13-Feb-2022

ସିନ୍ଧେକେଲା // ସାରା ଓଡ଼ିଶାର ରାଜନୈତିକ ବାତାବରଣ କୁ ଦୋହଲାଇ ଦେଇଥିବା ମମିତା ମେହେର ହତ୍ୟା ଘଟଣାରେ ବଲାଙ୍ଗୀର ପୋଲିସ ଫାଇନାଲ ଚାର୍ଜସିଟ ଦାଖଲ କରିଛି । ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ଜେଏମଏଫସି କୋର୍ଟ ରେ ଏହି ଚାର୍ଜସିଟ ଦାଖଲ ହୋଇଛି । ଘଟଣାନୁଯାଇ ଗତ ଅକ୍ଟୋବର ୮ ତାରିଖ ୨୦୨୧ ମମିତା ମେହେର ହତ୍ୟାକାଣ୍ଡ ଘଟିଥିଲା। ମମିତା ତାଙ୍କ ଘର ତୁରେକେଲା ବ୍ଲକ ଝରନି ଗ୍ରାମରୁ ମହାଲିଙ୍ଗ ସନସାଇନ ପବ୍ଲିକ ସ୍କୁଲକୁ ଯାଉଥିବା ବେଳେ ସିନ୍ଧେକେଲା ଥାନା ଚାନ୍ଦୋତରା ଛକରୁ ନିଖୋଜ ହୋଇ ଥିଲେ । ପ୍ରଥମେ ପରିବାର ବର୍ଗ ତରଫରୁ ଏକ ନିଖୋଜ ମାମଲା ସିନ୍ଧେକେଲା ଥାନାରେ ଅଭିଯୋଗ କରିଥିଲେ । ପୋଲିସ ତଦନ୍ତ କରି ସନସାଇନ ପବ୍ଲିକ ସ୍କୁଲର ମାଳିକ ଗୋବିନ୍ଦ ସାହୁଙ୍କୁ ଅକ୍ଟୋବର ୧୪ ତାରିଖ ରେ ଗିରଫ କରିଥିଲା। ହେଲେ ୧୭ ତାରିଖ

ରାତିରେ ଟିଟିଲାଗଡ ପୋଲିସ ବ୍ୟାରେକ ରୁ ଫେରାର ହୋଇ ପୁଣୀ ୧୯ ତାରିଖ ଦିନ ସିନ୍ଧେକେଲା ଥାନା ଅନ୍ତର୍ଗତ ବୁଢିପଦର ଗ୍ରାମର ଏକ ଆଖୁ କିଆରିରୁ ଗିରଫ ହେଲା ଗୋବିନ୍ଦ । ୨୦ ତାରିଖ ଦିନ ମହାଲିଙ୍ଗ ଗ୍ରାମର ଷ୍ଟାଡିୟମ ଠାରେ ମାଟିଖୋଲି ମମିତାଙ୍କ ପୋଡା ଶବ ସହ କିଛି ସାମଗ୍ରୀ ପାଇଥିଲା ପୋଲିସ। ଗୋବିନ୍ଦ ର ବୟାନ କୁ ଭିତ୍ତିକରି ଏହି ହତ୍ଯା ଘଟଣାରେ ସହଯୋଗ କରିଥିବା ଗୋବିନ୍ଦ ର ସହଯୋଗୀ ରାଧେଶ୍ୟାମ ଚାଣ୍ଡି ଙ୍କୁ ଗିରଫ କରିଥିଲା ପୋଲିସ। ଏହି ହତ୍ୟାକାଣ୍ଡ ସାରା ଓଡ଼ିଶାର ରାଜନୈତିକ ବାତାବରଣ ଦୋହଲାଇ ଦେଇଥିଲା। ହତ୍ୟାକାଣ୍ଡ କୁ ୧୨୦ ଦିନ ପୁରିଥିଲେ ବି ପୋଲିସ ଚାର୍ଜସିଟ ଦାଖଲ କରିନଥିବା ଦର୍ଶାଇ ବିରୋଧୀ ଦଳ ପୁଣି ଗର୍ଜିଥିଲେ। ତେବେ ଏହାର ଅନ୍ତ ଘଟାଇ ବଲାଙ୍ଗୀର ପୋଲିସ ବଙ୍ଗୋମୁଣ୍ଡା କୋର୍ଟ ରେ ମମିତା ମେହେର ହତ୍ୟାକାଣ୍ଡ ଘଟଣାରେ ଗିରଫ ହୋଇଥିବା ଅଭିଯୁକ୍ତ ଗୋବିନ୍ଦ ସାହୁ ଓ ତା ସହଯୋଗୀ ରାଧେଶ୍ୟାମ ଚାଣ୍ଡିଙ୍କ ବିରୋଧରେ ଓ ଏହି କେସର ସମସ୍ତ ବିବରଣୀ ପ୍ରାୟ ୧୦୦୦ ପୃଷ୍ଠା ସମ୍ବଳିତ ଚାର୍ଜସିଟ ଦାଖଲ କରିଛି ପୋଲିସ । ତେବେ ଦେଖିବାକୁ ବାକି ରହିଲା ଏହି କେଶ ଆଗକୁ କଣ ମୋଡ ନେଉଛି। ତେଣୁ କୋର୍ଟ ର ବିଚାର ଉପରେ ସମସ୍ତଙ୍କ ନଜର ରହିଛି ।