୋଇ ଚାକର ହେଇ  ।  ଇଏ ହେଲା ବନବିଭାଗ । ସରକାରଙ୍କ ଜ୍ଞାତସାରରେ ଏହି ଗୋତିଖଟଣି ବର୍ଷ ବର୍ଷ ଧରି ଚାଲି ଆସୁଛି ।  ଗଣମାଧ୍ୟମ ସମେତ ଲୋକପ୍ରତିନିଧିମାନେ ବି ଏହା ଜାଣିଛନ୍ତି ।  ପାରଳାଖେମୁଣ୍ଡି ଏସି ଏଫ୍ ସୌମ୍ଯରଞ୍ଜନଙ୍କ ମୃତ୍ୟୁବେଳେ ମଧ୍ୟ ଏହି ଘଟଣା ତଦନ୍ତକାରୀ ଓ ସମସ୍ତଙ୍କ ଦୃଷ୍ଟିକୁ ଅଫିସିଆଲି ଆସିଥିଲା ।  ଦୁଇଜଣ ଏସିଏଫ ଙ୍କ ରାନ୍ଧୁଣିଆ ଥିବା କର୍ମଚାରୀ ଜଣକ ଥିଲେ ଜଣେ ବନକର୍ମଚାରୀ ।  କେବଳ ଏତିକି ନୁହେଁ , ରାଜ୍ୟର ପ୍ରାୟ ସମସ୍ତ  ସିସିଏଫ୍ , କଞ୍ଜରଭେଟର , ଡିଏଫଓ , ଏସିଏଫ୍ , ଡେପୁଟି ରେଞ୍ଜର , ରେଞ୍ଜର , କେତେକ ଫରେଷ୍ଟର ଓ ଅନ୍ୟାନ୍ୟ ବନବିଭାଗ ତଥା କେନ୍ଦୁପତ୍ର ବିଭାଗର ବରିଷ୍ଠରୁ ଅନ୍ୟାନ୍ୟ ଅଧିକାରୀଙ୍କ ବାସଭବନ ବା ଘରେ ଏକାଧିକ ଉଆଚର୍ , ପାରା ଉଆଚର୍ , ହାତୀସ୍କ୍ବାଡ୍  କର୍ମଚାରୀ ,  ନିଆଁଲିଭାଳୀ , ସିଜନାଲ୍ ଷ୍ଟାଫ୍ , ନର୍ସରୀ ଉଆଚର୍ , ଚୌକିଦାର , ପିଅନ , ଗାର୍ଡ ଓ ଅନ୍ୟାନ୍ୟ ଅସ୍ଥାୟୀ କର୍ମଚାରୀମାନେ ସରକାରୀ ତହବିଲରୁ ବିଲ୍ ଭାଉଚରରେ ବେତନ ବା ପାଉଣା ପାଇ ଆସୁଥିବାବେଳେ ଘରୋଇଚାକର ଭାବେ ଖଟିଆସୁଛନ୍ତି । ଅଭିଯୋଗ କଲେ , ବିନା ନୋଟିସ୍ ରେ ଡିସ୍ ଏନଗେଜମେଣ୍ଟ୍ ବା କାମରୁ ନିକାଲି ଦିଆଯାଏ ।  କିଛିଦିନତଳେ ବଲାଙ୍ଗୀରରେ ଜଣେ ପୂର୍ବତନ କେନ୍ଦୁଲିଫ୍ କଞ୍ଜରଭେଟରଙ୍କ ବାସଭବନରେ ସାହାବଙ୍କ କାମୁଡା ରୋଗିଣା ବିଲାତିକୁକୁରକୁ ସେବା ନକରିବାରୁ ସାହେବ ଓ ସାହାବାଣୀ ଜଣେ ଉଆଚରକୁ ମାଡମାରି ବାହାର କରିଦେଇଥିବା ଅଭିଯୋଗ ପ୍ରକାଶ ପାଇଥିଲା । କିଛିବର୍ଷତଳେ  ଭୁତିଆରବାହାଲରେ ଅବସ୍ଥାପିତ ଜଣେ କେନ୍ଦୁପତ୍ର ରେଞ୍ଜରଙ୍କ ଘରତିଆରି କାମପାଇଁ ଏଠାରୁ ଏକାଧିକ ଏପରି ଅସ୍ଥାୟୀ କର୍ମଚାରୀଙ୍କୁ ପଠାଯାଇଥିବା ସେମାନଙ୍କ ସଂଘରେ ଅଭିଯୋଗ ହୋଇଥିଲା ।  ଏଇ କିଛିଦିନ ତଳେ ବନବିଭାଗର ବହୁଚର୍ଚ୍ଚିତ ଦୁର୍ନୀତିଗ୍ରସ୍ତ  ଆଇଏଫଏସ ପାଠକଙ୍କ ରାଜ୍ୟବାହାରର ସମ୍ପର୍କୀୟଙ୍କ ଘରକୁ ପଠାଯାଉଥିବା ସୋନପୁର ଉଲୁଣ୍ଡା ଅଞ୍ଚଳର ଜଣେ ଯୁବତୀ ଚାକରାଣୀର ବାରଙ୍ଗ ନିକଟରେ ଟ୍ରେନ୍ ରୁ ପଡି ରହସ୍ୟଜନକ ଭାବରେ ମୃତ୍ୟୁ ହୋଇଥିଲା । ଉକ୍ତ ଯୁବତୀଟି ମଧ୍ୟ ସମ୍ପୃକ୍ତ ଅଞ୍ଚଳର ଜଣେ ବିଭାଗୀୟ ସିଜନାଲ ଷ୍ଟାଫ୍ ଭାବରେ ଦର୍ଶାଯାଇ ବେତନ ଦିଆଯାଉଥିବା ଅସମର୍ଥିତ ସୂତ୍ରରୁ ପ୍ରକାଶ ପାଇଥିଲା । ଏଭଳି ଅନେକ ଋତୁକାଳୀନ  ଅସ୍ଥାୟୀ କର୍ମଚାରୀମାନେ ବିଭାଗୀୟ ସାହେବ ଅଫିସରଙ୍କ ଘରେ ରାନ୍ଧୁଥିବା , ବାସନକୁଶନ ମାଜିବା , ସାହାବାଣୀଙ୍କ ଲୁଗାକାଚିବା , ଘରକାମ କରିବା , ବିଲାତିକୁକୁରର ଯତ୍ନ ନେବା , ଛୁଆ ଖେଳାଇବା ଓ ଅନ୍ୟାନ୍ୟ ଘରୋଇ ଚାକରଭାବରେ ନିୟୋଜିତ ଥାଇ ସରକାରଙ୍କ ତହବିଲରୁ ପାଉଣା ପାଇଆସୁଛନ୍ତି । ଲାଠୋର ରେଞ୍ଜ୍ ରୁ ବଲାଙ୍ଗୀର ହେଡ୍ କ୍ବାର୍ଟର ପର୍ଯ୍ୟନ୍ତ ସବୁଠି ଏଇ ସାହେବୀଅର୍ଦ୍ଦଳୀଙ୍କର ସେବା ଜାରୀରହିଛି । 

ଅନ୍ୟାନ୍ୟ ବିଭାଗରେ ମଧ୍ୟ ଏଭଳି ବିଭାଗୀୟ ତଳିଆ କର୍ମଚାରୀଙ୍କ ଘରୋଇ ଚାକରସେବା ରହିଛି । ତେବେ ବନବିଭାଗରେ ଏହା ବେଶି । ଏଣୁ ବଲାଙ୍ଗୀର ବନବିଭାଗରେ ଜଙ୍ଗଲରେ ହାତୀମରା , ବନାଗ୍ନିରେ ଜଙ୍ଗଲ ଧ୍ବଂସ , ନର୍ସରୀରେ ଚାରା ନଷ୍ଟ  ଓ ଅନ୍ୟାନ୍ୟକାମରେ ସରକାରଙ୍କ ବେତନରେ ଅର୍ଥବିନିଯୋଗ ସତ୍ତ୍ୱେ କର୍ମଚାରୀଅଭାବ ଏକ ମୁଖ୍ୟ କାରଣ ବୋଲି ଜଣାଯାଇଛି । କର୍ମଚାରୀସଂଘମାନେ ମଧ୍ୟ ଏହା ବିରୁଦ୍ଧରେ ପାଟିଖୋଲନ୍ତି ନାହିଁ । ଏହି ସର୍କାରୀବେତନର ଘରୋଇ ଗୋତିଖଟଣି ଖଟୁଥିବା ଦୁଃସ୍ଥ ନିରୀହ ଅସ୍ଥାୟୀ କର୍ମଚାରୀମାନେ ସାହେବ , ସାହାବାଣୀ ଓ ତାଙ୍କ ପିଲାମାନଙ୍କର ଠାରୁ ମାଡଗାଳି , ଝିଙ୍ଗାସ ଖାଇ କେବେ ଦିନେ ଚାକିରୀ ନିୟମିତ ହେବାର ଦିବାସ୍ବପ୍ନରେ କପାଳକୁ ଆଦରି ପଡିରହିଥା'ନ୍ତି ଓ ଆକସ୍ମିକ ତଡାଖାଇ ବାହାରି ଯାଉଛନ୍ତି ।