27-Jan-2022

ସୁବର୍ଣ୍ଣପୁର//(ମନୋରଞ୍ଜନ ତ୍ରିପାଠୀ) : ସୁବର୍ଣ୍ଣପୁର ସଦର ମହକୁମାରେ ଜିଲ୍ଲାସ୍ତରୀୟ ୭୩ତମ ସାଧାରଣତନ୍ତ୍ର ଦିବସ ସମାରୋହ କୋଭିଡ କଟକଣା ମଧ୍ୟରେ ପାଳିତ ହୋଇଯାଇଛି l ସ୍ଥାନୀୟ ରିଜର୍ଭ ପୋଲିସ ପଡିଆ ଠାରେ ଅନୁଷ୍ଠିତ ଏହି ସମାରୋହରେ ଡ଼. ଅରୁଣ କୁମାର ସାହୁ, ମାନ୍ୟବର ମନ୍ତ୍ରୀ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପଶୁସମ୍ପଦ ବିକାଶ, ଏବଂ ଉଚ୍ଚ ଶିକ୍ଷା ବିଭଗ ମୁଖ୍ୟଅତିଥି ଭାବେ ଯୋଗଦାନ କରିବା ସହ ଦେଶର ଗର୍ବ ଏବଂ ଗୌରବର ପ୍ରତୀକ ଜାତୀୟ ପତାକାକୁ ଉତ୍ତୋଳନ କରି ଅଭିବାଦନ ଗ୍ରହଣ ପୂର୍ବକ ଜିଲ୍ଲlବାସୀଙ୍କ ଉଦ୍ଦେଶ୍ୟରେ ଉଦବୋଧନ ଦେଇଥିଲେ l ମାନ୍ୟବର ମନ୍ତ୍ରୀ ଡ଼.ସାହୁ  କହିଲେ ଯେ, ଭାରତର ସମ୍ବିଧାନ ବିଶ୍ୱରେ ଅଦ୍ଵିତୀୟ, ଅନେକତା ମଧ୍ୟରେ ଏକତା ଏହାର ବୈଶିଷ୍ଟ୍ୟ  l ଦେଶର ଗର୍ବ ଗୌରବ ଓ ଗାରିମାକୁ ବଜାୟ ରଖିବା ଆମ ସମସ୍ତଙ୍କ ଦାୟିତ୍ୱ ଓ ତାର ଅନୁପାଳନ ଆମର କର୍ତ୍ତବ୍ୟ l  ସେ ସୁବର୍ଣ୍ଣପୁର ଜିଲ୍ଲାର  ସ୍ୱାଧୀନତା ସଂଗ୍ରାମୀଙ୍କ ତ୍ୟାଗ ଓ ବଳିଦାନର  ସ୍ମୃତିଚାରଣ କରି ସେମାନଙ୍କୁ ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ l ଜିଲ୍ଲାର ସାହିତ୍ୟ, କଳା,ସଂସ୍କୃତି, ପରମ୍ପରା,ଓ ଜିଲ୍ଳା ଇତିହାସର ଅବଲୋକନ ପୂର୍ବକ ଏକ ସ୍ୱାଧୀନ ବିକାଶ ମୂଳକ ରାଷ୍ଟ୍ର ଗଠନରେ ଜିଲ୍ଲାର ଅବଦାନକୁ ପ୍ରଶଂସା କରିଥିଲେ l ସମାରୋହରେ ଜିଲ୍ଲାପାଳ ଶ୍ରୀମତୀ ଅବୋଲୀ ସୁନିଲ ନରୱଣେ, ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ସୀତାରାମ ଶତପଥୀ, ଅତିରିକ୍ତ ଜିଲ୍ଲାପାଳ ଶ୍ରୀ ସୂର୍ଯ୍ୟନାରାୟଣ ଦାଶ, ଅତିରିକ୍ତ ଜିଲ୍ଲାପାଳ ଶ୍ରୀମତୀ ନିଶି ପୁନମ ମିଞ୍ଜ, ପିଡି ଡି ଆର ଡି ଏ ଶ୍ରୀ ଡୋଳାମଣି ପଟେଲ, ଉପଜିଲ୍ଲାପାଳ ସୋନପୁର ଶ୍ରୀ ନିହାର ରଞ୍ଜନ କଁହର ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀ ହେମନ୍ତ କୁମାର ପାଢ଼ୀ, ସମେତ ବିଭିନ୍ନ ବିଭାଗୀୟ ବରିଷ୍ଠ ଅଧିକାରୀ, ପୋଲିସ ପ୍ରଶାସନ ସହ କୋଭିଡ ଯୋଦ୍ଧା, ସାମ୍ବାଦିକ ପ୍ରମୁଖ କାର୍ଯ୍ୟକ୍ରମ ରେ ଉପସ୍ଥିତି ଥିଲେ l ଅଦ୍ୟ ଦିନ ଦିବା ୮-୩  ମିନିଟ୍ ସମୟରେ ମୁଖ୍ୟଅତିଥି ଅନୁଷ୍ଠାନିକ ଜିଲ୍ଲାସ୍ତରୀୟ ଉତ୍ସବରେ ଜାତୀୟ ପତାକା ଉତ୍ତୋଳନ କରିଥିଲେl ଜିଲ୍ଲା ଆରକ୍ଷୀ ବାହିନୀର ଗୋଟିଏ ପ୍ଲାଟୁନ୍ ସହ ପୋଲିସ ବ୍ୟାଣ୍ଡ ପାର୍ଟି ଜାତୀୟ ପତାକା ଏବଂ ମୁଖ୍ୟ ଅତିଥିଙ୍କୁ ଅଭିବାଦନ  ପ୍ରଦାନ ପୂର୍ବକ ସମ୍ମାନ ପ୍ରଦର୍ଶନ କରିଥିଲେ I  ଏଇ ଅବସରରେ ସୂଚନା ଓ ଲୋକସମ୍ପର୍କ ବିଭାଗ ତରଫରୁ ପ୍ରତ୍ୟୁଷରୁ ଡ଼ାକବାଜି ଯନ୍ତ୍ର ଦ୍ୱାରା ସହରରେ ରାମଧୁନ ପରିବେଷଣ କରାଯାଇଥିଲା l ପରେ ପରେ ସକାଳ ୭ଘଣ୍ଟା ସମୟରେ ସହରରେ ଅବସ୍ଥାପିତ ବରପୁତ୍ର ମାନଙ୍କ ପ୍ରତିମୂର୍ତ୍ତି ରେ ପ୍ରଶାସନ ର ବରିଷ୍ଠ ଅଧିକାରୀଙ୍କ ଦ୍ୱାରା ପୁଷ୍ପମାଲ୍ୟ ପ୍ରଦାନ କରାଯାଇଥିଲା l ଦିବସର ବିଭିନ୍ନ କାର୍ଯ୍ୟକ୍ରମକୁ ଶ୍ରୀ ଅଶ୍ବିନୀ କୁମାର ଭୋଇ,ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ ପରିଚାଳନା କରିଥିଲେ I ଏଥିରେ ବିଭଗର ମାନଭଞ୍ଜନ ପଟ୍ଟନାୟକ ଓ କର୍ମଚାରୀ, ସ୍ୱଳ୍ପ ସଂଚୟ ବିଭାଗର ଦୁଃଖୀ ଶ୍ୟାମ ସେଠୀ ପ୍ରମୁଖ ସହଯୋଗ କରିଥିଲେl ସେହିପରି ପ୍ରାତଃ  ୭. ୩୦ଘଣ୍ଟା ସମୟରେ ଜିଲ୍ଲା ମୁଖ୍ୟାଳୟରେ ଜିଲ୍ଲାପାଳ ଶ୍ରୀମତୀ ଅବୋଲୀ ସୁନିଲ ନରୱଣେ ଜାତୀୟ ପତାକା ଉତ୍ତୋଳନ କରି ସମବେତ ଅଧିକାରୀ ଏବଂ କର୍ମଚାରୀ ମାନଙ୍କୁ ନିଷ୍ଠାପର ଭାବରେ ନିଜର କର୍ତ୍ତବ୍ଯ ନିର୍ବାହ ପୂର୍ବକ ଦେଶ ତଥା ସମାଜର ସେବା କରିବା ପାଇଁ ଉଦବୋଧନ ଦେଇଥିଲେ l ଅତିରିକ୍ତ ଜିଲ୍ଲାପାଳ ଶ୍ରୀ ସୂର୍ଯ୍ୟନାରାୟଣ ଦାଶ, ଅତିରିକ୍ତ ଜିଲ୍ଲାପାଳ ଶ୍ରୀମତୀ ନିଶି ପୁନମ୍ ମିଞ୍ଜ୍ ଙ୍କ ସମେତ ଜିଲ୍ଲାପାଳଙ୍କ କାର୍ଯ୍ୟାଳୟର ସମସ୍ତ କର୍ମଚାରୀ ଉତ୍ସବ ରେ ଉପସ୍ଥିତ ଥିଲେ I