09-Apr-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ )  ବଲାଙ୍ଗୀର ମ୍ୟୁନିସିପାଲିଟିର ୨୦ ନମ୍ବର ଉଆର୍ଡରେ କାଉନସିଲର ଭାବେ  ନିର୍ବାଚିତା ହେଲାପରେ ବିଜେଡିର ସୁଶ୍ରୀ ଗାୟତ୍ରୀ ଭୋଇ  ଉପାଧ୍ୟକ୍ଷା ପଦ ମଣ୍ଡନ କରିଛନ୍ତି ।  ତାଙ୍କ ପରି ଜଣେ ଗରିବ ଆତ୍ମନିର୍ଭରଶୀଳା  ସମାଜସେବାରେ ବ୍ରତୀ  ଗ୍ରାଜୁଏଟ୍ ପ୍ରାର୍ଥିନୀଙ୍କୁ ଦଳୀୟ ଟିକେଟ୍ ଦେଇ ବିଜେଡି ପ୍ରଶଂସାଭାଜନ ହେବା ସହ ବିଜୟ ହାସଲ କରିଥିବାବେଳେ ଏବେ ଉପାଧ୍ୟକ୍ଷାଙ୍କର  ଇନ୍ଦିରାନଗରର ୭୦୦ ପରିବାରକୁ ଉଚ୍ଛେଦ କରା ନଯିବାକୁ ଅଧ୍ୟକ୍ଷାଙ୍କ ଜରିଆରେ ପ୍ରଶାସନ ବନାମ ସରକାରଙ୍କୁ ଏକ ଦାବିପତ୍ର ଦେଇଥିବା ଘଟଣା ଶାସକ ବିଜେଡିଦଳ ପାଇଁ ମାଛ ଖାଇ ତଣ୍ଟିରେ ମାଛକଣ୍ଟା ଗଳିଯାଇଥିଲା ପରି ଅଡୁଆ ସୃଷ୍ଟି କରିବାର ସମ୍ଭାବନା ଦେଖାଦେଇଛି । 

ଏହି ପ୍ରତିନିଧି ପୂର୍ବରୁ କହିଆସିଛି ଯେ , ପୌର ନିର୍ବାଚନରେ ସହରର ଜବରଦଖଲ ଉଚ୍ଛେଦ ପ୍ରକ୍ରିୟା ପ୍ରତିବନ୍ଧକ ସୃଷ୍ଟି କରିପାରେ । ତେବେ ପୌରାଞ୍ଚଳବାସୀ ତଥାପି ଶାସକଦଳ ଉପରେ ଭରସା ରଖି ବହୁସଂଖ୍ୟାରେ ଭୋଟଦେଇ ବିଜେଡିର ପ୍ରାର୍ଥୀ / ପ୍ରାର୍ଥିନୀମାନଙ୍କୁ ଜିତାଇଛନ୍ତି ।  ତେବେ ପୌରନିର୍ବାଚନର ଅଳ୍ପଦିନ ପୂର୍ବରୁ ସହରାଞ୍ଚଳରେ ଜବରଦଖଲ ଉଚ୍ଛେଦ ପ୍ରକ୍ରିୟା ଆଳରେ ଯେଉଁଭଳି ଢଙ୍ଗରେ ଦୀର୍ଘ ପଚାଶ / ଷାଠିଏ ବା ଅଧିକବର୍ଷ ଧରି ସହରର ଅପନ୍ତରାରେ ଅଧିକାଂଶତଃ ଘରବାଡି ନଥିବା ଗରିବଗୁରୁବା ଦିନମଜୁରିଆ ଶ୍ରେଣୀର ଲୋକେ ବସବାସ କରି ରହିଆସୁଥିଲେ , ସେମାନଙ୍କୁ ଅତି ନିର୍ଦ୍ଦୟ ଭାବରେ କୌଣସି ଉପଯୁକ୍ତ ଥଇଥାନ କରା ନଯାଇ  ତତ୍କାଳ ନାମମାତ୍ର ନୋଟିସ୍ ଦେଇ ବୁଲ୍ ଡୋଜର ଲଗାଇ କୋର୍ଟ ଆଦେଶ ଅଛି ଦର୍ଶାଇ ଖରାବର୍ଷାଭୀଷଣ ଶୀତଜାଡରେ ଘରଭାଙ୍ଗି ବିତାଡିତ କରାଗଲା , ତାହା ଅମାନବୀୟ ଘଟଣା । ଲୋକଙ୍କର ସେଇ ଦୁର୍ଦ୍ଦଶା ସମୟରେ କୌଣସି ଲୋକପ୍ରତିନିଧି ବା ରାଜନେତା ସେମାନଙ୍କ ପାଖରେ ଯାଇ ଠିଆହୋଇ ନଥିଲେ । ଉପରଠାଉରିଆ ଭାବେ ଗୋଟିଏଦଳ ଦିନେଅଧେ ଧାରଣା ଦେଇ ଉପଯୁକ୍ତ ଥଇଥାନ ଦିଆଯିବାକୁ ପୋଡା ଘାଆରେ ମଲମମରା ପରି ଦାବି କରିଥିଲେ ହେଁ , ଲୋକେ ତାଙ୍କୁ ବିଶ୍ବାସ କରି ନଥିଲେ। ପୌରନିର୍ବାଚନ ଘୋଷଣା ହେବାପରେ ଏହି ପ୍ରସଙ୍ଗରେ ସମ୍ୟକ୍ ରାଜନୀତି ଆରମ୍ଭ ହୋଇଯାଇ ଥିଲେ ହେଁ , ଲୋକେ ଶେଷ ମୁହୂର୍ତ୍ତରେ ଶାସକ ବିଜେଡିଦଳକୁ ହିଁ ଜିତାଇଦେଇଛନ୍ତି । ସୂର୍ଯ୍ୟନଗର , ବ୍ରାହ୍ମଣପଡା , ଫଲସାପଦରି ଓ ଅନ୍ୟାନ୍ୟପଡାରେ ଜବରଦଖଲଉଚ୍ଛେଦ ପ୍ରକ୍ରିୟା ସମ୍ପନ୍ନ ହୋଇଛି । ଇନ୍ଦିରାନଗରରେ ଭଙ୍ଗାଯିବାକୁ  ଚିହ୍ନ ଦିଆଯାଇଛି । ଲୋକେ ଏହାର ଯୋରଦାର ପ୍ରତିବାଦ କରିଥିଲେ । ପୌରସଂସ୍ଥା ଓ  ଜିଲ୍ଲାପ୍ରଶାସନ ଜରିଆରେ ସରକାରଙ୍କୁ ଦାବିପତ୍ର ଦେଇଛନ୍ତି । ଉଲ୍ଲେଖନୀୟ ଯେ , ଇନ୍ଦିରାନଗରରେ ନିର୍ବାଚନ ବର୍ଜନ କରା ନଯାଇ ଯିଏ ତାଙ୍କ ସମସ୍ୟାର ସମାଧାନ ନିମନ୍ତେ ପଦକ୍ଷେପ ନେବ , ସେପରି ପ୍ରାର୍ଥୀ / ପ୍ରାର୍ଥିନୀଙ୍କୁ ଜିତାଇବାକୁ ଏକ ନମୁନାଭୋଟଗ୍ରହଣ କରାଯାଇଥିବା ପ୍ରକାଶ ପାଇଥିଲା ।  ସମ୍ଭବତଃ ଏଇ ସମର୍ଥନ କୋଡିଏ ନମ୍ବର କାଉନସିଲରଙ୍କୁ ଜିତାଇଥିବା ଅନୁମାନ କରାଯାଇପାରେ । ତେବେ ସେ ଯାହାହେଉ , ପୌରାଧ୍ୟକ୍ଷାଙ୍କର ଏପରି ସତ୍ ସାହସ ଓ ଜନହିତକର ନ୍ୟାଯ୍ୟ ପଦକ୍ଷେପକୁ ସ୍ବାଗତ କରାଯାଉଛି । 
ପ୍ରକାଶ ଯେ , ନିର୍ବାଚିତା ହେବାପରେ ପୌରାଧ୍ୟକ୍ଷା ସୁଶ୍ରୀ ଭୋଇ ପୌରାଧ୍ୟକ୍ଷାଙ୍କୁ ଦେଇଥିବା ଦାବିପତ୍ରରେ ଏହି ଇନ୍ଦିରାନଗରର ୭୦୦ ଗରିବ ପରିବାରକୁ ଉଚ୍ଛେଦ କରା ନଯିବାକୁ ଯେଉଁସବୁ ଯୁକ୍ତି ଉପସ୍ଥାପନ କରିଛନ୍ତି , ତାହାର ଔଚିତ୍ଯ ରହିଛି । ଦୀର୍ଘ ୫୦ ରୁ ୬୦ ବର୍ଷ ଧରି ଏଠାରେ ରହିଆସିଥିବା ଏହି ପରିବାରଗୁଡିକ ସରକାରଙ୍କର ବିଭିନ୍ନ ଯୋଜନାରେ ମଧ୍ୟ ଅନ୍ତର୍ଭୁକ୍ତ ରହିଆସିଛନ୍ତି । ପଡାରେ ସ୍କୁଲ୍ , ଅଙ୍ଗନବାଡି କେନ୍ଦ୍ର , ରାସ୍ତାଘାଟ , ବିଦ୍ୟୁତ୍ ସଂଯୋଗ ଇତ୍ୟାଦି ରହିଛି । ଏଣୁ ଏମାନଙ୍କୁ ବିସ୍ଥାପିତ କରା ନଯିବାକୁ ସେ ଦାବି ଜଣାଇଛନ୍ତି ।

ଏଣୁ ପୌରାଧ୍ୟକ୍ଷାଙ୍କର ଏହି ପଦକ୍ଷେପ ନିଶ୍ଚିତ ଭାବରେ ପ୍ରଶାସନ ଓ ସରକାରଙ୍କ କାନରେ ବାଜିବ ବୋଲି ଆଶା କରାଯାଉଛି । କେବଳ ଇନ୍ଦିରାନଗର ବା ୨୦ ନମ୍ବର ଉଆର୍ଡରେ ନୁହେଁ , ପୌରାଧ୍ୟକ୍ଷା ଭାବରେ ସେ ସମଗ୍ର ବଲାଙ୍ଗୀର ମ୍ୟୁନିସିପାଲିଟିରେ ହୋଇଥିବା ଓ ହେବାକୁଥିବା ଏଭଳି ପ୍ରକ୍ରିୟାର ଜନହିତରେ ବିରୋଧ କରିବା ଆବଶ୍ୟକ ବୋଲି ଅନ୍ୟାନ୍ୟ ଉଆର୍ଡବାସୀଙ୍କ ତରଫରୁ ମଧ୍ୟ ତାଙ୍କର ଦୃଷ୍ଟିଆକର୍ଷଣ କରାଯାଇଛି ।