23-Feb-2022

ପଦ୍ମପୁର:- ଆଜି ପାଇକମାଲ ୟୁକୋ ବ୍ୟାଙ୍କ ସମ୍ମୁଖରେ ପାଖାପାଖି ୧୨ଟା ୩୦ ମିନିଟ ସମୟ ରେ ପଦ୍ମପୁର ପଟୁରୁ ପାଇକମାଲ କୁ ଆସୁଥିବା ଓଡି୧୭ କ୍ୟୁ୨୭୧୧ ନମ୍ବରର ଶତାବ୍ଦୀ ବସରେ ଯାତ୍ରା କରୁଥିବା କଳ୍ପନା ପଟେଲ ବୟସ ୨୬ ପିତା ବିହାରିଲାଲ ପଟେଲ ବ୍ୟାଙ୍କ ସମ୍ମୁଖରେ ବସରୁ ଓଲ୍ଲାଇ ଥିଲେ ଏବଂ ଓଲ୍ଲାଇ କି ବସ ସାମ୍ନା ପଟୁ ରୋଡ଼ କ୍ରସ କରିବାକୁ ଚେଷ୍ଟା କରିଥିଲେ । ଠିକ ଏହି ସମୟରେ ବସ ଚାଳକ ତାହା ଜାଣି ନ ପାରି ବସକୁ ଆଗକୁ ବଢ଼ାଇ ଦେଇ ଥିଲେ ଫଳରେ କଳ୍ପନା ପଟେଲ ବସ ଚକ ତଳେ ପଡିଯାଇଥିଲେ ଏବଂ ବସର ଚକ କଳ୍ପନା ର ଗୋଡ଼ ଉପରେ ମାଡି ଗଲା ଫଳରେ କଳ୍ପନା ର ବାମ ଗୋଡ ଟି ଛିଣ୍ଡି ଯିବା ସହ ତାଙ୍କ ଦେହର ଅନ୍ୟ ସ୍ଥାନ ମାନଙ୍କରେ ଅନେକ ଆଘାତ ମଧ୍ୟ ଲାଗିଛି I ସେହି ସମୟରେ ସେହି ସ୍ଥାନରେ ଉପସ୍ଥିତ ଥିବା ବରିଷ୍ଠ ସାମ୍ବାଦିକ ବଡ଼ ଶତପଥୀ, ମୁଜାଫର ହୁସେନ, ସୋନୁ ହୁସେନ, ଓଡ଼ିଶା ମୋଟର ଚାଳକ ସଂଘର ଉଗ୍ରସେନ ସାହୁ , ଟିକୁ ପ୍ରଧାନ ଓ ହିମାଂଶୁ ପ୍ରମୁଖ ସଙ୍ଗେ ସଙ୍ଗେ ପହଞ୍ଚି କଳ୍ପନା କୁ ବସ ଚକରୁ ବାହାରକୁ ବାହାର କରିଥିଲେ । ଏହାପରେ ଆମ୍ବୁଲାନ୍ସର ବ୍ୟବସ୍ଥା କରି ତାକୁ ପାଇକମାଲ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ପଠାଯାଇଥିଲା । ଖବର ପାଇବା ମାତ୍ରେ ପାଇକମାଲ ଥାନା

ଅଧିକାରୀ ବିଶ୍ୱଜିତ ମନବୋଧ ଓ ଏସଆଇ ଚୁମକିପ୍ରଭା ନାଥ ଓ ଅନ୍ୟ ଅଧିକାରୀ ଗଣ ଘଟଣା ସ୍ଥଳେ ପହଞ୍ଚିଥିଲେ । ଘଟଣା ସ୍ଥଳରେ ଆକ୍ରୋଶ, ଜନଗହଳିକୁ ନିୟନ୍ତ୍ରଣ କରିବା ସହ ବସକୁ କାବୁ କରି ଥାନା କୁ ଆଣିଥିଲେ ପାଇକମାଲ ପୋଲିସ । ପ୍ରାପ୍ତ ସୂଚନା ଅନୁସାରେ ଦୁର୍ଘଟଣା ଘଟାଇଥିବା ବସ ର ଚାଳକ ବସ ଛାଡି ଘଟଣା ସ୍ଥଳରୁ ଫେରାର ମାରି ଦେଇଥିଲା । ପ୍ରାପ୍ତ ସୂଚନା ଅନୁଯାୟୀ କଳ୍ପନାର ଅବସ୍ଥା ଗୁରୁତର ଥିବାରୁ ତାକୁ ପ୍ରଥମେ ପାଇକମାଲ ପରେ ଉପଖଣ୍ଡ ଚିକିତ୍ସାଳୟ ପଦ୍ମପୁର ଏବଂ ପଦ୍ମପୁର ରୁ ବୁର୍ଲା ଡ଼ାକ୍ତରଖାନା ନିଆଯାଇଥିବା ସୂଚନା ମିଳିଛି । କଳ୍ପନାର ପିତା ବିହାରିଲାଲ ଗୋଟେ ଛୋଟ ଠେଲା କରି ସେଥିରେ ବିଭିନ୍ନ ସାମଗ୍ରୀ ବିକ୍ରୀ କରି ନିଜ ପରିବାର ପ୍ରତିପୋଷଣ କରନ୍ତି ।ତାଙ୍କ ଝିଅର ଗୋଡ଼ ଛିଣ୍ଡି ଯାଇଥିବା ଶୁଣି ସେ ମଧ୍ୟ ଅତ୍ୟଧିକ ଚିନ୍ତାରେ ପଡିଯାଇଛନ୍ତି ବୋଲି ଜଣାପଡିଛି ।