24-Apr-2022

ବଲାଙ୍ଗିର,(ପ୍ରେରଣା ଖବର) ବଲାଙ୍ଗିର ସହରରେ ପାନୀୟ ଜଳର ଉତ୍କଟ ଅଭାବ ସଂପର୍କରେ  ସ୍ଥାନୀୟ ଜନସ୍ୱାସ୍ଥ୍ୟ ବିଭାଗର ଅଧିକ୍ଷଣ ଯନ୍ତ୍ରୀଙ୍କ କାର୍ଯ୍ୟାଳୟରେ ଯନ୍ତ୍ରୀମାନଙ୍କ ସହ ନାଗରିକ କମିଟିର କର୍ମକର୍ତ୍ତାମାନେ ଆଲୋଚନା କରିଥିଲେ ।  ଆଲୋଚନା ପରେ କାର୍ଯ୍ୟରତ ଅଧିକ୍ଷଣ ଯନ୍ତ୍ରୀ ପାର୍ବତୀ ମୋହନ ପରିଡା ଉତ୍କଟ ପାଣିର ଅଭାବକୁ ଦୃଷ୍ଟିରେ ରଖି ନିୟମିତ ଜଳଯୋଗାଣର ବ୍ୟବସ୍ଥା କରିଥିବାରୁ ବଲାଙ୍ଗୀର ନାଗରିକ କମିଟି  ଶ୍ରୀ ପରିଡାଙ୍କୁ ସାଧୁବାଦ  ଜଣାଇବା ସହ ଆଗକୁ ଯେପରି ଏହା ଜାରି ରହେ ସେ ଉପରେ ଦୃଷ୍ଟି ଦେବାକୁ ନିବେଦନ କରିଛି । ଅଧିକ୍ଷଣ ଯନ୍ତ୍ରୀ ପାର୍ବତୀ ମୋହନ ପରିଡାଙ୍କ କହିବା ଅନୁସାରେ ସହରରେ ଦୈନିକ ୧୫୦ ଲକ୍ଷ

ଲିଟର ପାନୀୟ ଜଳ ଆବଶ୍ୟକ ପଡୁଥିବା ବେଳେ ବର୍ତ୍ତମାନ ୧୨୦ ଲକ୍ଷ ଲିଟର ଜଳ ଯୋଗାଣ ହୋଇପାରୁଛି । ନନ୍ଦନମାଲ ମହାନଦୀରୁ ପାଣି ଯୋଗାଣ ବନ୍ଦ ହୋଇଯାଇଥିବାରୁ ବର୍ତ୍ତମାନ ତରଭା ନିକଟସ୍ଥ ଗୁଦେଲମୁଣ୍ଡାରୁ ଦୁଇଟି ୨୧୪ ଏଚ୍‌ପି ର ଭି.ଟି ପମ୍ପ ସାହାଯ୍ୟରେ ପାନୀୟ ଜଳ ଯୋଗାଣ କରାଯାଉଛି । କିନ୍ତୁ ବର୍ତ୍ତମାନ ଜଳପତ୍ତନ ପ୍ରାୟ ୧ ଫୁଟ କମ ହୋଇଯାଉଥିବାରୁ ଜଳ ଯୋଗାଣରେ ବ୍ୟାଘାତ ସୃଷ୍ଟି ହେଉଛି । ପୁଣି ଜଳ ଉଠାଇବା ଓ ଯୋଗାଣ କରିବା ପାଇଁ  ଉଭୟ ପଟୁ ବିଦ୍ୟୁତ ସରବରାହ ଉପରେ ନିର୍ଭର କରିବାକୁ ପଡୁଛି । ବିଦ୍ୟୁତ ବନ୍ଦ ହେଲେ ଯୋଗାଣରେ ଅସୁବିଧା ହେଉଥିବା ଯନ୍ତ୍ରୀ ପ୍ରକାଶ କରିଥିଲେ । ତେବେ ବଲାଙ୍ଗୀର ନାଗରିକ କମିଟିର ଆଲୋଚନା ଓ ପ୍ରେରଣା ସମେତ ବିଭିନ୍ନ ଗଣମାଧ୍ୟମରେ ଖବର ପ୍ରସାରଣ ପାଇବା ପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା । କାଲିଠାରୁ ବଲାଙ୍ଗୀର ସହରବାସୀଙ୍କ ପାଇଁ ପିଏଚ୍‌ଡି ପାଣି ଉପଲବ୍ଧ ହେଉଛି । ସହରବାସୀଙ୍କୁ ନିୟମିତ ଓ ଏକ ନିର୍ଦ୍ଦିଷ୍ଟ ସମୟରେ ପିଇବା ପାଣି ଯୋଗାଇ ଦେବାକୁ ଜିଲ୍ଲା ପ୍ରଶାସନ ପାଖରେ ବଲାଙ୍ଗୀର ନାଗରିକ କମିଟି ସାଧାରଣ ସଂପାଦକ ମନୋରଂଜନ ସାହୁ ଅନୁରୋଧ କରିଛନ୍ତି ।