24-Feb-2022

ବଲାଙ୍ଗୀର:  ଗତକାଲିଠାରୁ ବେଲପଡା ବ୍ଲକ୍ ପରିସରରେ ଭୋଟ୍ ବାକ୍ସ ରଖାଯାଇଥିବା ଷ୍ଟ୍ରଙ୍ଗ୍ ରୁମ୍ ରେ ହେରଫେର ସନ୍ଦେହ କରି ସେଠାକାର ଜିଲ୍ଲା ପରିଷଦ ସଭ୍ୟ ପ୍ରାର୍ଥିନୀଙ୍କ ପକ୍ଷରୁ ଅଭିଯୋଗ ଓ ଧାରଣା କରାଯାଇଥିଲା । ଆଜି ପୂର୍ବାହ୍ନରେ ବିଡିଓ ତଥା ନିର୍ବାଚନ ଅଧିକାରୀ ଭିକ୍ଟର ସୋରେଙ୍ଗ୍ ଅଧିକ ଆଲୋକ ଓ ସିସିଟିଭି କ୍ୟାମେରା  ଡିସ୍ ପ୍ଲେ ଲଗାଇବା ଦାବିକୁ ଗ୍ରହଣ କରିବା ପରେ ଧାରଣା ପ୍ରତ୍ୟାହୃତ ହୋଇଥିବା ଜଣାଯାଇଛି । 

ଅଭିଯୋଗରୁ ପ୍ରକାଶ ଯେ , ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ପାଟଣାଗଡ ବିଧାନସଭା ନିର୍ବାଚନ ମଣ୍ଡଳୀର  ବେଲପଡା , ଖପ୍ରାଖୋଲ ଓ ପାଟଣାଗଡ ତିନୋଟି ବ୍ଲକ୍ ରେ ପ୍ରଥମ ପର୍ଯ୍ୟାୟର ଭୋଟଗ୍ରହଣ ପରେ ବେଲପଡା ବ୍ଲକ୍ ରେ ଷ୍ଟ୍ରଙ୍ଗ୍ ରୁମ୍ କରାଯାଇ ଭୋଟବାକ୍ସ ଗୁଡିକୁ ରଖାଯାଇଛି । ବ୍ଲକ୍ ପରିସରରେ ଗୋଟିଏ ସଟର୍ ଲଗାଘରର ୪ ଟି କୋଠରୀରେ ସେଠାକାର ତିନୋଟି ଯୋନ୍ ର ଭୋଟ୍ ବାକ୍ସ  ୩ ଟି ରୁମ୍ ରେ ରଖାଯାଇଥିବାବେଳେ ଗୋଟିଏ ରୁମ୍ ରେ ପୁଲିସ୍ ସୁରକ୍ଷାକର୍ମୀମାନେ ରହୁଛନ୍ତି । କାଲି ସେଠାରେ ୨ / ଜଣ ବ୍ୟକ୍ତି ଭିତରେ ପଶିଥିବା ସହ ଅନ୍ଧାରୁଆଥିବା ସେହି ଘରଟିର ଭିତରପଟୁ ସଟର୍ ଦେଇଦେବାରୁ ସେମାନଙ୍କ ଭିତରେ ସନ୍ଦେହ ସୃଷ୍ଟି ହୋଇଥିଲା । ତା' ସହ କିଛିଦିନତଳେ କଣ୍ଟାମାଳ ଅଞ୍ଚଳରେ ଷ୍ଟ୍ରଙ୍ଗ୍ ରୁମ୍ ଭିତରକୁ ସେଠାକାର ବିଡିଓ ଦୁଇ ତିନିଜଣ ଲୋକଙ୍କ ସହ ପଶିଥିବା ନେଇ ଏକ ସନ୍ଦିଗ୍ଧଘଟଣା ସମ୍ପର୍କରେ ଗଣମାଧ୍ୟମରେ ପ୍ରକାଶ ପାଇଥିବାରୁ ତାହା ପଢି , ସେମାନେ ଏଠାରେ ମଧ୍ୟ ଭୋଟବାକ୍ସରେ ହେରଫେର ଆଶଙ୍କା କରି ଅଭିଯୋଗ କରିଥିଲେ । ବିଡିଓ ପହଞ୍ଚିବାରୁ ସେହି ସାଦାପୋଷାକଧାରୀ ବ୍ୟକ୍ତିମାନେ ସେମାନଙ୍କ ପୁଲିସ୍ ପୋଷାକ ପିନ୍ଧି ପକାଇବାରୁ ସେମାନେ ସୁରକ୍ଷାକର୍ମୀ ବୋଲି ଜଣାପଡିଥିଲା । ନିର୍ବାଚନ ଅଧିକାରୀ ମଧ୍ୟ ସେଠାରେ ଲାଇଟ୍ ଜଳୁ ନଥିବା ନେଇ ପୂର୍ବଦିନ ଅଭିଯୋଗ କରିଥିବା କହିଛନ୍ତି । ତେବେ  ସେ ସେଠାରେ ଅଧିକ ଲାଇଟ୍ , ୧୫ଟି ସିସିଟିଭି ଥିବା ସହ ବାହାରେ ଡିସ୍ ପ୍ଲେ କରିବାକୁ ରାଜି ହୋଇଥିଲେ । 
ଏଠାରେ ଭାଜପା ଜିଲ୍ଲାପରିଷଦ ସଦସ୍ୟା ଥିବା ତିନିଜଣ ପ୍ରାର୍ଥିନୀ ଓ ତାଙ୍କ ଲୋକମାନେ ଧାରଣା ଦେଇଥିଲେ ।

ତେବେ ଏହି ନିର୍ବାଚନମଣ୍ଡଳୀରେ ବିଧାୟକଙ୍କ ପିଏସଓ ଏବଂ ପୁଲିସ୍ ପେଟ୍ରୋଲିଂ ଗାଡିରେ ଭଇଁଷା ମସିଣାଛାପର ଓ ଲରମ୍ଭାଥାନାର ପାଣ୍ଡେସରା ଗ୍ରାମରେ ଭୋଟଗ୍ରହଣ ପୂର୍ବରୁ ଭୋଟରଙ୍କୁ ଟଙ୍କାବଣ୍ଟା ଧରାପଡିଥିଲା । ଏପରିସ୍ଥଳେ ପୁଲିସ୍ କର୍ମଚାରୀ ବା ସରକାରୀ ଅଧିକାରୀଙ୍କ ପ୍ରତି ସନ୍ଦେହ ଉପୁଜିବା ସ୍ବାଭାବିକ ବୋଲି କୁହାଯାଉଛି । ତେବେ ଏଠାରେ ଏଭଳି ଅନିୟମିତତା କରାଯିବା ସମ୍ଭବ ନୁହେଁ ବୋଲି ଅଞ୍ଚଳର କେତେକ ବୁଦ୍ଧିଜିବୀ ଓ ଗଣମାଧ୍ୟମର ପ୍ରତିନିଧିମାନେ କହିଛନ୍ତି । ତଥାପି ଅଧୁନାତନ ନିର୍ବାଚନରେ କ୍ଷମତାଲାଳସା ସମସ୍ତଙ୍କୁ ଘାରିଛି ଓ ଶାସକଦଳ ବିରୋଧରେ ମଧ୍ୟ ଏଭଳି ଅନିୟମିତତାର ଅଭିଯୋଗ କରାଯାଇଆସୁଛି । ତେଣୁ ସବୁଠି ସବୁକିଛି ସମ୍ଭବ ବୋଲି ଲୋକେ ଆଲୋଚନା କରୁଛନ୍ତି ।